Net tot hier toe ...

Die skerpheid wat vereis sal word om ’n Wêreldbeker-rugbywedstryd te wen, kan nog heelwat opgeskerp word, maar in die geheel sou afrigter Allister Coetzee in verskeie opsigte tevrede gewees het met hoe sy Namibiese span Saterdag in die losmaker teen die Vodacom Bulls gevaar het. In ’n bykans stampvol WHS FNB Vegkopstadion het die Bulle die wedstryd met 43-30 beklink, met sewe drieë teen vier en ná ’n rustydvoorsprong van 19-13. Die kaptein vir die dag, Pieter-Jan van Lill, het die fisiekheid en speltempo van die Bulle verwelkom as goeie voorbereiding vir die Wêreldbeker, wat vir Namibië op 9 September teen Italië begin en ook toetse teen die All Blacks, Frankryk en Uruguay insluit. Die Namibiese groep is bestem om vandeesweek die reis na Frankryk aan te pak. Op die foto deur Brian Munango bring die Namibiese losskakel Cliven Loubser in die tweede helfte die Bulle se reserweskrumskakel Bernard van der Linde grond toe.