Racing 92 knoop tienerjarige bulstut vas

Die bekendmaking van die 19-jarige stut Herman Coetzee se driejaarkontrak met die Franse spogklub Racing 92 is ’n merkwaardige oomblik vir Namibiese rugby – asook vir die rugby-akademie in Pretoria wat die ooreenkoms beklink het.Die deur is geopen vir ’n professionele loopbaan wat vir die speler en die klub wedersyds tot voordeel kan wees en wat Namibië se oorsese profiel verder kan verhoog – in die voetspore van die vorige mylpale wat byvoorbeeld Jacques Burger en Janco Venter (beide by Saracens in Engeland), Torsten van Jaarsveld en Pieter-Jan van Lill by Bayonne in Frankryk bereik het.Terselfdertyd sal die ongemaklike vraag seker nog vir jare gevra word: het Allister Coetzee en sy afrigterspan ’n fout begaan om die jongeling van 128 kg nie sterker vir hul 2023 Wêreldbekergroep in Frankryk te oorweeg nie?Die Namibiese vaste vyf se gebreke in die skrums en lynstaandrywe is in hul groep A-wedstryde teen Italië en Nieu-Seeland reeds ongenaakbaar blootgelê. Sonder ’n stewige platform kon Namibië in weinig fasette sy stempel op die toernooi afdruk.In die sosiale media het gewese nasionale stutte soos Hauta Veii (nou afrigter van Dolphin) vir Allister ondersteun deur te verduidelik dat Herman eers meer volwassenheid moet opdoen voordat hy op verantwoordelike wyse op só ’n hoë vlak aan die diep kant ingegooi kan word.Herman het egter sy vuurdoop op provinsiale vlak (vir die Windhoek Draught Welwitschias in die Mzansi-uitdaagreeks) met vlieënde vaandels geslaag en hoewel hy veels te min speeltyd gekry het, het die Windhoek Gimmie en Namibië o.18-kaptein van 2022 sommer dadelik op die senior vlak veel meer tuis as selfs ouer manne gelyk.AGTER DIE SKERMSSonder om oor syfers uit te wei, het Herman se agent, Rassie van Vuuren van Rugby Travel Academy, aan die koerant gesê hierdie kontrakooreenkoms met Racing 92 is die grootste wat hulle nóg in hul jong bestaan beklink het.Beide Van Vuuren (in sy speeldae ’n haker en stut vir die Pumas, Blou Bulle, Aurillac, Bayonne en Montpellier) en RTA se stigter Len Olivier (oudlosskakel van onder meer die Valke, Blou Bulle, Boland, Oyonnax en Colomiers) se rugbykontakte oraloor Europa werp nou vrugte af vir die volgende geslag.Dimitri Szarzewski, gewese Franse haker in 83 toetse (2004-2015) het ’n lang loopbaan by Racing 92 gehad en is nou hul voorspelerafrigter. Van Vuuren sê hy destyds gereeld as rugbyspeler met Szarzewski swaarde gekruis, maar ook goeie vriende geword, wat deel van die storie van Herman Coetzee se kontrak geword het.“Ek en Len werk hard agter die skerms. Nie elke speler kry ’n kontrak nie, maar vir dié wat vasbyt en wys hulle is gereed, is daar geleenthede,” sê Van Vuuren.Rugby Travel Academy het ook tevore vir Riaan Grové (WHS en Namibië o.18 en o.20) in sy huidige junior kontrak met die Franse klub Aurillac bygestaan. Ander jong Namibiërs by dié akademie in Pretoria sluit in Natie van Rensburg, SG Maritz, MJ Atkinson en Joe Losper, almal lede van die nasionale o.20-span vroeër vanjaar.&bull; Kyk gerus op die Facebook-blad van Sport Wrap of Republikein na Herman se video waarin hy met waardering en opgewondenheid oor sy nuwe geleentheid gesels.&bull; Korreksie bygewerk: Aranos Coetzee (2010-2012) en Anton Bresler (2021-2022) is Namibiërs wat tevore by Racing 92 gekontrakteer was.

Racing 92 knoop tienerjarige bulstut vas

Kommentaar

Republikein 2025-05-01

Meld asseblief aan om kommentaar te lewer

Racing 92 knoop tienerjarige bulstut vas

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie