Low Key sal op ranglyste deurbreek
Boks
Dis nog vroeg in wat beloof om 'n groot jaar vir die Namibiese liggewig te wees.
Nadat Jeremiah “Low Key” Nakathila die naweek in Las Vegas die beroepswedders ’n bloedneus gegee het met sy tegniese uitklopsege teen Miguel Berchelt (30) van Mexiko, behoort die Namibiër binnekort onder die topvyf liggewigte op Wêreldboksorganisasie (WBO) se wêreldranglys te verskyn.
Die 32-jarige Nakathila het in die derde ronde eers die voormalige wêreldkampioen met ’n reguitlinkerhou op die kennebak getref wat hom op sy sitvlak laat beland het.
Ná Berchelt staande die 8-telling moes aanhoor, het die twee boksers vir die volgende paar rondes verwoed hou vir hou geveg.
In die sesde ronde het Low Key hom weer met venynige kombinasies getref. Met 36 sekondes oor in dié ronde het Nakathila met ’n moordende regter die Mexikaan se mondstuk oor die krytvloer laat vlieg. Hoe Berchelt staande gebly het, is ’n wonder.
Die klok het Berchelt gered, maar die skeidsregter het besluit hy het genoeg slae verduur en die geveg beëindig. Die Namibiër het volgens al drie tellinghouers elk van die ses rondes gewen (60-53, 60-53, 60-53) toe die geveg gestop is.
Low Key, uit die stal van die MTC Nestor Sunshine Tobias-boksakademie, is gister soos ’n held deur MTC tydens ’n mediakonferensie in die hoofstad ontvang.
Nakathila het aan die koerant gesê: “Dit was ’n harde en ’n topklas geveg. Berchelt is ’n moeilike kalant, want hy was vir lank die wêreldkampioen.
“Vir dié geveg was ek die beste van my loopbaan voorberei en daarom het dit maklik gelyk. Ek is bly ek kon ’n moeilike uitdaging en ’n taai bokser soos Miguel baasraak.
“Ek is oortuig ek hoort nou onder die A-klas boksers ter wêreld. Ek kan die hoogste sport in boks bereik en teen enige bokser in die kryt klim.
“Ek sal ’n week of twee rus voor ek weer begin oefen en dan sal ons besluit wat die pad vorentoe is. Ons is nou eers in Maart. Dit gaan beslis ’n groot jaar vir my wees en ek is gereed om die taak aan te pak.
“Ek wil graag my land trots maak en die wêreld opnuut wys Namibië se boksers behoort op die internasionale verhoog. Dankie aan MTC en Nestor Tobias wat die geveg moontlik gemaak het.”
DEURE OOP VIR NAMIBIËRS
Tobias, vegknoper van Nakathila, sê: “Dit was ’n puik oorwinning wat vir Nakathila en natuurlik ander boksers in Namibië deure oopgemaak het.
“Nou wil die res van die wêreld weet wat is nog in Namibië en vir my as promotor lê die opdraand voor, want ek sal moet voorsien aan die aanvraag.
“Nakathila kan nou teen enige bokser deur die toue klim. Al die buitelandse promotors sal hom nou wil hê. Veral ná ’n geveg soos die wat internasionaal deur Top Rank en ESPN regstreeks op televisie uitgesaai was wat Namibië op die wêreldkaart gevestig het.
“Ons is binnekort terug in die gimnasium om te doen wat Low Key gewoonlik doen. Ek wil ’n beter oefenprogram vir hom bekom en dan wag ek om van Top Rank te hoor wat hul volgende voorstel is.
“Low Key was voor die geveg agtste op die WBO-wêreldranglys. Hy sal nou beslis tot onder die topvyf vorder en daar is ’n moontlikheid dat hy deur elk van die topvier beheerliggame (WBO, WBA, WBC en IBF) se ranglyste kan deurbreek sal word.
“Dan word hy deur al die grotes erken en ek glo hy kan binnekort vir ’n wêreldtitelgeveg oorweeg word.
“Die probleem is dat almal nou weet hoe hard Nakathila slaan en sy gevegstyl ken.”
John Ekongo van MTC sê: “Ons waardeer wat Low Key bereik het. Ons moedig ander korporatiewe instansies aan om MTC te help sodat ons hoër hoogtes kan bereik.
“Die antwoord op die vraag van wat die opbrengs op my belegging as borg gaan wees, kan nie in geldwaarde gemeet word nie. Nie ná wat Sondagoggend in Vegas gebeur het nie; die vraag is eerder wat ’n hupstoot dit vir Namibië in geheel beteken.”
Nakathila spog na dese met 25 beroepsgevegte, 23 oorwinnings en 19 uitklophoue. Sy twee nederlae was met punte oorsee (in Rusland en die VSA).
