Louwrens tree na vore in Hongkong-reeks
Krieket
Tielman van Lill
Die 23-jarige Lo-han Louwrens se bestendige kolfwerk as aanvangskolwer in die reeks teen Hongkong het sy aanspraak versterk op meer gereelde insluiting in die Namibiese nasionale krieketspan, die Richelieu Eagles.
Die voormalige Namibiese o.19-kaptein het die afgelope seisoene onder afrigter Pierre de Bruyn selde daarin geslaag om speelkans in die suksesvolle nasionale kombinasie af te dwing.
Louwrens het egter gister opnuut sy kleim afgesteek met ’n honderdtal in die derde en laaste internasionale eendagwedstryd teen die besoekende Hongkong.
Sy 111 lopies gister het sy talent verder ten toon gestel, nadat hy in die vorige twee wedstryde eers 54 van 77 balle en daarna 63 van 60 balle aangeteken het.
Al drie wedstryde is by Trustco United se veld gespeel, waar Louwrens die huidige eerstespankaptein is.
Saam met die ewe indrukwekkende Zane Green (60 van 68 balle, 9x4) het hy gister in ’n 150-lopievennootskap om die eerste paaltjie bygedra tot die Eagles (226 vir 3 in 38.4 boulbeurte) se suksesvolle lopiejaagtog om ook die laaste kragmeting van die Castle Lite-reeks teen Hongkong (224/7 in 50) te beklink.
Louwrens het uitstekend gekolf om sy 111 lopies van 115 aflewerings te slaan, wat nege viere en twee sesse ingesluit het.
As speler van die wedstryd was hy egter agterna heel beskeie.
“Ek dink dit was ’n baie goeie spanpoging en ek is bly dat ek kon bydra en dat ons kon wen. Dis beter as wanneer jy persoonlik lopies kry, maar die span verloor.
“Ons glo steeds ons is in staat om meer gereelde honderdtalle aan te teken as net die een in hierdie reeks.”
Louwrens is met ’n uitstekende aflewering van Ehsan Khan geflous en skoongeboul. Green is been voor paaltjie deur Yasim Murtaza betrap toe hy ’n veeghou wou speel.
Craig Williams op nommer drie (21 van 28 balle, 2x4, gevang Haroon Arshad, geboul Dan Pascoe), Shaun Fouché (23* van 18 b, 4x4) en Picky Ya France (4* van 4 b) het die Eagles se oorwinning afgerond.
Babar Hayat (35 lopies), Yasim Murtaza (68), Haroon Arshad (25), Dan Pascoe (32) en Ayush Shukla (24*) was gister saam 16 ekstras grootliks verantwoordelik vir Hongkong (224 vir 7 paaltjies in 50 boulbeurte) se telling teen 4.48 lopies per boulbeurt).
Die Hongkong-kolwers slaag daarin om 12 grenshoue na die tou te jaag en timmer vyf sesse vir 78 lopies. Die Eagles-kolwers ryg 25 viere en twee sesse in.
Die Namibiese boulaanval was opnuut ekonomies en het slegs tussen 3.42 (Tangeni Lungameni) en 5.16 lopies (Nicol Loftie-Eaton) per boulbeurt afgestaan.
Hoewel Ben Shikongo en Loftie-Eaton nie ’n paaltjie kon laat kantel nie, het die twee in ses boulbeurte elk onderskeidelik net 30 en 31 lopies afgestaan.
Jan Frylinck (1/31 in 8.4, 1 leeg teen 3.57), Lungameni (1/32 in 9.2), Picky Ya France (1/49 in 10) en Ruben Trumpelmann (2/48 in 10) het die besoekers gekasty. Die 13 wydlopers wat die Eagles-boulers afgestuur het, kan wel ’n bron van kommer wees.
Vir Hongkong het Pascoe (1/43 in10), Khan (1/58 in 7.4) en Murtasa (1/41 in 10) paaltjies gevat. Haroon Arshad het net drie balle geboul voor hy sy enkel beseer het. Hy het nie verder geboul nie en hul kaptein, Nizakat Khan, is vermoedelik met ’n gebreekte vinger van die veld af.
KOMENDE TOER
Gerhard Erasmus, kaptein van die Eagles, sê die inkomende Hongkong-besoek was belangrike voorbereiding vir die Namibiërs se volgende verpligting.
“Ons toer na Skotland is volgende, in die eendagformaat, waarin ons die afgelope maande minder aktief was. Die toestande was ook soortgelyk as wat ons in Skotland kan verwag, met koue weer en ’n kolfblad met bietjie meer gras op.
“Ek is heel gelukkig met die doelwitte wat ons tydens die afgelope toer kon bereik.
