SA stut kan Spanje sy Wêreldbeker-plek kos
Rugby
Die omswerwinge van ’n Suid-Afrikaanse stut kan die Spaanse rugbyspan moontlik sy plek in die Wêreldbeker-toernooi van 2023 in Frankryk kos.
Spanje het vroeër vandeesmaand gekwalifiseer om vir net die tweede keer in die geskiedenis (en eerste keer sedert 1999) aan rugby se WB-toernooi deel te neem.
Nou het Wêreldrugby egter ’n onafhanklike komitee aangestel om ondersoek in te stel na die moontlikheid dat een van die Spanjaarde se stutte, ’n Suid-Afrikaner genaamd Gavin van den Berg, nog nie verkiesbaar vir hulle was nie.
“Wêreldrugby is gewys op die moontlike verbreking van die reëls deur ’n lid van die Spaanse manspan,” het die organisasie Maandag in ’n verklaring gesê.
“Ná die afsluiting van voorlopig navrae meen die internasionale federasie ’n formele ondersoek is geregverdig. Die Spaanse Rugbyunie was deurgaans tegemoetkomend toe aanvanklike vrae gevra is.”
Van den Berg het sy buiging vir Spanje op 18 Desember 2021 gemaak toe hy as plaasvervanger in ’n wedstryd teen Nederland in Amsterdam opgekom het. Die Spanjaarde het heeltemal te veel skietgoed gehad en die wedstryd (wat deel van die Europese kampioenskap was én vir WB-kwalifisering getel het) met 52-7 gewen.
Van den Berg was een van Spanje se driedrukkers in daardie wedstryd. Hy was weer in die span toe die Spanjaarde op 5 Februarie in ’n herontmoeting met Nederland in Madrid met 43-0 geseëvier het.
Die 26-jarige Van den Berg het in 2014 aan Paarl Gimnasium gematrikuleer en vir Tuks en die Blou Bulle se o.21-span gespeel.
Hy het luidens berigte in 2017 in Portugal gaan rugby speel, en is in 2018 Spanje toe.
Wêreldrugby vereis dat ’n speler drie jaar in ’n land moet woon voordat hy vir sy nuwe tuiste se nasionale span verkiesbaar kan wees. Aanvanklik is gemeen dat Van den Berg aan dié reël voldoen het voordat hy in Desember sy toetsbuiging gemaak het.
Nou ondersoek Wêreldrugby egter ’n bewering dat Van den Berg nie net in 2019 vir vier maande teruggekeer het na Suid-Afrika nie, maar ook hier was toe die wêreld in 2020 deur die Covid-19-pandemie op sy kop gekeer is.
As bevind word dat dit wel só is, kan Spanje moontlik gestroop word van die tien kompetisiepunte wat hulle verdien het teen Nederland omdat Van den Berg daarin gespeel het. Dit sal hulle van die tweede tot die vierde plek op die Europese kwalifiseringsleer laat val, en uit die WB-toernooi boender.
Roemenië sal dan opskuif na tweede en outomaties kwalifiseer, terwyl Portugal derde sal eindig en in November in ’n heruitdun-toernooi sal probeer kwalifiseer.
Dis die tweede opeenvolgende WB-kwalifiseringsveldtog waarin Spanje in omstredenheid gedompel is. In 2018 is Spanje, Roemenië en België uitgeskop omdat hulle spelers gebruik het wat nie vir hulle verkiesbaar was nie. Rusland het toe in 2019 se WB-toernooi in Japan gespeel.
– Netwerk24
Spanje het vroeër vandeesmaand gekwalifiseer om vir net die tweede keer in die geskiedenis (en eerste keer sedert 1999) aan rugby se WB-toernooi deel te neem.
Nou het Wêreldrugby egter ’n onafhanklike komitee aangestel om ondersoek in te stel na die moontlikheid dat een van die Spanjaarde se stutte, ’n Suid-Afrikaner genaamd Gavin van den Berg, nog nie verkiesbaar vir hulle was nie.
“Wêreldrugby is gewys op die moontlike verbreking van die reëls deur ’n lid van die Spaanse manspan,” het die organisasie Maandag in ’n verklaring gesê.
“Ná die afsluiting van voorlopig navrae meen die internasionale federasie ’n formele ondersoek is geregverdig. Die Spaanse Rugbyunie was deurgaans tegemoetkomend toe aanvanklike vrae gevra is.”
Van den Berg het sy buiging vir Spanje op 18 Desember 2021 gemaak toe hy as plaasvervanger in ’n wedstryd teen Nederland in Amsterdam opgekom het. Die Spanjaarde het heeltemal te veel skietgoed gehad en die wedstryd (wat deel van die Europese kampioenskap was én vir WB-kwalifisering getel het) met 52-7 gewen.
Van den Berg was een van Spanje se driedrukkers in daardie wedstryd. Hy was weer in die span toe die Spanjaarde op 5 Februarie in ’n herontmoeting met Nederland in Madrid met 43-0 geseëvier het.
Die 26-jarige Van den Berg het in 2014 aan Paarl Gimnasium gematrikuleer en vir Tuks en die Blou Bulle se o.21-span gespeel.
Hy het luidens berigte in 2017 in Portugal gaan rugby speel, en is in 2018 Spanje toe.
Wêreldrugby vereis dat ’n speler drie jaar in ’n land moet woon voordat hy vir sy nuwe tuiste se nasionale span verkiesbaar kan wees. Aanvanklik is gemeen dat Van den Berg aan dié reël voldoen het voordat hy in Desember sy toetsbuiging gemaak het.
Nou ondersoek Wêreldrugby egter ’n bewering dat Van den Berg nie net in 2019 vir vier maande teruggekeer het na Suid-Afrika nie, maar ook hier was toe die wêreld in 2020 deur die Covid-19-pandemie op sy kop gekeer is.
As bevind word dat dit wel só is, kan Spanje moontlik gestroop word van die tien kompetisiepunte wat hulle verdien het teen Nederland omdat Van den Berg daarin gespeel het. Dit sal hulle van die tweede tot die vierde plek op die Europese kwalifiseringsleer laat val, en uit die WB-toernooi boender.
Roemenië sal dan opskuif na tweede en outomaties kwalifiseer, terwyl Portugal derde sal eindig en in November in ’n heruitdun-toernooi sal probeer kwalifiseer.
Dis die tweede opeenvolgende WB-kwalifiseringsveldtog waarin Spanje in omstredenheid gedompel is. In 2018 is Spanje, Roemenië en België uitgeskop omdat hulle spelers gebruik het wat nie vir hulle verkiesbaar was nie. Rusland het toe in 2019 se WB-toernooi in Japan gespeel.
– Netwerk24
Kommentaar
Republikein
Geen kommentaar is op hierdie artikel gelaat nie