Williams verby 5 000 in sege teen Nepal

Die Richelieu Eagles sal baie graag môre wil wys dat hulle die vereiste aanpassings kon maak in hul herontmoeting met Skotland in Glasgow.

Die Namibiërs kon Sondag in hul openingswedstryd van die Krieket Wêreldbeker Liga 2 driehoekige eendagreeks teen Skotland nie die pas volhou nie en het met 77 lopies verloor.

Skotland (258 vir ses in 50 boulbeurte) het Namibië vir 181 lopies in 43 boulbeurte uitgeboul, met 42 aflewerings oor.

Die Eagles-kolwers het op die vreemde kolfblad gesukkel en kon slegs teen 4.20 per boulbeurt kolf. Die Skotse boulers kan sekerlik as sy grootste wapen beskou word.

Behalwe die giftige blad het Safyaan Sharif vyf paaltjies vir net 35 in 9 boulbeurte teen ’n suinige 3.88 geneem. Die draaibouler Hamza Tahir (2/27 in 8, 1 leeg) het die Namibiërs aan die raai gehou en eindig met ’n ekonomiese 3.37. Mark Watt (2/44 in 9, 1 leeg, ekon 4.88) was die duurste. Gavin Main (1/24 in 8, 2 leeg, ekon 3) het die wurggreep verstewig.

In vergelyking met die Skotse boulaanval wat gemiddeld slegs 4.20 per boulbeurt afgestaan het, kon die Eagles nie dieselfde druk toepas nie. Die Namibiërs gee 35 ekstras pasella en staan 5.16 per boulbeurt af, nadat die Skotte net 7 ekstras aangebied het.

Gerhard Erasmus (3/56 in 10), Tangeni Lungameni (2/46 in 10) en Ruben Trumpelmann (1/45 in 8, ekon 5.62) het wel sukses behaal.

Skotland se kolfhelde was George Munsey op nommer vyf (71 nie uit nie van 108 balle, 7x4, 1x6), Calum MacLeod op drie (50 van 82 b, 5x4) en aanvangskolwer Kyle Coetzer (29 van 34 b, 4x4, 1x6).

As dit nie vir Nicol Loftie-Eaton op nommer vyf (50 van 58 b, 4x4, 1x6), aanvangskolwer Lo-han Louwrens (47 van 85 b, 2x4, 1x6) en JJ Smit op ses (28 van 40 b, 1x4, 1x6) was nie, kon Namibië se totaal nog laer gewees het.

Die Eagles-kolwers slaan 14 grenshoue (10x4, 4x6), terwyl die gasheer 22 viere en vyf sesse grenstou toe jaag.

WENPUNTE TEEN NEPAL

Met die Eagles (220 almal uit in 47.3 bb) het dit Maandag reeds beter teen Nepal (180 almal uit in 46.5) by die New Cambusdoon-veld in Ayr in ’n oorwinning met 40 lopies gegaan.

Loftie-Eaton op ses (60 van 70 b, 5x4, 1x6) is as speler van die wedstryd aangewys. Divan la Cock op 2 (41, 32 b, 7x4) het die vinnigste lopies teen 128 persent aangeteken tot hy op verdagte wyse been voor paaltjie uitgegee is.

Erasmus op vyf (22 van 49 b, 1x6) was ongelukkig om die bal op sy paaltjie te speel. Craig Williams is op drie ingestuur (21 van 46 b, 1x4) en het die eerste Namibiër geword wat 5 000 lopies in A-lys eendagkrieket verbysteek.

Die 38-jarige Williams is ongetwyfeld ’n legende in die plaaslike sport wat reeds sedert 2007 eersterangse krieket vir die land speel.

Aanvangskolwer Louwrens en David Wiese as nommer agt dra elk 18 by, terwyl JJ Smit op sewe 17 (1x4, 1x6) van 14 aflewerings slaan. Die Eagles bewerkstellig 20 viere en drie sesse.

Sandeep Lamichhane (4/54 in 10) neem die meeste paaltjies, maar Basir Ahamad (1/18 in 7.3, ekon 2.4) is die goedkoopste en Mohammad Aadil Alam (0/24 in 7, ekon 3.42) stuur twee leë boulbeurte af.

Aarif Sheikh op ses (50* van 84 b, 2x4) en Dev Khanal op drie (34 van 65 b, 2x4) vaar die beste van die kolwers.

Bernard Scholtz (2/27 in 10), Wiese (2/24 in 6.5, ekon 3.51), Jan Frylinck (2/30 in 8, 1 leeg, ekon 3.75), Erasmus (1/22 in 5, ekon 4.40) en Ruben Trumpelmann (1/42 in 7, ekon 6) het Nepal getem. Loftie-Eaton (0/19 in 6) en Craig Williams (0/15 in 4) was beide vrek suinig met 3.16 en 3.75. Namibië het net nege ekstras afgestaan.

Afgesien van môre se tweede en laaste wedstryd teen Skotland het Namibië ook nog Saterdag se tweede wedstryd teen Nepal in die vooruitsig.