Kisting lei in triomf teen Kanada

Die waaghalsigheid met speeltyd verstreke om die wenpunte met ’n drie vir Helarius Kisting van ’n lynstaan af te skep, eerder as met ’n strafskop pale toe van die tienmeterlyn af, is beloon toe die Namibiese rugbyspan ’n historiese eerste oorwinning teen Kanada behaal het.

Die uitslag met 43-37 op ’n koue middag in Amsterdam sal na verwagting ’n ommeswaai bring in die twee lande se posisies op Wêreldrugby se ranglys, wat vandag op datum gebring word. Voor die afskop was Namibië 23ste en Kanada 21ste.

Selfs die mees geswore Namibiese patriot sou maar versigtig wees om vooraf dié sukses te voorspel, vanweë die gebrek aan toetsondervinding agterlangs in die afwesigheid van Divan Rossouw, Danco Burger, Gerswin Mouton, Chad Plato en die uitgetrede JC Greyling en Johann Tromp – om nie van die agttal sonder Torsten van Jaarsveld, Aranos Coetzee, Desiderius Sethie, Tjiuee Uanivi, Ruan Ludick en Janco Venter te praat nie.

Boonop het die Namibiërs dit vir hulself moeilik gemaak deur in die eerste helfte omtrent vier lynstane op ’n streep te verloor weens skewe ingooie, of teenspronge van Kanada. Belowende veldposisies is op dié manier prysgegee, wat Kanada dan terug op die aanval geplaas het. Die rolmaalbewegings was nietemin doeltreffend wanneer Louis van der Westhuizen wel sy springers kon vind.

Spelers soos Van der Westhuizen, Wian Conradie, Johan Retief en Janco Venter was betrokke toe die Namibiese o.20-span in 2014 met 37-25 teen Kanada by die Wêreldrugby o.20 Trofee-toernooi in Hongkong gewen het. Saterdag se oorwinning is nietemin Namibië se eerste sukses teen Kanada op toetsvlak, ná vorige nederlae in 1999 (met 72-11) en 2014 (met 17-13).

Om eerlik te wees, sou die Australiese skeidsregter Jordan Way ná Kanada se laaste suksesvolle strafdoel om met 37-36 voor te wees, die eindfluitjie kon blaas sonder dat ’n haan daaroor sou kraai, omdat speeltyd volgens die uitsending se horlosie inderdaad reeds verstreke was. Namibië het nietemin die kans vir een laaste afskop met mening aangegryp en sal uiteindelik dié sege onthou vir die waagmoed van die jeug – waarvan Kisting die toonbeeld was.

DIE VERLOOP

1 minuut: Kanada se heelagter Cooper Coats slaag met ’n strafdoel (0-3).

6 minute: Slot Adriaan Ludick druk Namibië se eerste drie ná ’n vinnige tikskop deur Helarius Kisting. Cliven Loubser verdoel (7-3).

10 minute: Kanada se haker Andrew Quattrin druk van ’n lynstaandryf. Coats verdoel (7-10).

17 minute: Kanada se flank Corey Thomas breek deur die agterlyn vir ’n drie. Coats verdoel (7-17).

22 minute: Agterlyn val aan en Loubser naby doellyn gekeer. Kisting, met ’n waaghalsige aangee aan ’n piepklein steelkant regs, stuurvleuel Warren Ludwig oor vir ’n onverdoelde drie in die hoek (12-17).

27 minute: Kanada stamp naby die doellyn tot Corey Thomas sy tweede gaan druk en Coats oorskop (12-24).

37 minute: ’n Rolskop laat Kanada omdraai om op die hoekvlag uitgedruk te word. Ludick wen die lynstaan en Van der Westhuizen druk van die maaldryf. Loubser verdoel (19-24).

39 minute: Namibië wen die afskop. Kisting skop hoog, Kanada laat die bal wip en Wian Conradie vorder tot in die kwartgebied. Senter Le Roux Malan en skiet ’n lang aangee na linkervleuel Darryl Wellman, wat een opponent klop en binnetoe gee vir Johan Deysel se drie. Loubser skop mis en dis rustyd 24-24.

48 minute: Haker Andrew Quattrin se tweede drie van lynstaandryf en Coats skop oor (24-31).

64 minute: Ná ’n lynstaan stamp plaasvervanger Adriaan Booysen in die middelveld. Plaasvervanger Damian Stevens (opgestuur in Cliven Loubser se plek, met Kisting nou losskakel) voer Le Roux Malan en Kisting en heelagter André van der Berg sny deur vir sy eerste toetsdrie. Kisting skop mis (29-31).

69 minute: Kanada dreig om ’n drie te druk, tot Coats ’n strafskop voor die pale kry en oorskop (29-34).

74 minute: Josh Larsen (Kanada-slot) kry die wedstryd se enigste geelkaart nadat ’n Namibiese maaldryf grond toe gaan.

76 minute: Louis van der Westhuizen se twee maaldryfdrie. Stevens verdoel (36-34).

79 minute: Taktiese skoppe heen en weer besorg Kanada ’n aanvallende lynstaan. ’n Oortreding op die grond volg en Coats se strafdoel seil oor (36-37).

81-84 minute: Kanada slaan die afskop aan. Skrum vir Namibië op die tienmeterlyn, wat twee keer hervorm moet word voor Namibië ’n strafskop kry. Kisting skop die bal op die regterhoekvlag uit. PJ van Lill wen die lynstaan en die maaldryf vorder. Namibië slaan vir nog vier fases op die doellyn met Deysel, Booysen, Van der Westhuizen en Jano Otto as baldraers na die linkerkant. Stevens gee uit na Kisting en met drie verdedigers voorhom, breek hy self en tol uit hul duikslae om oor te duik vir die drie wat Stevens verdoel (43-37).