O.20-laaities word manne
Rugby
Die Namibiërs kry Sondag in die eindstryd teen Zimbabwe kans om hul oorheersing van die Afrika-kompetisie te hervat.
’n Betekenisvolle toets vir die gesondheid van die plaaslike sport is geslaag toe Namibië se o.20-rugbyspan gister ’n spannende semifinaal teen Kenia oortuigend met 16-5 gewen het.
Die nasionale junior span sal Sondagmiddag teen Zimbabwe in die eindstryd van die Rugby Afrika Onder 20 Barthés-bekertoernooi opgeweeg word, nadat laasgenoemde gister die ander semifinaal teen Madagaskar met 32-3 beklink het.
Bloot gemeet aan die tekens wat laas naweek in die openingsronde gesien is, moes Kenia as titelhouer van 2019 en 2021 gister ’n sterk kans teen die Namibiërs gestaan het.
Die vasberadenheid van die Namibiërs om die meedoënlose vertoning te lewer waarmee die immer trotse Keniane tot oorgawe gedwing sou moes word, het egter die deurslag gegee.
In die proses het verskeie van die juniors hand opgesteek dat hulle waardig is om ook soos in Phil Davies se dae vanuit die o.20-groep hul eerste stelselmatige blootstelling in die senior internasionale arena te begin kry.
Die skrumskakel en kaptein Oela Blaauw het sy span rustyd met 6-0 laat voorloop deur met twee uit sy drie strafskoppogings pale toe te slaag.
Die vinniger lynspoed waarop afrigter Chrysander Botha aangedring het waarmee die verdedigers die Keniane agter die voordeellyn onder druk moes plaas, is met doeltreffende duikvatte uitgevoer. Die Keniane is van vroeg af ontsenu en ’n string ongedwonge foute het die tuisspan en tuisskare se gemoed algaande gedemp.
Vir ’n lang periode in die tweede helfte het Kenia op die Namibiese doellyn geboer en met mag en mening sy stormramme ingespan, maar die verdediging was ondeurdringbaar.
Buitesenter Niel Holtzhausen se opportunistiese onderskepdrie kort ná rustyd was ’n belangrike keerpunt en is opnuut en Blaauw verdoel, wat ook ’n strafdoel in die 68ste minuut bygevoeg het om die telling 16-0 te maak.
Kenia het wel die laaste drie gedruk met ’n puik stukkie teenaanval teen die regterkantlyn af, maar dit was te min en te laat om die Namibiese aanslag te keer.
Holtzhausen en sy sentermaat Patrick Karsten was uitstaande op aanval en verdediging, terwyl die lang en sterk agtsteman Riaan Grové ook ’n sleutelspeler is. Met heelagter Geraldo Beukes se taktiese skopvoet en besluitneming is hy besig om as ’n generaal te ontwikkel, en so kan ’n mens aangaan. Geeneen van die Namibiërs het sy aandele gister enige skade aangedoen nie, maar uiteindelik was die oorwinning ’n ware spanpoging.
In Sondag se finaal kry die Namibiërs die geleentheid om hul oorheersing van die kontinentale kompetisie te hervat – net soos hulle van 2013 tot 2018 onafgebroke gedoen het. Kenia het die 2019-span in die finaal in Nairobi in die doodsnikke verras, terwyl die 2020-toernooi nie gespeel is nie en Kenia verlede jaar net-net teen Madaskar oorleef het toe Namibië weens die uitbreek van Covid-19 in sy spelersgroep net voor hul vertrek na Nairobi moes onttrek.
Die nasionale junior span sal Sondagmiddag teen Zimbabwe in die eindstryd van die Rugby Afrika Onder 20 Barthés-bekertoernooi opgeweeg word, nadat laasgenoemde gister die ander semifinaal teen Madagaskar met 32-3 beklink het.
Bloot gemeet aan die tekens wat laas naweek in die openingsronde gesien is, moes Kenia as titelhouer van 2019 en 2021 gister ’n sterk kans teen die Namibiërs gestaan het.
Die vasberadenheid van die Namibiërs om die meedoënlose vertoning te lewer waarmee die immer trotse Keniane tot oorgawe gedwing sou moes word, het egter die deurslag gegee.
In die proses het verskeie van die juniors hand opgesteek dat hulle waardig is om ook soos in Phil Davies se dae vanuit die o.20-groep hul eerste stelselmatige blootstelling in die senior internasionale arena te begin kry.
Die skrumskakel en kaptein Oela Blaauw het sy span rustyd met 6-0 laat voorloop deur met twee uit sy drie strafskoppogings pale toe te slaag.
Die vinniger lynspoed waarop afrigter Chrysander Botha aangedring het waarmee die verdedigers die Keniane agter die voordeellyn onder druk moes plaas, is met doeltreffende duikvatte uitgevoer. Die Keniane is van vroeg af ontsenu en ’n string ongedwonge foute het die tuisspan en tuisskare se gemoed algaande gedemp.
Vir ’n lang periode in die tweede helfte het Kenia op die Namibiese doellyn geboer en met mag en mening sy stormramme ingespan, maar die verdediging was ondeurdringbaar.
Buitesenter Niel Holtzhausen se opportunistiese onderskepdrie kort ná rustyd was ’n belangrike keerpunt en is opnuut en Blaauw verdoel, wat ook ’n strafdoel in die 68ste minuut bygevoeg het om die telling 16-0 te maak.
Kenia het wel die laaste drie gedruk met ’n puik stukkie teenaanval teen die regterkantlyn af, maar dit was te min en te laat om die Namibiese aanslag te keer.
Holtzhausen en sy sentermaat Patrick Karsten was uitstaande op aanval en verdediging, terwyl die lang en sterk agtsteman Riaan Grové ook ’n sleutelspeler is. Met heelagter Geraldo Beukes se taktiese skopvoet en besluitneming is hy besig om as ’n generaal te ontwikkel, en so kan ’n mens aangaan. Geeneen van die Namibiërs het sy aandele gister enige skade aangedoen nie, maar uiteindelik was die oorwinning ’n ware spanpoging.
In Sondag se finaal kry die Namibiërs die geleentheid om hul oorheersing van die kontinentale kompetisie te hervat – net soos hulle van 2013 tot 2018 onafgebroke gedoen het. Kenia het die 2019-span in die finaal in Nairobi in die doodsnikke verras, terwyl die 2020-toernooi nie gespeel is nie en Kenia verlede jaar net-net teen Madaskar oorleef het toe Namibië weens die uitbreek van Covid-19 in sy spelersgroep net voor hul vertrek na Nairobi moes onttrek.
Kommentaar
Republikein
Geen kommentaar is op hierdie artikel gelaat nie