Berchelt was van Januarie 2017 tot Februarie 2021 die superveergewigkampioen van die Wêreldboksraad (WBC) voordat hy sy titel aan sy landgenoot Oscar Valdez in die einste Las Vegas afgestaan het.
– [email protected]
Die 32-jarige Nakathila het in die derde ronde eers die voormalige wêreldkampioen met ’n reguitlinkerhou op die kennebak getref wat hom op sy sitvlak laat beland het.
Ná Berchelt staande die 8-telling moes aanhoor, het die twee boksers vir die volgende paar rondes verwoed hou vir hou geveg.
In die sesde ronde het Low Key hom weer met venynige kombinasies getref. Met 36 sekondes oor in dié ronde het Nakathila met ’n moordende regter die Mexikaan se mondstuk oor die krytvloer laat vlieg. Hoe Berchelt staande gebly het, is ’n wonder.
Die klok het Berchelt gered, maar die skeidsregter het besluit hy het genoeg slae verduur en die geveg beëindig. Die Namibiër het volgens al drie tellinghouers elk van die ses rondes gewen (60-53, 60-53, 60-53) toe die geveg gestop is.
Low Key, uit die stal van die MTC Nestor Sunshine Tobias-boksakademie, is gister soos ’n held deur MTC tydens ’n mediakonferensie in die hoofstad ontvang.
Nakathila het aan die koerant gesê: “Dit was ’n harde en ’n topklas geveg. Berchelt is ’n moeilike kalant, want hy was vir lank die wêreldkampioen.
“Vir dié geveg was ek die beste van my loopbaan voorberei en daarom het dit maklik gelyk. Ek is bly ek kon ’n moeilike uitdaging en ’n taai bokser soos Miguel baasraak.
“Ek is oortuig ek hoort nou onder die A-klas boksers ter wêreld. Ek kan die hoogste sport in boks bereik en teen enige bokser in die kryt klim.
“Ek sal ’n week of twee rus voor ek weer begin oefen en dan sal ons besluit wat die pad vorentoe is. Ons is nou eers in Maart. Dit gaan beslis ’n groot jaar vir my wees en ek is gereed om die taak aan te pak.
“Ek wil graag my land trots maak en die wêreld opnuut wys Namibië se boksers behoort op die internasionale verhoog. Dankie aan MTC en Nestor Tobias wat die geveg moontlik gemaak het.”
DEURE OOP VIR NAMIBIËRS
Tobias, vegknoper van Nakathila, sê: “Dit was ’n puik oorwinning wat vir Nakathila en natuurlik ander boksers in Namibië deure oopgemaak het.
“Nou wil die res van die wêreld weet wat is nog in Namibië en vir my as promotor lê die opdraand voor, want ek sal moet voorsien aan die aanvraag.
“Nakathila kan nou teen enige bokser deur die toue klim. Al die buitelandse promotors sal hom nou wil hê. Veral ná ’n geveg soos die wat internasionaal deur Top Rank en ESPN regstreeks op televisie uitgesaai was wat Namibië op die wêreldkaart gevestig het.
“Ons is binnekort terug in die gimnasium om te doen wat Low Key gewoonlik doen. Ek wil ’n beter oefenprogram vir hom bekom en dan wag ek om van Top Rank te hoor wat hul volgende voorstel is.
“Low Key was voor die geveg agtste op die WBO-wêreldranglys. Hy sal nou beslis tot onder die topvyf vorder en daar is ’n moontlikheid dat hy deur elk van die topvier beheerliggame (WBO, WBA, WBC en IBF) se ranglyste kan deurbreek sal word.
“Dan word hy deur al die grotes erken en ek glo hy kan binnekort vir ’n wêreldtitelgeveg oorweeg word.
“Die probleem is dat almal nou weet hoe hard Nakathila slaan en sy gevegstyl ken.”
John Ekongo van MTC sê: “Ons waardeer wat Low Key bereik het. Ons moedig ander korporatiewe instansies aan om MTC te help sodat ons hoër hoogtes kan bereik.
“Die antwoord op die vraag van wat die opbrengs op my belegging as borg gaan wees, kan nie in geldwaarde gemeet word nie. Nie ná wat Sondagoggend in Vegas gebeur het nie; die vraag is eerder wat ’n hupstoot dit vir Namibië in geheel beteken.”
Nakathila spog na dese met 25 beroepsgevegte, 23 oorwinnings en 19 uitklophoue. Sy twee nederlae was met punte oorsee (in Rusland en die VSA).
Berchelt was van Januarie 2017 tot Februarie 2021 die superveergewigkampioen van die Wêreldboksraad (WBC) voordat hy sy titel aan sy landgenoot Oscar Valdez in die einste Las Vegas afgestaan het.
– [email protected]
Kommentaar
Republikein
Geen kommentaar is op hierdie artikel gelaat nie