Sterkmanne pak mekaar in Dubaise bokskryt

Twee manne wat mekaar ’n paar jaar gelede gereeld in sterkmankompetisies die stryd aangesê het, Eddie Hall van Brittanje en Thor Bjornsson van Ysland, boks Saterdag in Dubai eindelik teen mekaar.

Dié twee kolosse sou mekaar al ses maande gelede gepak het, maar Hall het ’n boarmspier geskeur en die geveg moes uitgestel word.

“Ek oefen nou al twee jaar net vir hierdie geveg. Ek is nou fikser en vaardiger as voorheen. Ek gaan alles in my vermoë doen om Thor planke toe te stuur,” het Hall volgens The Mirror gesê.

Bjornsson, wat al aan drie boksvertoongevegte deelgeneem het, sê hy reken hy sal Hall in die derde of vierde ronde uitslaan.

Bjornsson is ook as akteur bekend en het in die gewilde TV-reeks Game of Thrones gespeel.

Dit sal Hall se eerste boksgeveg wees. Albei bielies was al voorheen die sterkman-wêreldkampioen.

Die geveg word ook bemark as die swaarste geveg in die geskiedenis, met Hall en Bjornsson wat onderskeidelik nagenoeg 152 en 143 kilogram weeg.

• Kyk hier hoe boks Thor Bjornsson teen Devon Larrat: https://youtu.be/LQaT8tmv44s

– Netwerk24