Miller druk Beers enduit in Attakwas Extreme

Net enkele dae ná die aankondiging dat hy vasgeknoop is om in die kleure van die gerekende Suid-Afrikaanse span PYGA Euro Steel te ry, het Namibië se bergfietskampioen Alex Miller gewys dat hy gereed is vir enige uitdagings wat in die nuwe jaar vir hom voorlê.

In Saterdag se eendaagse Attakwas Extreme-bergfietswedren oor 121 kilometer wat buite Oudtshoorn begin en in Groot-Brakrivier eindig, het hy net-net in ’n naelresies teen die 2020-wenner Matt Beers van Suid-Afrika tweede klaargemaak.

Die temperatuur het by tye aan 40 grade Celsius geraak-raak, maar danksy ’n suidsuidwestewind van voor was dit nogtans koeler as die versengende hitte van verlede jaar se wedren.

Erosie weens somerstorms het verskeie slote veroorsaak en die Attakwaskloof nóg moeiliker gemaak. Dit word reeds as Suid-Afrika se taaiste eendagresies bestempel en dié land se heel bestes was by die wegspringstreep.

Miller, verlede jaar se bronswenner by die Statebondspele in Birmingham, word eers volgende maand 20 jaar oud en moes die naweek vir die tweede keer met die silwerposisie by die Attakwas tevrede wees.

Tristan Nortjé (Toyota Specialized) sê jy moes baie versigtig wees, want sommige slote was so diep soos ’n fiets. Nortjé het daarom gesorg dat hy en sy spanmaats die eerste paar kilometers aan die voorpunt bly.

Beers (Toyota Specialized) het gou die voorste groep gelei. Hy is gevolg deur Marco Joubert, Pieter du Toit en Wessel Botha (Imbuko), Miller en sy jong Suid-Afikaanse spanmaat Michael Foster (PYGA Euro Steel), Arno du Toit, Keagan Bontekoning en CP van Wyk (Insect Science), asook Jan Withaar (24/7 Security), Gert Heyns en Christiaan Janse van Rensburg.

Philip Buys, Euro Steel se leier, het met die eerste klim meganiese probleme ondervind wat sy wedren beëindig het. Die res van die gunstelinge was almal nog in die wedloop by die tweede waterpunt – ná 50 km.

By die klim ná die kruin van die Attakwaskloof het Nortjé en Miller die groep opgebreek. Miller het die titel Koning van die Berg gewen.

“Ná die ‘Koning van die Berg’-merk het Matt [Beers] en Arno [du Toit] hulle weer by ons aangesluit. Maar toe val Arno,” sê Nortjé.”

Beers, Nortjé en Miller was toe alleen voor.

“Minder ryers het egter nie in ons guns gewerk nie,” sê Beers.

“Ek en Tristan moes al die rywerk voor doen, wat Alex toegelaat het om vir ’n groot deel van die tweede helfte ’n kleiner poging in te sit. Tristan het teruggeval en Alex het ’n paar keer probeer aanval. Ek het ook ’n paar keer probeer aanval, maar daar het niks daarvan gekom nie.”

Miller het voor gery op pad na die laaste afdraande.

“Ek was tevrede om agter hom te ry en my kans af te wag, want ek ken die roete en dit is bedrieglik,” sê Beers.

Miller het hom met ’n draai teen die laaste afdraand misgis en Beers het hom aan die linkerkant verbygesteek.

Beers het met kragtige rywerk in volle vaart op die eindstreep afgepyl, maar Miller het steeds in sy nek geblaas. Net ’n halwe fietslengte het hulle geskei.

Beers se wentyd was 5 uur 29 sekondes. Miller het dieselfde tyd gekry, met Nortjé derde – 2 minute 01 sekonde ná die wenner.

Withaar het vierde geëindig en Du Toit vyfde.

Beers het verlede jaar derde geëindig en in 2021 het hy nie deelgeneem nie.

VROUE

Sarah Hill het haar oorwinning in die Klein-Karoo op ’n heel ander wyse behaal. Yolande de Villiers, die gunsteling, het reeds vroeg in die wedren meganiese probleme ondervind en sy sou nie na haar vyfde titel kon mik nie.

Hill het van Elrika Harmzen-Pretorius op die klim na die “Koning van die Berg”-merk weggebreek en daarvan die wedren alleen gery.

Hill was verheug oor haar eerste titel in ’n wentyd van 6:33:29. Harmzen-Pretorius het 7 minute 49 sekondes ná die wenner geëindig met Catherine Colyn derde.

Janice Venter het vierde klaargemaak en Sarita Louw was vyfde.

– Bygewerk van Netwerk24