Nederland knip Eagles se vlerke
Krieket
Die groot prys is steeds binne die Namibiërs se bereik.
Een van daardie ingrypende regruk-aksies waarvoor die Namibiese Eagles van kaptein Gerhard Erasmus en afrigter Pierre de Bruyn reeds ná vorige bloedneuse bekend geword het, word nou in hul aanslag op die T20 Wêreldbeker in Australië vereis.
Gister se naelskraapse en frustrerende nederlaag teen Nederland in Geelong – toe Namibië hul beskeie kolftelling van net 121/6 tot in die laaste boulbeurt so byna-byna suksesvol verdedig het – het sleg afgesteek in vergelyking met twee dae tevore se foutlose doeltreffende vertoning met kolf-, boul- en veldwerk.
Die uiteinde is dat die Eagles in môre se laaste wedstryd in kwalifiserende groep A teen die Verenigde Arabiese Emirate ’n oortuigende oorwinning sal wil behaal om seker te maak dat hulle na die WB-toernooi se Supertwaalf deurdring.
Baie is op die spel, want dié prestasie kan dalk vir die kwalifiseerders beteken dat hulle nie in uitduntoernooie vir die volgende Wêreldbeker (2024 in Wes-Indië en die VSA) betrokke hoef te raak nie.
De Bruyn en sy uitgelese tegniese hulpspan sal ongetwyfeld hul ontledingswerk doen om hetsy in personeel of in benadering die oplossings te vind vir gister se onvermoë om die kolftempo te versnel toe die nodig was.
Die Namibiërs was ooglopend sowat 15 tot 20 lopies kort van wat ’n wentotaal sou wees – ’n frustrerende verloop van sake omdat nie genoeg potensiële balle oorgelaat is aan die groter houeslaners David Wiese en/of JJ Smit om soos teen Sri Lanka in die laaste boulbeurte die krane oop te draai nie. Beide het eers in die 19de boulbeurt ingestap toe Frylinck en Erasmus beide uitgehaal is.
Moes Wiese of Smit dalk een posisie vroeër in die plek van Erasmus ingestuur gewees het, toe Stephen Baard ná 11.2 boulbeurte uitgevang is en die Eagles op 63/4 gestaan het?
Dit sal straks een van die vrae wees waaroor in die nabetragting besin sal word – tesame met die onvoldoende vertoning van die topordekolwers, bygesê.
Om Jan Frylinck dalk kwalik te neem dat hy nie in die laat boulbeurte die tempo hoër kon opjaag as die 43 lopies van 48 balle waarmee hy geëindig het nie, sou ook nie regverdig wees nie ná sy reddingswerk as kolwer nommer vyf wat op 32/2 ná 5.2 boulbeurte die bloeding moes keer nie.
Divan la Cock (0), Michael van Lingen (19) en Nicol Loftie-Eaton (0) is uitgehaal voordat Stephen Baard (19 van 22 balle) en later Erasmus (16 van 18 balle) saam met Frylinck gekolf het.
“Die kolfblad (reg langsaan die een waarop Sondag gespeel is) was totaal sonder gras en was ’n heeltemal ander ervaring vir die kolwer,” het Frylinck agterna in ’n nuuskonferensie verduidelik.
“Die spoed van die wip op verskillende kolle was onvoorspelbaar. As kolwers was ons evaluering van die situasie dat ons so lank as moontlik moet in bly, want vir ’n nuwe kolwer sou dit ’n goeie klompie balle neem om gewoond te raak,” het Frylinck gesê.
Frylinck sê hy is trots op die wyse waarop die Eagles tot die einde bly veg en so byna ’n oorwinning uit die kake van ’n nederlaag gegryp het. Een van die keerpunte was Erasmus se briljante direkte trefgooi om vir Max O’Dowd (35 van 35 balle) uit te hardloop, waarna Smit (twee keer, 2/24 in 4) en Frylinck ook met paaltjies toegeslaan het.
“Donderdag (teen die Emirate) sal vir ons ’n groot wedstryd wees. Ons sal ons ontledende huiswerk doen en van daar af hergroepeer. Dis nodig dat ons weer ’n perfekte vertoning in al drie aspekte van die spel lewer soos wat ons teen Sri Lanka gedoen het.”
Bas de Leede van Nederland is as speler van die wedstryd aangewys vir sy onoorwonne 30 lopies van 30 balle, 2/18 en twee vangskote.
• In gister se ander wedstryd het Sri Lanka (152/8) sy netto kolftempo laat herleef met sy reuse-oorwinning teen die Emirate (73 almal uit). Vir die Emirate het Karthik Meiyappan (3/19 in 4) die eerste driekuns van die toernooi behaal toe dit gelyk het asof Sri Lanka na ’n 180-totaal sou kon storm.
• Groep A se huidige stand ná twee wedstryde elk:
1 Nederland 4 punte, netto kolftempo +0.149.
2 Namibië 2 punte, NRR +1.277.
3 Sri Lanka 2 punte, NRR +0.600.
4 Emirate 0 punte, NRR -2.028.
Gister se naelskraapse en frustrerende nederlaag teen Nederland in Geelong – toe Namibië hul beskeie kolftelling van net 121/6 tot in die laaste boulbeurt so byna-byna suksesvol verdedig het – het sleg afgesteek in vergelyking met twee dae tevore se foutlose doeltreffende vertoning met kolf-, boul- en veldwerk.
Die uiteinde is dat die Eagles in môre se laaste wedstryd in kwalifiserende groep A teen die Verenigde Arabiese Emirate ’n oortuigende oorwinning sal wil behaal om seker te maak dat hulle na die WB-toernooi se Supertwaalf deurdring.
Baie is op die spel, want dié prestasie kan dalk vir die kwalifiseerders beteken dat hulle nie in uitduntoernooie vir die volgende Wêreldbeker (2024 in Wes-Indië en die VSA) betrokke hoef te raak nie.
De Bruyn en sy uitgelese tegniese hulpspan sal ongetwyfeld hul ontledingswerk doen om hetsy in personeel of in benadering die oplossings te vind vir gister se onvermoë om die kolftempo te versnel toe die nodig was.
Die Namibiërs was ooglopend sowat 15 tot 20 lopies kort van wat ’n wentotaal sou wees – ’n frustrerende verloop van sake omdat nie genoeg potensiële balle oorgelaat is aan die groter houeslaners David Wiese en/of JJ Smit om soos teen Sri Lanka in die laaste boulbeurte die krane oop te draai nie. Beide het eers in die 19de boulbeurt ingestap toe Frylinck en Erasmus beide uitgehaal is.
Moes Wiese of Smit dalk een posisie vroeër in die plek van Erasmus ingestuur gewees het, toe Stephen Baard ná 11.2 boulbeurte uitgevang is en die Eagles op 63/4 gestaan het?
Dit sal straks een van die vrae wees waaroor in die nabetragting besin sal word – tesame met die onvoldoende vertoning van die topordekolwers, bygesê.
Om Jan Frylinck dalk kwalik te neem dat hy nie in die laat boulbeurte die tempo hoër kon opjaag as die 43 lopies van 48 balle waarmee hy geëindig het nie, sou ook nie regverdig wees nie ná sy reddingswerk as kolwer nommer vyf wat op 32/2 ná 5.2 boulbeurte die bloeding moes keer nie.
Divan la Cock (0), Michael van Lingen (19) en Nicol Loftie-Eaton (0) is uitgehaal voordat Stephen Baard (19 van 22 balle) en later Erasmus (16 van 18 balle) saam met Frylinck gekolf het.
“Die kolfblad (reg langsaan die een waarop Sondag gespeel is) was totaal sonder gras en was ’n heeltemal ander ervaring vir die kolwer,” het Frylinck agterna in ’n nuuskonferensie verduidelik.
“Die spoed van die wip op verskillende kolle was onvoorspelbaar. As kolwers was ons evaluering van die situasie dat ons so lank as moontlik moet in bly, want vir ’n nuwe kolwer sou dit ’n goeie klompie balle neem om gewoond te raak,” het Frylinck gesê.
Frylinck sê hy is trots op die wyse waarop die Eagles tot die einde bly veg en so byna ’n oorwinning uit die kake van ’n nederlaag gegryp het. Een van die keerpunte was Erasmus se briljante direkte trefgooi om vir Max O’Dowd (35 van 35 balle) uit te hardloop, waarna Smit (twee keer, 2/24 in 4) en Frylinck ook met paaltjies toegeslaan het.
“Donderdag (teen die Emirate) sal vir ons ’n groot wedstryd wees. Ons sal ons ontledende huiswerk doen en van daar af hergroepeer. Dis nodig dat ons weer ’n perfekte vertoning in al drie aspekte van die spel lewer soos wat ons teen Sri Lanka gedoen het.”
Bas de Leede van Nederland is as speler van die wedstryd aangewys vir sy onoorwonne 30 lopies van 30 balle, 2/18 en twee vangskote.
• In gister se ander wedstryd het Sri Lanka (152/8) sy netto kolftempo laat herleef met sy reuse-oorwinning teen die Emirate (73 almal uit). Vir die Emirate het Karthik Meiyappan (3/19 in 4) die eerste driekuns van die toernooi behaal toe dit gelyk het asof Sri Lanka na ’n 180-totaal sou kon storm.
• Groep A se huidige stand ná twee wedstryde elk:
1 Nederland 4 punte, netto kolftempo +0.149.
2 Namibië 2 punte, NRR +1.277.
3 Sri Lanka 2 punte, NRR +0.600.
4 Emirate 0 punte, NRR -2.028.
Kommentaar
Republikein
Geen kommentaar is op hierdie artikel gelaat nie