“Dit is verblydend dat Lo-han Louwrens met soveel lopies kon wys hy is op vorm en dat hy sy aanspraak versterk het om in die topdrie te kolf. In die veldwerk en boulwerk wou ons ook terugkeer na ons normale hoë standaarde en ek voel ons het dit reggekry.”
• Justin Kemp, hulpafrigter, sê die kolfvennootskap van Louwrens en Green was verblydend.
“Ons kolfwerk was klinies. Ons begin wys dat ons op ’n hoër vlak kan meeding. Daar is nog werk, maar ons beweeg in die regte rigting.
“Daar is nog beserings wat dopgehou moet word, waarvan JJ Smit moontlik die meeste kommer wek. Ons sal voorraad opneem en evalueer of sekere spelers ruskans nodig het.”
Nepal en Namibië is die twee besoekende spanne wat geskeduleer is om teen Skotland mee te ding (10 tot 17 Julie) in ’n driehoekige mini-toernooi wat deel van die Wêreldbeker Liga Twee-reeks (2019-2023) vorm.
VAN DIE VELD AF
Krieket Namibië het Vrydag ook ’n innoverende inisiatief bekend gestel om hom opnuut as waarskynlik dié toonaangewende administratiewe sportbeheerliggaam in die land te bewys.
Onder die leierskap van uitvoerende hoof Johan Muller is ’n inisiatief bekendgestel om waarde te voeg vir die sowat 28 korporatiewe maatskappye wat tans in formele hoedanigheid steun aan Namibiese krieket bied.
Die eerste rolbaldag by die Windhoek-klub is aangebied waar bande tussen hierdie korporatiewe entiteite en hul personeellede gesmee is wat ook vir elkeen van Krieket Namibië se borge en vennote van waarde van wees.
Muller sê: “Krieket Namibië is geseënd met ongelooflike steun van die sakegemeenskap in die land. Met behulp van hierdie gevestigde vennootskappe kon ons heelwat sukses beleef – op en van die veld, asook met ons ontwikkelingsprogramme.
“Tot nou het ons altyd blootstelling op verskeie platforms aan ons vennote gegee, maar ons het nog altyd gevoel ons kan meer doen.
“Hierdie inisiatief genaamd Corporate Cricket Community is geskep om waarde terug te gee waar dit saakmaak – deur sakekonneksies, vennootskappe, verhoogde verkoopsyfers, nuwe kliënte en dividende op beleggings.”
Die 23-jarige Lo-han Louwrens se bestendige kolfwerk as aanvangskolwer in die reeks teen Hongkong het sy aanspraak versterk op meer gereelde insluiting in die Namibiese nasionale krieketspan, die Richelieu Eagles.
Die voormalige Namibiese o.19-kaptein het die afgelope seisoene onder afrigter Pierre de Bruyn selde daarin geslaag om speelkans in die suksesvolle nasionale kombinasie af te dwing.
Louwrens het egter gister opnuut sy kleim afgesteek met ’n honderdtal in die derde en laaste internasionale eendagwedstryd teen die besoekende Hongkong.
Sy 111 lopies gister het sy talent verder ten toon gestel, nadat hy in die vorige twee wedstryde eers 54 van 77 balle en daarna 63 van 60 balle aangeteken het.
Al drie wedstryde is by Trustco United se veld gespeel, waar Louwrens die huidige eerstespankaptein is.
Saam met die ewe indrukwekkende Zane Green (60 van 68 balle, 9x4) het hy gister in ’n 150-lopievennootskap om die eerste paaltjie bygedra tot die Eagles (226 vir 3 in 38.4 boulbeurte) se suksesvolle lopiejaagtog om ook die laaste kragmeting van die Castle Lite-reeks teen Hongkong (224/7 in 50) te beklink.
Louwrens het uitstekend gekolf om sy 111 lopies van 115 aflewerings te slaan, wat nege viere en twee sesse ingesluit het.
As speler van die wedstryd was hy egter agterna heel beskeie.
“Ek dink dit was ’n baie goeie spanpoging en ek is bly dat ek kon bydra en dat ons kon wen. Dis beter as wanneer jy persoonlik lopies kry, maar die span verloor.
“Ons glo steeds ons is in staat om meer gereelde honderdtalle aan te teken as net die een in hierdie reeks.”
Louwrens is met ’n uitstekende aflewering van Ehsan Khan geflous en skoongeboul. Green is been voor paaltjie deur Yasim Murtaza betrap toe hy ’n veeghou wou speel.
Craig Williams op nommer drie (21 van 28 balle, 2x4, gevang Haroon Arshad, geboul Dan Pascoe), Shaun Fouché (23* van 18 b, 4x4) en Picky Ya France (4* van 4 b) het die Eagles se oorwinning afgerond.
