T20-skouspel bring kragte byeen

’n Internasionale T20-reeks van 1 tot 9 September in Windhoek wat gedugte kombinasies uit Indië, Pakistan en Suid-Afrika insluit, is klaarblyklik in die pyplyn as die Namibiese Richelieu Eagles se volgende groot afspraak.Bengale, ’n kragtige streekspan van die ooste van Indië; die Lahore Qalandars wat in die Pakistan T20 Superliga meeding, asook ’n ongeïdentifiseerde Suid-Afrikaanse kombinasie sal na verwagting teen die Eagles in aksie wees.Volgens ESPNcricinfo het Bengale reeds hul deelname bevestig, terwyl die Lahore Qalandars glo in beginsel ingestem het. Laasgenoemde franchise het reeds ’n Namibiese konneksie – met David Wiese een van hul veelsydige spelers wat die liggroenes gehelp het om vanjaar die Pakistanse Superliga te verower.Hoewel Krieket Namibië glo in afwagting van formaliteite van die sport se wêreldbeheerliggaam nog nie gereed is om die amptelike bekendstelling te doen nie, sal die vooruitsig om sulke gedugte spanne uit Indië en Pakistan op Namibiese bodem te sien meeding, enige krieketliefhebber se mond laat water.Met die Eagles se oog op die naderende T20 Wêreldbeker Oktobermaand in Australië, sal dié wedstryde teen drie topklas spanne uiters waardevolle slypkans aan die Namibiërs besorg.Bengale het volgens The Hindu reeds sy groep van 16 spelers aangekondig wat na Windhoek sal toer. Die span word deur Abhimanyu Easwaran gelei met gesoute spelers soos Shahbaz Ahmed (27), Ishan Porel (23), Mukesh Kumar (28), Akash Deep (25) en Writtick Chatterjee (29). Die 26-jarige Easwaran het 21 T20 A-lyswedstryde op sy getuigskrif en spog met 554 lopies van 437 balle teen gemiddeld 39.57 per kolfbeurt. Met sy lopietempo op ’n indrukwekkende 126.77 persent is hy die afgelope seisoene gereeld vir Indië se A-span gekies en bly ’n aanspraakmaker op selfs hoër louere.Die Eagles neem tans ’n blaaskans ná hul terugkeer uit Skotland, waar hulle in die ICC Wêreldbeker Liga 2-reeks twee keer teen die gasheerspan verloor en twee keer teen Nepal gewen het.

T20-skouspel bring kragte byeen

Kommentaar

Republikein 2025-05-20

Meld asseblief aan om kommentaar te lewer

T20-skouspel bring kragte byeen

Kommentaar

Republikein 2025-05-20

Meld asseblief aan om kommentaar te lewer

MELD AAN

Advertensie