Quan (20) en Ruan (19) gevra om vuur te stook vir Leeus

Ná byna drie maande sonder ’n oorwinning en op die vooraand van ’n kragmeting met een van die mees gevreesde klubspanne in Europa, sou ’n mens verwag dat die Leeus die laaste paar dae vol vrese en fronse was.Maar nee, het die Johannesburgers Donderdag beklemtoon, dit kan nie verder van die waarheid wees nie. Inteendeel het hulle in hul samesyn op toer en in ’n welkome bederfie van die weergode heelwat gevind om oor te glimlag.Spesifiek Donderdagoggend, toe hulle by hul vensters uitkyk en sneeu op die Dublin-grond sien.“Julian (Redelinghuys, die Leeus se skrumghoeroe) het ’n weer-app op sy foon waarby hy sweer en ek het weer ’n gunsteling van my eie, maar ons almal se apps het die week voorspel ons gaan teen vandag (Donderdag) sneeu hê,” het die Leeus-breier, Ivan van Rooyen, met ’n gesig vol lig en lag vertel. “Daar was omtrent groot opgewondenheid toe ons wakker word en dit sien – almal is uit om videos en foto’s te gaan neem en dit was vet pret.“Daar word nie vir (Vrydag) sneeu voorspel nie, maar dit sal seker een of twee grade (Celsius) wees, met ’n taamlike wind wat waai. Ons het heelweek gesê sneeu en koue is nie iets waarvoor jy binne ’n week kan voorberei as jy dit nog nooit ervaar het nie, so ons kan onsself maar net herinner dat dit gaan koud wees en aanhou fokus op wat voor ons is. Maar die grootste effek van die weer sal seker eerder die wind wees as die koue.”Koue en kilheid sal daar nietemin in oorvloed wees wanneer die Johannesburgers Vrydagaand in Dublin se RDS Arena uitdraf om in die Verenigde Rugbykampioenskap (VRK) kragte te meet met die uiters gedugte Leinster.Die Ierse reus is een van die pasaangeërs in die reeks en het in die afgelope tien maande net een keer op sy tuisveld verloor. Hy sal selfs sonder van sy staatmakers, wat vir Ierland Sesnasies-diens doen, ’n gevestigde eenheid in die veld stoot. Dit sal ’n span wees wat die Leeus van hul voete probeer speel met ’n patroon gebou op spoed, akkuraatheid en ’n verknogtheid aan balbesit.Die Leeus verwag geen gunste nie, sê Van Rooyen.“As jy kyk na ons oefengeriewe hierdie week en na die weer, gaan ons beslis Vrydag ’n koue ontvangs kry,” het die Leeus-breier met ’n skewe glimlag gesê.“Weg van die veld is die Iere baie oop vir ons en gaan hulle uit hul pad om te help, maar op die veld sal dit ’n ander storie wees.”Die beste manier waarop die Leeus daardie koue kan verdryf, is deur hul eie vuur na die veld te neem waarmee hulle ’n slag weer hul eie lont kan aansteek én Leinster se aura van onoorwinlikheid weg kan brand. Die vraag is net of daar genoeg vuurstokers is in die jong groep wat in die Leeus-trui sal uitdraf.Van Rooyen-hulle het altesaam agt veranderinge gemaak aan die span wat twee weke terug teen die Stormers verloor het, en verras met ’n melkbaard of twee.Byvoorbeeld is die 19-jarige Ruan Venter, wat verlede jaar nog op die skoolbanke van die Hoër Jongenskool Paarl gesit het, gevra om Vincent Tshituka se groot skoene as 7-flank vol te staan. Leeus-ondersteuners sal hoop dit geld in sy geval dat jy oud genoeg is as jy goed genoeg is.Twee 20-jariges – die losskakel Jordan Hendrikse en heelagter Quan Horn – vorm daarby deel van die ruggraat van die span.“Ons is regtig bly dat Jordan weer fiks en gesond genoeg is om op losskakel vir ons uit te draf, en regtig opgewonde om te sien wat Quan vir ons op heelagter bied,” het Van Rooyen gesê.“Hy skop goed met sy linkervoet, is blitsvinnig en kan verdedigers in man-op-man-situasies klop.“Ja, ons stuur ’n paar jong en onervare spelers uit teen ’n gevestigde Leinster-span, maar ons brand om te sien wat hulle vir ons kan bring.”Jaco Kriel, die Leeus-kaptein, het gesê die melkbaarde in die span verdien die kans om hulself te bewys.“Ons is ongelukkig nie in dieselfde posisie as die meeste ander spanne wat diepte en ervaring betref nie, maar ons het hierdie jong spelers wat hul hande sover opgesteek het op die vlakke waar hulle kans gekry het en op ’n manier hulself gekies het.”Kriel het die versekering gegee dat die Leeus Vrydagaand sal uitdraf met die vaste geloof dat hulle ’n opskudding in Dublin kan lewer.“Ek kan almal verseker dat geen speler ooit uitdraf met die idee dat hy nie sal omgee om te verloor nie,” het Kriel gesê.“Nadat jy vier keer verloor het, soos ons nou, besluit jy nie skielik jy gaan swakker oefen of swakker speel nie en jy gaan nooit uit met die plan om foute te maak nie.“Ons wil Vrydag wen en ons het hierdie week geoefen met dít as ons enigste doelwit.”&bull; LEINSTER: Max O’Reilly, Tommy O’Brien, Jamie Osborne, Harry Byrne, Dave Kearney, Ross Byrne, Nick McCarthy, Rhys Ruddock, Dan Leavy, Josh Murphy, Joe McCarthey, Devin Toner, Michael Ala’alatoa, James Tracy, Ed Byrne. Reserwes: Sean Cronin, Peter Dooley, Thomas Clarkson, Jack Dunne, Max Deegan, Luke McGrath, Adam Byrne, Scott Penny.LEEUS: Quan Horn, Stean Pienaar, Wandisile Simelane, Burger Odendaal, Edwill van der Merwe, Jordan Hendrikse, Morné van den Berg, Francke Horn, Ruan Venter, Jaco Kriel (k), Ruben Schoeman, PJ Steenkamp, Carlu Sadie, Jaco Visagie, Sti Sithole. Reserwes: PJ Botha, Morgan Naude, Ruan Dreyer, Lunga Ncube, Sibusiso Sangweni, Nico Steyn, Manuel Rass, Tiaan Swanepoel.Skeidsregter: Craig Evans (Wallis).Assistent-skeidsregters: Peter Martin (Ier), Stuart Gaffikin (Ier).TV-skeidsregter: Colin Stanley (Ier).Afskop: 21:35; regstreeks op SS Grandstand (201) en SS Rugby (211).

Quan (20) en Ruan (19) gevra om vuur te stook vir Leeus

Kommentaar

Republikein 2025-05-02

Meld asseblief aan om kommentaar te lewer

Quan (20) en Ruan (19) gevra om vuur te stook vir Leeus

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie