Rugbymanne sien rooi oor nuwe kleurblind-reël
Rugby
Die grootste klomp nonsens wat hy al ooit gehoor het.
So som die oud-Springbok-kaptein Wynand Claassen ’n nuwe Wêreldrugby-beleid op wat sal meebring dat die Bokke en All Blacks ná 2025 nooit weer in hul tradisionele kleure teen mekaar sal speel nie.
Dié beleid is vervat in riglyne wat Wêreldrugby in 2021 opgestel het oor hul voorneme om ’n kleurblindheid-beleid te aanvaar. Dit is verlede week stil-stil aanvaar.
Dié beleid, wat in 2025 amptelik van krag sal wees, sal meebring dat die Bokke en All Blacks mekaar daarna nooit weer in hul tradisionele truie kan pak in ’n Wêreldrugby-toernooi nie. Een span sal altyd in ’n ligte trui moet speel, en die ander in ’n donker trui. Dit geld alle wedstryde onder Wêreldrugby se vaandel.
Bill Beaumont, Wêreldrugby se voorsitter, is self kleurblind.
“Ek is trots op die stappe wat ons in vennootskap met Colour Blind Awareness gedoen het om mense op te voed en in te lig oor dié belangrike kwessie. Die beleide is geskep om te sorg dat kleurblinde ondersteuners op alle vlakke van die spel ’n uitsonderlike ervaring het en al die groot lewenslange voordele geniet wat rugby kan bied,” sê Beaumont.
“Saam kan ons verseker dat die spel so inklusief as moontlik vir almal is.”
Kleurblindheid is volgens Wêreldrugby ’n baie algemene toestand wat sowat 300 miljoen mense wêreldwyd raak.
“Net die rooi/groen-tipes kleurblindheid raak 8% van mans (0,5% van vroue), wat beteken dat daar twee tot drie kleurblinde spelers in elke mansgroep van 32 kan wees. Baie mense met kleurvisie-gestremdhede is nie bewus van hul toestand nie en daarom is dit onwaarskynlik dat hulle sal praat of hulp vra.”
Rugbybase oor die wêreld heen is woedend hieroor. Die Suid-Afrikaanse Rugbyunie het volgens Rapport se inligting reeds twee keer in briewe aan Wêreldrugby hul misnoeë oor die beleid te kenne gegee.
Dit sal byvoorbeeld beteken dat die Springbokke en All Blacks nooit weer in hul primêre kleure in ’n Wêreldrugby-toernooi teen mekaar sal speel nie.
KOMMERSIëLE NAGEVOLGE
Vanweë die kommersiële waarde van die spanne se tuis-truie, bestaan ’n kans dat die Bokke en All Blacks die beleid selfs kan verontagsaam wanneer hulle in Sanzaar-toetse, soos die Rugbykampioenskap, speel, word verneem.
“Terwyl SA Rugby Wêreldrugby se ambisie ondersteun om rugby so inklusief moontlik te maak, het ons ernstige bedenkinge oor die potensiële impak wat die kleurblind-regulasies kan hê, en ons glo dit moet verder ondersoek word,” sê Rian Oberholzer, Saru se waarnemende uitvoerende hoof.
“Dit sal byvoorbeeld beteken dat die Springbokke en All Blacks nooit weer in hul primêre kleure in ’n Wêreldrugby-toernooi teen mekaar sal speel nie.
“Die riglyne sê: ‘As net een mens langs ’n skoolveld sit en kyk en sukkel om sekere elemente van die wedstryd te volg weens ’n vermybare botsing van truie, laat rugby hulle in die steek.’
“Maar ons glo sommige of almal van die 11 uit 12 mans en 199 uit 200 vroue wat nié kleurblind is nie (gegrond op die statistieke wat voorgelê is), kan ook in die steek gelaat voel as die lang tradisies van die spel verlore gaan, laat staan nog die potensiële skade aan die ekwiteitswaarde wat aan die betrokke handelsmerke en kleure gekoppel is oor jare heen.
“Ons glo die impak op die spel se breër ondersteuningsbasis moet ook in berekening gebring word. Ons sal aanhou om met Wêreldrugby te praat oor die onderwerp.”
OUD-BOKKE VERSTOM
Die beleid laat oud-Bokke stom. “Waar kom hulle nou hieraan? Dit is absoluut belaglik. Hulle het niks beters om te doen as om sulke twak uit te dink nie,” sê Claassen.
“As die Bokke en All Blacks teen mekaar speel, kan jy duidelik die onderskeid sien. Hul broeke is selfs swart en ons s’n wit. Dit is twak.
“Ek weet nie of dit weens die professionele era is dat ouens nou met hierdie simpel goed vorendag kom net om hulself besig te hou nie.
“Wat van die 100-jaar-tradisie en die etos van rugby? Dit gaan baie skade ly (as die plan deurgevoer word).”
Die voormalige Bok-vleuel Breyton Paulse sê hy is geskok.
“Dis vir my vreemd. Ek het begrip, en ’n mens moet respek toon, in dié geval aan mense wat kleurblind is,” sê Paulse.
“Maar as jy met enige Bok praat, insluitend myself, wil ek altyd in my groen trui speel. Dit sal die tradisie wegvat van al die jare: Die Bokke in groen teen die All Blacks in swart. Dit is ’n trotse tradisie, dit is ’n tradisie wat die hele wêreld ken.
“Ek hoop regtig hulle kan dit stopsit. Dis skokkend.”
– Netwerk24
So som die oud-Springbok-kaptein Wynand Claassen ’n nuwe Wêreldrugby-beleid op wat sal meebring dat die Bokke en All Blacks ná 2025 nooit weer in hul tradisionele kleure teen mekaar sal speel nie.
Dié beleid is vervat in riglyne wat Wêreldrugby in 2021 opgestel het oor hul voorneme om ’n kleurblindheid-beleid te aanvaar. Dit is verlede week stil-stil aanvaar.
Dié beleid, wat in 2025 amptelik van krag sal wees, sal meebring dat die Bokke en All Blacks mekaar daarna nooit weer in hul tradisionele truie kan pak in ’n Wêreldrugby-toernooi nie. Een span sal altyd in ’n ligte trui moet speel, en die ander in ’n donker trui. Dit geld alle wedstryde onder Wêreldrugby se vaandel.
Bill Beaumont, Wêreldrugby se voorsitter, is self kleurblind.
“Ek is trots op die stappe wat ons in vennootskap met Colour Blind Awareness gedoen het om mense op te voed en in te lig oor dié belangrike kwessie. Die beleide is geskep om te sorg dat kleurblinde ondersteuners op alle vlakke van die spel ’n uitsonderlike ervaring het en al die groot lewenslange voordele geniet wat rugby kan bied,” sê Beaumont.
“Saam kan ons verseker dat die spel so inklusief as moontlik vir almal is.”
Kleurblindheid is volgens Wêreldrugby ’n baie algemene toestand wat sowat 300 miljoen mense wêreldwyd raak.
“Net die rooi/groen-tipes kleurblindheid raak 8% van mans (0,5% van vroue), wat beteken dat daar twee tot drie kleurblinde spelers in elke mansgroep van 32 kan wees. Baie mense met kleurvisie-gestremdhede is nie bewus van hul toestand nie en daarom is dit onwaarskynlik dat hulle sal praat of hulp vra.”
Rugbybase oor die wêreld heen is woedend hieroor. Die Suid-Afrikaanse Rugbyunie het volgens Rapport se inligting reeds twee keer in briewe aan Wêreldrugby hul misnoeë oor die beleid te kenne gegee.
Dit sal byvoorbeeld beteken dat die Springbokke en All Blacks nooit weer in hul primêre kleure in ’n Wêreldrugby-toernooi teen mekaar sal speel nie.
KOMMERSIëLE NAGEVOLGE
Vanweë die kommersiële waarde van die spanne se tuis-truie, bestaan ’n kans dat die Bokke en All Blacks die beleid selfs kan verontagsaam wanneer hulle in Sanzaar-toetse, soos die Rugbykampioenskap, speel, word verneem.
“Terwyl SA Rugby Wêreldrugby se ambisie ondersteun om rugby so inklusief moontlik te maak, het ons ernstige bedenkinge oor die potensiële impak wat die kleurblind-regulasies kan hê, en ons glo dit moet verder ondersoek word,” sê Rian Oberholzer, Saru se waarnemende uitvoerende hoof.
“Dit sal byvoorbeeld beteken dat die Springbokke en All Blacks nooit weer in hul primêre kleure in ’n Wêreldrugby-toernooi teen mekaar sal speel nie.
“Die riglyne sê: ‘As net een mens langs ’n skoolveld sit en kyk en sukkel om sekere elemente van die wedstryd te volg weens ’n vermybare botsing van truie, laat rugby hulle in die steek.’
“Maar ons glo sommige of almal van die 11 uit 12 mans en 199 uit 200 vroue wat nié kleurblind is nie (gegrond op die statistieke wat voorgelê is), kan ook in die steek gelaat voel as die lang tradisies van die spel verlore gaan, laat staan nog die potensiële skade aan die ekwiteitswaarde wat aan die betrokke handelsmerke en kleure gekoppel is oor jare heen.
“Ons glo die impak op die spel se breër ondersteuningsbasis moet ook in berekening gebring word. Ons sal aanhou om met Wêreldrugby te praat oor die onderwerp.”
OUD-BOKKE VERSTOM
Die beleid laat oud-Bokke stom. “Waar kom hulle nou hieraan? Dit is absoluut belaglik. Hulle het niks beters om te doen as om sulke twak uit te dink nie,” sê Claassen.
“As die Bokke en All Blacks teen mekaar speel, kan jy duidelik die onderskeid sien. Hul broeke is selfs swart en ons s’n wit. Dit is twak.
“Ek weet nie of dit weens die professionele era is dat ouens nou met hierdie simpel goed vorendag kom net om hulself besig te hou nie.
“Wat van die 100-jaar-tradisie en die etos van rugby? Dit gaan baie skade ly (as die plan deurgevoer word).”
Die voormalige Bok-vleuel Breyton Paulse sê hy is geskok.
“Dis vir my vreemd. Ek het begrip, en ’n mens moet respek toon, in dié geval aan mense wat kleurblind is,” sê Paulse.
“Maar as jy met enige Bok praat, insluitend myself, wil ek altyd in my groen trui speel. Dit sal die tradisie wegvat van al die jare: Die Bokke in groen teen die All Blacks in swart. Dit is ’n trotse tradisie, dit is ’n tradisie wat die hele wêreld ken.
“Ek hoop regtig hulle kan dit stopsit. Dis skokkend.”
– Netwerk24
Kommentaar
Republikein
Geen kommentaar is op hierdie artikel gelaat nie