Stonehouse doen Blitsbok-inkopies in Stellenbosch

Die voormalige Blitsbok Dalvon Blood het ’n rugbytuiste by die Pumas gevind en kan in vanjaar se SA Beker-reeks deur die Laevelders ingespan word.Jimmy Stonehouse, afrigter van die Pumas, het Dinsdag by navraag gesê hulle het die dienste van Blood, ’n vleuel in 15’s, bekom. Blood, ’n oudleerling van die Rondebosch Boys’ High School in Kaapstad, het in 2021 vir die Junior Bokke diens gedoen en die jaar daarna sy buiging vir die nasionale sewesspan gemaak.Benewens Blood, het die Pumas ook vir Armand Maritz (oopkantflank), die skrumskakel Conor van Eden en die losvoorspeler Heinz Bertram gekontrakteer. Maritz het tevore die Westelike Provinsie verteenwoordig en verlede jaar vir die Blitsbokke se A-span uitgedraf, met Van Eden wat klubrugby in die Wes-Kaap gespeel het. Bertram, wat in 2023 lid van die NWU-Arende se span was wat die Varsitybeker gewen het, het voorheen vir die Luiperds gespeel.Stonehouse is veral opgewonde oor die 25-jarige losskakel Nevaldo Fleurs, wat hom reeds verlede jaar by die Pumas aangesluit het nadat hy by die Haaie weg is. Voordat Fleurs in Durban was, het hy vir die Maties in die Varsitybeker-reeks uitgeblink en is hy in 2022 vereer met die toekenning as die studentereeks se Agterspeler van die Jaar.Sedert Fleurs in Junie 2023 ’n kniebesering opgedoen het, het hy nog nie weer gespeel nie. Stonehouse sê dié boorling van Nxuba (Cradock) in die Oos-Kaap is nou weer perdfris en kan sy buiging vir die Pumas maak.“Ons is positief oor vanjaar. Ons het ’n paar verstellings gemaak, wat insluit dat ons groep spelers kleiner is. Dan is hier regtig ’n paar spelers oor wie ek opgewonde is, soos Nevaldo en Conor,” sê Stonehouse.Die Pumas, wat vandeesweek na die oefenveld terugkeer ná die feestyd, is besig om voor te berei vir die SA Beker-reeks, wat vroeg in Maart begin. Hul eerste kragmeting in die reeks, wat as kwalifisering vir die Curriebeker gaan dien, is op Vrydag 7 Maart teen die Suidwestelike Distrikte in Mbombela.Ter voorbereiding van dié reeks speel die Laevelders oefenwedstryde teen die Leeus op 1 Februarie in Mookgophong (Naboomspruit) en in Pretoria teen die Valke (14 Februarie) en die Griffons (19 Februarie). - Netwerk24

Stonehouse doen Blitsbok-inkopies in Stellenbosch

Kommentaar

Republikein 2026-02-03

Meld asseblief aan om kommentaar te lewer

Stonehouse doen Blitsbok-inkopies in Stellenbosch

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.