Skaakfederasie in warm water oor Kenia-toer

Verskeie ouers en voogde van 29 spelers wat in Mei vanjaar aan die Afrikaskole Individuele Skaakkampioenskappe in Nairobi in Kenia deelgeneem het, het die Namibiese Skaakfederasie (NCF) daarvan beskuldig dat hulle ongeveer N$62 000 te veel vir die toer gevra het.Die ouers beweer sommige van hulle het vir alles betaal, insluitend administratiewe en registrasiefooie, sweetpakke, vliegkaartjies, verblyf en bykomende reiskoste. Dit ten spyte daarvan dat die federasie na bewering borgskappe ontvang het om die koste te dek.’n Ouer wat verkies het om anoniem te bly en na bewering die sienings van verskeie besorgde ouers verteenwoordig, het gesê hulle het onsuksesvol probeer om duidelikheid van die uitvoerende direkteur van die ministerie van onderwys, vernuwing, jeug, sport, kuns en kultuur, Erastus Haitengela, te kry of die ministerie fondse aan die federasie toegeken het.BOTSING VAN BELANGEDie ouer het gesê die skaakfederasie het genoem dat hy N$200 000 ontvang het en dat elke speler veronderstel was om N$6 896 te ontvang.“Geen van ons kinders het egter tot vandag toe daardie bedrag ontvang nie. Hulle het nie verduidelik waarvoor die geld gebruik is nie, maar hulle het bevestig dat een van die spelers wat die geld ontvang het, dit aan ’n uitvoerende komiteelid se kind oorhandig het. Hulle het selfs erken dat daar ’n botsing van belange was,” het die ouers gesê.Die groep het ook bevraagteken waarom terugbetalings deur die federasie bespreek is as alles behoorlik hanteer is soos beweer.Die ouers het beweer die federasie kon nie verduidelik waarom hulle moes betaal om geregistreer te word en die administratiewe koste moes aangaan nie.“Hulle het beweer dat die sweetpakke N$2 000 kos, maar in werklikheid is die sweetpakke ongeveer N$600 tot N$700,” het die ouer gesê.MIN FINANSIËLE HULPBRONNEDie president van die NCF, Berdian Beukes, het bevestig die federasie het ’n borgskap van N$200 000 deur die Namibiese Skolesportunie (NSSU) ontvang.Beukes het ook gesê dat die totale geraamde koste per deelnemer of begeleidende ouer ongeveer N$31 915 was, met 60 Namibiese spelers wat vir die geleentheid gekwalifiseer het.Hy het bygevoeg dat, gegewe die hoë koste en die federasie se beperkte finansiële hulpbronne, ouers die opsie gegee is om hul kinders se deelname te finansier.Beukes het gesê dat as vrywilligers in die skaakgemeenskap, talle uitvoerende komiteelede die nodige opofferings vir internasionale deelname gemaak het sonder die ondersteuning van die federasie of die regering.“Nadat die deelnemers bevestig is, het die NCF op 28 April 2025 ’n formele finansieringsversoek by die NSSU ingedien vir skoolkleure en vlugte vir 29 spelers, twee afrigters en twee amptenare,” het hy verduidelik.Hy het bygevoeg dat die NSSU op 8 Mei gereageer en aangedui het dat hulle N$200 000 vir die hele span sou bewillig om te reis.“Hierdie voorwaarde het logistieke en etiese kompleksiteite meegebring. Die NCF het op 14 Mei gereageer en voorgestel om die borgskap gelykop tussen alle bevestigde deelnemers te verdeel, wat N$6 896,55 per persoon is.”TERUGBETALINGVerdere besprekings het op 19 Mei via WhatsApp met die NSSU gevolg. Alhoewel die NSSU gesê het geen kind moet weens finansiële probleme uitgesluit word nie, is ’n definitiewe opdrag oor die dekking van die volle koste vir diegene wat nie kan betaal nie, nie uitgereik nie.Met reisdatums wat nader kom, het Beukes gesê die federasie het dringende besluite geneem om uitstaande bedrae te dek vir spelers wat tekorte in die gesig staar sodat geen kind sou agterbly nie. “Ongelukkig het dit geblyk een van die spelers wat bygestaan is, is die kind van ’n uitvoerende lid, ’n feit wat nie in ag geneem is nie,” het hy gesê en bygevoeg dat dit verstaanbaar kommer oor vermeende botsings van belange laat ontstaan het.Beukes het gesê hoewel geen persoonlike gewin bedoel was nie, en die uitvoerende lid nie by die besluit betrokke was nie, is die voorkoms van onbehoorlike gedrag iets wat diep betreurenswaardig is.Hy het gesê die NCF het hom daartoe verbind om ouers wat die volle bedrag vir enige ongebruikte fondse betaal het, terug te betaal, insluitend die kosteverskil op items soos sweetpakke.“Die administratiewe fooi is gestandaardiseer teen N$950. Enige oortollige bedrag wat per speler of begeleidende persoon gehef word, sal terugbetaal word as ’n gebaar van welwillendheid.“Terugskouend, betreur ons dat ons die NSSU-fondse onder soveel druk aanvaar het. “Terwyl die bedoeling was om die span behoorlik te ondersteun, het die kort tydlyn en emosionele intensiteit van besluite wat op die laaste nippertjie geneem is tot hierdie onbedoelde versuim (oversight) bygedra,” het hy gesê. – republikein@republikein.com.na

Skaakfederasie in warm water oor Kenia-toer

Kommentaar

Republikein 2025-06-18

Meld asseblief aan om kommentaar te lewer

Skaakfederasie in warm water oor Kenia-toer

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie