Nasie se hoop op Afrika-respek

Die Tafel Lager Brave Warriors se veggees, selfvertroue en wil om te wen sal die Namibiese nasie vanaand soos een man agter hulle verenig in hul openingswedstryd teen die gedugte Tunisië by die CAF Afrika Nasiebeker 2023 in Ivoorkus.Die afskoptyd in die Amadou Gon Coulibaly-stadion in Korhogo is om 19:00 Namibiese tyd (17:00 in Ivoorkus). Die wedstryd word regstreeks op NBC, GOtv en SuperSport vertoon.Tunisië se hoofafrigter, Jalel Kadri, het gister op ’n nuuskonferensie gesê die toernooi se wedstryde sover was ’n dringende wekroep dat sogenaamde groter of kleiner sokkernasies se spanne op ’n gelyke voet meeding.Kadri het verwys na Mosambiek se indrukwekkende vertoning teen Egipte (2-2), sowel as Ghana se onverwagse nederlaag teen Kaap Verde (1-2) in hul onderskeie openingswedstryde.Vir Tunisië, die 2004 Afrika-kampioen en sesmalige Wêreldbeker-kwalifiseerder, is die wegspring teen Namibië geensins ’n pasella nie, het Kadri verklaar, aangesien die 2023-toernooi reeds uitgewys het daar is geen “klein” span by Afrika se kontinentale skouspel nie.“Namibië is ’n ernstige teenstander. Ons verwag niks makliks nie. Die uitslae in die openingsronde het gewys ons moet hulle respek betoon en na die beste van ons vermoë speel,” het Kadri gemaan.Tunisië speel in sy 21ste Afrika Nasiebekertoernooi en 16de op ’n streep – ’n rekord in die geskiedenis van die toernooi.’n Ongunstige statistiek is egter dat Tunisië nie enige van sy laaste vier openingswedstryde by ’n Afcon-toernooi kon wen nie. Die Noord-Afrikane is nietemin besonder bestendig en het sedert hul 2004-triomf net een keer (2010) nie die groepfase oorleef om tot die kwarteindstryd te vorder nie.Oor hul doelwitte het Kadri bloot gesê die span het genoeg voorberei om so lank as moontlik in die toernooi te bly.“Ons het spelers van goeie gehalte en sal dus probeer om elke wedstryd te wen. Ons moet respek hê teenoor alle teenstanders. Afrika se beste spanne is hier, so ons benader dit wedstryd vir wedstryd,” het die afrigter afgesluit.BUITEPERDNamibië se wenlose rekord in drie vorige Afcon-toernooie (nege gespeel, twee gelykop, sewe verloor) en sy 0-3 verloorrekord teen Tunisië is die geelwortels vir afrigter Collin Benjamin se Brave Warriors.Gelykopuitslae in opwarmwedstryde teen Ghana en Suid-Afrika wys sy manne hoef vir niemand terug te staan nie. Sy spelersgroep vir die toernooi word as goed gebalanseerd beskou, met ’n kombinasie van ervaring en nuwe bloed. Dertien spelers het die ervaring van die land se vorige Afcon-deelname (2019 in Egipte).’n Oorwegend stewige verdediging en middelveld was tiperend van Benjamin se termyn sover, met Peter Shalulile, Deon Hotto, Riaan Hanamub en Namibië se mees ervare speler Denzil Hoaseb wat waardevolle ondervinding bied.Die 30-jarige Shalulile is die vernaamste doelskieter in die Suid-Afrikanse premierliga en het Mamelodi Sundowns se prominensie ’n hupstoot gegee, wat hom ook reeds individuele erkenning in die topdrie spelers in CAF-klubkompetisies verskaf het.Sy vernuf om die geringste kans voor die doelkas af te rond, inspireer die hoop van die Namibiese nasie.As kaptein het hy reeds in elke wedstryd in die kwalifiserende veldtog doele aangeteken.Die dinamiese en begaafde Prins Tjiueza (21, aanvallende middelveldspeler van Liria Prizren in Kosovo), Bethuel Muzeu (23, voorspeler van Black Leopards in Suid-Afrika) en Uetuuro Kambato (25-jarige vleuel van African Stars en tevore Costa Do Sol in Mosambiek) word ook geoormerk as van sy spanmaats met die vermoë om by die Afrika-toernooi hul kans aan te gryp om die kollig op hulself te vestig.– Bygewerk van CAFonline.com

Nasie se hoop op Afrika-respek

Kommentaar

Republikein 2025-12-17

Meld asseblief aan om kommentaar te lewer

Nasie se hoop op Afrika-respek

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.