Eagles verseker reeks

Jan Frylinck en Junior Taanyanda se openingsvennootskap van 181 lopies gisteby die FNB Namibië Krieketstadion was ’n welkome teenvoeter in die koue.

Die FNB Eagles het hul derde Internasionale T20-wedstryd van vier in ’n Drienasiereeks teen Hongkong en Nigerië in Windhoek gewen om die kompetisie te beklink.

Namibië het eerste gekolf en 230 lopies vir die verlies van ses paaltjies in 20 boulbeurte op die telbord geplaas, wat Hongkong ’n teiken van 231 vir oorwinning gegee het. Hoewel Hongkong (200/6 in 20) nog teen 10.55 lopies per boulbeurt in die elfde boulbeurt gekolf het, het hulle uiteindelik 12.78 per boulbeurt benodig om 231 te haal.

Die openingskolwer en speler van die wedstryd, Jan Frylinck, se blitsige 110 van 56 balle, saam met Junior Taanyanda (56 van 33) en Gerhard Erasmus (31 van 15), het gesorg dat Namibië van die eerste boulbeurt af druk op die besoekers se kolwers geplaas het.

Alles was egter nie deurgaans maanskyn en rose vir die gasheer nie. Namibië het in die 15de boulbeurt vinnig drie paaltjies verloor toe Frylinck uitgevang is, Taanyanda geboul is en Alexander Volschenk lbw uitgegee is. Die Eagles was binne vier aflewerings van Nasrulla Rana op 181 lopies vir drie paaltjies gestrand - of so het dit gelyk. Maar Erasmus, wat Frylinck vervang het, het ander planne gehad. Hy het met ’n treftempo van 206.67 gesorg dat die nodige herstelwerk binne 15 aflewerings afgehandel is.

Dit was Frylinck se tweede honderdtal en Taanyanda se tweede vyftigtal in ’n Internasionale T20-wedstryd.

Rana was by verre die grootste doring in die Eagles se vlees en het met vier paaltjies vir 24 lopies in vier boulbeurte klaargemaak teen ’n ekonomie van ses lopies per boulbeurt. Net Namibië se JJ Smit en Gerhard Erasmus was meer ekonomies as Rana, met onderskeidelik 4.25 en 5.5.

Smit het Namibië se boulbeurt geopen. Wat sy ekonomie nog meer indrukwekkend maak, is dat hy twee van sy vier beurte geboul het toe Ali Zeeshan (53 van 38 balle) en Mathur Shiv (8 van 9 balle) voor die paaltjies was. Hy het Shiv in sy tweede boulbeurt deur Frylinck laat uitvang.

Saam met Zeeshan was Hayai Babar op nommer drie (60 van 31 balle) en Wasif Shahid op nommer vier (34 van 17 balle, geboul deur Smit) Hongkong se beste kolwers in die wedstryd.

Eagles se lopies:

Jan Frylinck (110 van 56 balle, 5x4, 8x6, treftempo 196.43%), Junior Taanyanda (56 van 33 balle, 4x4, 4x6, 169.70%), Gerhard Erasmus (31 van 15 balle, 2x4, 2x6, 206.67%), Alexander Volschenk (0 van 2 balle), JJ Smit (8* nie uit nie, 10 balle, 80%), Zane Green (8 van 5 balle, 1x4, 160%), Ruben Trumpelmann (1 van 2 balle). Ekstralopies: 16. Grenshoue: 26 (12x4, 14x6).

Hongkong se boulwerk:

Nasrulla Rana (4/24 in 4, ekon. 6), Mohammad Khan Aizaz (2/56 in 4, ekon. 14), Iqbal Ateeq Ul Rehman (0/28 in 2, ekon. 14), Ehsan Khan (0/39 in 4, ekon. 9.75), Asad Rasheed (0/49 in 4, ekon. 12.25), Mohammad Ghazanfar (0/32 in 2, ekon. 16).

Hongkong se lopies:

Ali Zeeshan (53 van 38 balle, 6x4, 2x6, 139.47%), Mathur Shiv (8 van 9 balle, 1x4, 88.89%), Hayai Babar (60 van 31 balle, 2x4, 6x6, 193.55%), Wasif Shahid (34 van 17 balle, 2x4, 2x6, 200%), Rath Anshuman (8 van 5 balle, 1x4, 160%), Mohammad Khan Aizaz (7* van 10 balle, 1x4, 70%), Nasrulla Rana (10 van 4 balle, 1x4, 1x6, 250%), Mohammad Ghazanfar (5* van 6 balle, 83.33%). Ekstralopies: 15. Grenshoue: 25 (14x4, 11x6).

Namibië se boulwerk:

JJ Smit (2/17 in 4, ekon. 4.25), Jack Brassell (2/50 in 4, ekon. 12.5), Bernard Scholtz (1/31 in 4, ekon. 7.75), Ruben Trumpelmann (1/54 in 4, ekon. 13.5), Gerhard Erasmus (0/11 in 2, ekon. 5.5), Waldo Smith (0/28 in 2, ekon. 14).