Looser veg in Alpe vir ryke UCI-punte-oes

’n Podium-posisie by ’n UCI Wêreldbeker-marathonbyeenkoms is die nuutste loopbaandeurbraak waarmee Vera Looser haarself in Italië verbaas het.Op die hoogste vlak van die sport se marathonkompetisies sal Sondag se prestasie haar na verwagting tot in die toptien ter wêreld laat opskiet.Die 29-jarige tweemalige Olimpiër het derde oor die eindstreep gery ná ’n “brutale” resies oor 100 kilometer met ’n kolossale 3 700 vertikale klimmeters in die westelike Alpe van Italië.Ná ’n moordende ses ure 00 minute 03 sekondes het Looser klaargemaak met net Duitsland se Adelheid Morath (5:55:31) en Bosnië se Lejla Njemčević (5:59:23) voor haar.Met die antieke Italiaanse dorpie Finalborgo as die beginpunt, het die roete elke denkbare oppervlak ingesluit op ’n gloeiende sonskyndag wat die ryers se fisieke grense nog verder getoets het.“Ek het dit eintlik baie geniet,” het die Namibiër agterna in haar reaksie gesê.“Teen die eerste klim uit het ek werklik net my eie pas gehandhaaf. Ek was toe seker so in die 15de posisie, maar ek het geweet dit sou nog ’n baie harde wedren word.“Ek het teen die afdraandes aangeval en van die vroue verbygesteek. Dit het gevoel of ek teen die opdraandes sterker en sterker word ... of miskien was dit bloot die ander ryers wat hul tempo begin verslap het.“Ek het daarin geslaag om steeds ’n konstante pas te handhaaf. In ’n stadium het vir Kim voor my gesien en dit het gevoel soos die ou tye,” met verwysing na Kim Le Court van Mauritius, die spanmaat saam met wie sy vroeër vanjaar die Absa Cape Epic gewen het.“Ek het ’n redelike ent saam met haar gery en teen die laaste steilte uit het ons by die voedingsarea die boodskap gekry dat die ryer in die derde posisie net 30 sekondes voor ons is.“Daar het ek my kans raakgesien en besluit om weer teen die volgende afdraand aan te val. Op die roete was dit ietwat riskante taktiek, maar dit het darem vrugte afgewerp.“Ek het die derde ryer (Estelle Morel van Frankryk, een van die topvyf gerekende vrouebergfietsryers ter wêreld) seker so een kilometer voor die eindstreep ingehaal en geweet ek kan vertroue in my naelresiesvermoë hê.“So eindig ek toe derde by ’n flippen Wêreldbeker! My heel eerste een, en dit nogal op so ’n brutale roete met soveel klimwerk, wat ek gereken het nie juis my sterkste punt is nie!“Dit lyk my ek moet my ingesteldheid verander en myself voortaan as ’n klimmer beskou!” het sy met ’n breë glimlag geskerts.Honderd-en-sestig punte op die UCI-wêreldranglys was Looser se beloning vir ’n vertoning waarin sy vir Morel met een sekonde geklop en ook onder meer kampioenryers soos Kim Le Court (6:01:14, vyfde), Janina Wüst van Switserland (6:04:14, sesde), Bettina Jannas van Duitsland, Amy Wakefield van Suid-¬Afrika en die Italianers Costanza Faslis en Debora Piana agter haar gelaat het.BEHOORLIKE SWAARKRYAdelheid Morath, Duitsland se 38-jarige gewese Olimpiese ryer wat met ’n vroeë wegbreek haar oorwinning ’n uitgemaakte saak gemaak het, het gesê: “Ek reken hierdie was die hardste wedren van my ganse loopbaan; dit was super-moeilik.“Iets soos drieduisend-sewehonderd klimmeters, maar plek-plek ook op baie tegniese terrein – wonderlike natuur¬skoon, maar ook baie steil en los en glyerig.“Op die eerste veldgedeelte was baie boomwortels en ’n bietjie nattigheid en daarna die laaste deel droog, steil en baie warm. Hierdie son het ons behoorlik laat swaarkry.“Ek het op die eerste klim ’n gaping probeer skep en ek het goed gevoel. Met omtrent 10 km in die resies het ek die voorsprong verkry en dit tot die einde behou. Dit was ongelooflik.“Dit beteken vir my baie dat ons nou ’n Wêreldbeker in marathonne het. Dis ’n groot tree, ook vir vrouebergfietsry. Dit beteken vir my baie; ek raak sommer emosioneel.“Vandag was ’n dag wat ek vir ’n leeftyd sal onthou.”Net 29 van die 36 internasionale vroueryers by die wegspringstreep het die volle afstand voltooi.Die laaste voltooier, Larissa Rossner van Switserland, het nét kort van nege ure aangehou spook.Die UCI Marathon-Wêreldbekerreeks hervat op 16 September met rondte drie aangebied in die Franse skivakansie-oorde Chatel, Les Gets and Morzine. Volgens Looser wil sy vir seker daar haar vordering in die reeks voortsit.MANSIn die mansresies oor dieselfde roete en afstand het Colombia se Diego Alfonso Arias Cuervo beïndruk met ’n oorwinning met een minuut 12 sekondes teen Martin Stosek (Tsjeggië) en Fabian Rabensteiner van Italië.Cuervo het agterna gesê hy reken hierdie oorwinning as die tweede belangrikste van sy loopbaan, ná die 2021-wêreldkampioenskap op die Italiaanse eiland Elba.– andrew@republikein.com.na

Looser veg in Alpe vir ryke UCI-punte-oes

Kommentaar

Republikein 2025-05-02

Meld asseblief aan om kommentaar te lewer

Looser veg in Alpe vir ryke UCI-punte-oes

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie