Twee nasionale rekords spat by kampioenskap

Atletiek Namibië se senior nasionale kampioenskap met 39 items op die program is die afgelope naweek suksesvol by die Onafhanklikstadion in Windhoek afgehandel.Ryan Williams en Frieda Iithete het onderskeidelik die nasionale diskusgooi- en driesprongrekord oortref. Williams het Saterdag sy eie rekord met meer as ’n meter tot 55.03 verbeter, terwyl Iithete amptelik Jolene O’Conner se 2001-rekord (11.77 m) met 12.11 m uitgevee het. Ithete, van Khomasstreek, het ook die verspring met 5.52 gewen.Met Christine Mboma en Beatrice Masilingi afwesig terwyl hulle tans die VSA aan die brand hardloop, het plaaslike atlete hul bes gelewer. Mboma het Saterdag haar eie nasionale 100-rekord (11.15) in Birmingham, Alabama tot ’n blitsige 11.03 sekondes verbeter – ’n tyd wat haar reeds tot die tweede beste vanjaar ter wêreld ná Anthonique Strachan (Bahamas, 10.99) laat opskiet. Mboma se opgang in die kortste naelloop vandat sy vanjaar ernstig daarop begin fokus het, bly eenvoudig verstommend.Dit bly egter steeds net die uiters seldsame room wat uitstyg om Namibië potensieel op Afrika- of internasionale vlak te verteenwoordig. Vertonings in verskeie tegniese velditems soos die hoog- en verspring asook driesprong bly egter baie middelmatig, terwyl gewigstoot en skyfwerp net enkele moontlike kandidate het wat op kontinentale vlak kan deelneem en presteer.In die skyfwerp vir vroue is twee jong meisies wat in die toekoms kan uitblink. Tuané Silver het Vrydag die skyfwerp met 44.86 meter gewen terwyl Leané Boshoff tweede (39.02) en Cira de Wet derde (33.43) was. Silver beweeg al hoe nader aan Wilma Bredenhan se nasionale rekord van 46.42 m wat reeds meer as drie dekades sedert 1991 in die rekordboeke staan. Die meisie van Windhoek Gimnasium is op koers om die verskil van 1.52 meter kort voor lank te oorbrug.Silver het reeds vroeër vanjaar die nasionale gewigstootrekord haar eie gemaak en dié item Saterdagoggend gemaklik met 14.12 m gewen. ’n voetbesering het bygedra dat sy nie haar nasionale rekord wat sy op 9 Februarie in Pretoria behaal het (15.24), kon uitdaag nie.Ryan Williams het wel sy eie nasionale rekord (53.92 m) met meer as ’n meter verbeter toe hy die diskus Saterdagoggend op 55.03 m laat land het. Leeorr-el Breytenbach is ook gebore vir die werpitems en het in 47.04 m tweede geëindig. Heelwat verder as sy 46.33 wat hy met die tweede Grand Prix-byeenkoms in Windhoek behaal het.In die gewigstoot is Breytenbach (tweede, 15.15 m) egter Vrydagnamiddag deur die wenner Coenraad Kühn (15.82 m) geklop. Breytenbach het in Swakopmund 15.24 m en in Windhoek 15.47 m tydens die eerste en tweede Grand Prix gestoot.In die mans hoogspring was Emmanuel Samuntu (2.05) en Wencuslaus Klaasman (2.00) die enigstes wat op twee meter of hoër kon slaag.NAELLOPEIn die 400 meter het Ivan Danny Geldenhuys met sy wentyd en persoonlike beste (46.27) los onder André Retief (46.95) en Mahmad Bock (47.42) uit gehardloop. Hiermee het Geldenhuys die kwalifiserende merk vir die Afrika-kampioenskap in Mauritius (46.64) ook met gemak oortref.Gilbert Hainuca het die gesogte 100 meter-titel in 10.37 gewen – maar ’n knaende dyspierbesering dreig om hom dalk te weerhou van die Afrika-kampioenskap waarin hy in beide die 100 en 200 gekwalifiseer het.Hainuca het in Vrydagaand se laaste item, ná die Khomasspan se sege in 40.50 sekondes in die 4x100, ongemaklik gaan sit om mediese behandeling te kry. Saterdagoggend het Hainuca sy 200-uitdun as die heel vinnigste man in 20.90 afgeblits, beter as die kwaliserende merk vir Mauritius (21.24) én vir die Statebondspele in Birmingham (21.40). Hainuca het egter nie vir die 200-finaal aangetree nie, waar laasjaar se titelhouer Ernst Narib naelskraaps in 21.19 teen 21.20 teen Ivan Geldenhuys gewen het.VROUE MIDDELAFSTANDEDie junior atlete Saara Shikongo (Ohangwena) en Nyanyukweni Frans (Omusati) is twee potensiële sterre vir die toekoms. Die twee 17-jariges is toegewyd en kan met die regte afrigting hul merk maak.Shikongo het vanjaar die 1 500 by die Grand Prixs in Swakopmund (4 minute 42.81 sekondes), Windhoek (4:40.52) en Rietfontein (4:45.81) gewen. Frans het in Oshakati hand opgesteek toe sy die eerste plek met 4:44.88 in Shikongo se afwesigheid opgeraap het.Frans was Vrydagaand in beheer met ’n stadigee 4:43.71 teenoor Shikongo se 4:45.38, wat nie nie haar vorige beste tye kon herhaal nie.Die gesoute Alina Armas het die 5000 meter in 17 minute 28.10 sekondes gewen.MANS MIDDELAFSTANDESoos verwag het die talentvolle David Dam Vrydagaand ’n opwindende 1 500 vir mans in 3:56.51 met sy persoonlike beste tyd gewen nadat Thomas Shigweda (3:56.81) hom hard gedruk het, met Simon Paulus derde (4:01.39). Intussen bly Reinholdt Iita en Agnes Samaria se nasionale 1 500-rekords (3:45.35) en (4:05.30) nog veilig. Dam, van Omaruru, het Saterdagoggend in die 800 sy vorige beste tyd van 1:53.38 oortref, maar sy 1:53.13 was net goed genoeg vir ’n tweede plek teen die vasberade Arno Angula, eerste in 1:53.07, terwyl Mathew Angula (1:54.62) derde was.

Twee nasionale rekords spat by kampioenskap

Kommentaar

Republikein 2026-08-05

Meld asseblief aan om kommentaar te lewer

Twee nasionale rekords spat by kampioenskap

Kommentaar

Republikein 2026-08-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.