Babar Hayat (35 lopies), Yasim Murtaza (68), Haroon Arshad (25), Dan Pascoe (32) en Ayush Shukla (24*) was gister saam 16 ekstras grootliks verantwoordelik vir Hongkong (224 vir 7 paaltjies in 50 boulbeurte) se telling teen 4.48 lopies per boulbeurt).
Die Hongkong-kolwers slaag daarin om 12 grenshoue na die tou te jaag en timmer vyf sesse vir 78 lopies. Die Eagles-kolwers ryg 25 viere en twee sesse in.
Die Namibiese boulaanval was opnuut ekonomies en het slegs tussen 3.42 (Tangeni Lungameni) en 5.16 lopies (Nicol Loftie-Eaton) per boulbeurt afgestaan.
Hoewel Ben Shikongo en Loftie-Eaton nie ’n paaltjie kon laat kantel nie, het die twee in ses boulbeurte elk onderskeidelik net 30 en 31 lopies afgestaan.
Jan Frylinck (1/31 in 8.4, 1 leeg teen 3.57), Lungameni (1/32 in 9.2), Picky Ya France (1/49 in 10) en Ruben Trumpelmann (2/48 in 10) het die besoekers gekasty. Die 13 wydlopers wat die Eagles-boulers afgestuur het, kan wel ’n bron van kommer wees.
Vir Hongkong het Pascoe (1/43 in10), Khan (1/58 in 7.4) en Murtasa (1/41 in 10) paaltjies gevat. Haroon Arshad het net drie balle geboul voor hy sy enkel beseer het. Hy het nie verder geboul nie en hul kaptein, Nizakat Khan, is vermoedelik met ’n gebreekte vinger van die veld af.
KOMENDE TOER
Gerhard Erasmus, kaptein van die Eagles, sê die inkomende Hongkong-besoek was belangrike voorbereiding vir die Namibiërs se volgende verpligting.
“Ons toer na Skotland is volgende, in die eendagformaat, waarin ons die afgelope maande minder aktief was. Die toestande was ook soortgelyk as wat ons in Skotland kan verwag, met koue weer en ’n kolfblad met bietjie meer gras op.
“Ek is heel gelukkig met die doelwitte wat ons tydens die afgelope toer kon bereik.
“Dit is verblydend dat Lo-han Louwrens met soveel lopies kon wys hy is op vorm en dat hy sy aanspraak versterk het om in die topdrie te kolf. In die veldwerk en boulwerk wou ons ook terugkeer na ons normale hoë standaarde en ek voel ons het dit reggekry.”
• Justin Kemp, hulpafrigter, sê die kolfvennootskap van Louwrens en Green was verblydend.
“Ons kolfwerk was klinies. Ons begin wys dat ons op ’n hoër vlak kan meeding. Daar is nog werk, maar ons beweeg in die regte rigting.
“Daar is nog beserings wat dopgehou moet word, waarvan JJ Smit moontlik die meeste kommer wek. Ons sal voorraad opneem en evalueer of sekere spelers ruskans nodig het.”
Nepal en Namibië is die twee besoekende spanne wat geskeduleer is om teen Skotland mee te ding (10 tot 17 Julie) in ’n driehoekige mini-toernooi wat deel van die Wêreldbeker Liga Twee-reeks (2019-2023) vorm.
VAN DIE VELD AF
Krieket Namibië het Vrydag ook ’n innoverende inisiatief bekend gestel om hom opnuut as waarskynlik dié toonaangewende administratiewe sportbeheerliggaam in die land te bewys.
Onder die leierskap van uitvoerende hoof Johan Muller is ’n inisiatief bekendgestel om waarde te voeg vir die sowat 28 korporatiewe maatskappye wat tans in formele hoedanigheid steun aan Namibiese krieket bied.
Die eerste rolbaldag by die Windhoek-klub is aangebied waar bande tussen hierdie korporatiewe entiteite en hul personeellede gesmee is wat ook vir elkeen van Krieket Namibië se borge en vennote van waarde van wees.
Muller sê: “Krieket Namibië is geseënd met ongelooflike steun van die sakegemeenskap in die land. Met behulp van hierdie gevestigde vennootskappe kon ons heelwat sukses beleef – op en van die veld, asook met ons ontwikkelingsprogramme.
“Tot nou het ons altyd blootstelling op verskeie platforms aan ons vennote gegee, maar ons het nog altyd gevoel ons kan meer doen.
“Hierdie inisiatief genaamd Corporate Cricket Community is geskep om waarde terug te gee waar dit saakmaak – deur sakekonneksies, vennootskappe, verhoogde verkoopsyfers, nuwe kliënte en dividende op beleggings.”
Kommentaar
Republikein
Geen kommentaar is op hierdie artikel gelaat nie