Hinz: ‘Die wêreld onderskat Namibiërs’
Padfietsry
Melissa Hinz is reeds ’n tweemalige Namibiese tydtoetskampioen wat haar land vanjaar by die Afrika-kampioenskap in Ghana verteenwoordig het, maar haar fenomenale uitslag Sondag in die Tour de Brisbane in Australië het selfs vir haar stomgeslaan.
Die 37-jarige Windhoeker was algeheel tweede in die resies oor 110 kilometer en het ook haar ouderdomsklas gewen. Hiermee het sy gekwalifiseer vir die UCI Gran Fondo wêreldkampioenskap se 35-39 jaar vroueresies wat op 4 Augustus vanjaar in Glasgow, Skotland gehou word.
Die UCI Gran Fondo-reeks bied sowat 25 geleenthede wêreldwyd vir die sterkste fietsryers wat nie as professioneel gekontrakteer is nie, om by ’n wêreldkampioenskap teen hul eie ouderdomsgroep te jaag. Om hiervoor deur te dring, moes Hinz in Brisbane die podium haal.
Hinz het uit Brisbane aan die koerant vertel: “Al die vroueryers van 44 en jonger het in een groep begin. Die afstand was 110 km en in die laaste 20 km word Mount Coot-tha aangedurf – ’n klim van 2.2 kilometer lank met ’n 7.2% gradiënt. Dis gewoonlik waar die groep opbreek en die sterker ryers wegkom.
“Ek het geklou aan ’n baie vinnige eerste 30 km, en seker gemaak ek bly in die voorste groep.
“Die resies was van die begin af hard en aggressief. Van die vroue het spanmaats gehad wat kon help met aanvalswerk. En teen daai vinnige spoed moet mens honderde fietsryers verbysteek wat in die wegspringgroepe voor die vroue was. In totaal het 7 500 mense aan die Tour de Brisbane deelgeneem.
“Aan die bopunt van Mount Coot-tha het ek aangeval en gehoop en bid dit werk, want toe was daar nog so 10 tot 15 vroue oor. Ek het goed genoeg geklim en kom toe oor Mount Coot-tha tweede van alle vroue.
“Ek het my vinnigste afdraandresies ooit teen die berg af gedoen (76 km/h) en die laaste 10 km deur die ondergrondse tonnel tot die einde. Dit was nie nodig vir ’n ‘sprint finish’ nie, aangesien die eerste vrou (ouderdomsklas 30-34) toe reeds vier minute voor my was en my teenstanders 2 minute ná my klaargemaak het.”
Haar tyd was 3 ure ses minute 41 sekondes.
“Ek het vooraf gereken ek kon die top-10 in my ouderdomsgroep haal, maar het nie verwag om te wen nie. Geleenthede vir fietsry hier is eindeloos en die sportfasiliteite is uit die boeke!
“Maar een ding is ek seker van: ons Namibiërs word onderskat! Ons behoort baie goed te vaar teen die res van die wêreld in ons ouderdomsgroepe. Ek is amper 38 jaar oud en ry ‘elite’ in Namibië en Suid-Afrika.
“Die feit dat die UCI ’n geleentheid gee vir ouderdomsatlete om ook in ’n wêreldkampioenskap deel te neem, laat my besef ons is eintlik veel sterker as wat ons dink. Ons behoort onsself vir ’n slag net teen ons eie ouderdomsgroep te meet en ons as Namibiërs moet weet, ons staan ’n kans oor die waters!
“Dit was in Desember 2020 juis hier in Australië dat ek besluit het ek gaan triathlon laat vaar en kyk waar kom ek in fietsry. Dis vir my ’n spesiale oomblik om die wen hier in Brisbane te vat. Dit voel dat dis hier waar my fietsrydrome begin het.
“Die Aussies is baie vriendelik, behulpsaam en só aanmoedigend. Almal maak jou deel van alles.”
Die 37-jarige Windhoeker was algeheel tweede in die resies oor 110 kilometer en het ook haar ouderdomsklas gewen. Hiermee het sy gekwalifiseer vir die UCI Gran Fondo wêreldkampioenskap se 35-39 jaar vroueresies wat op 4 Augustus vanjaar in Glasgow, Skotland gehou word.
Die UCI Gran Fondo-reeks bied sowat 25 geleenthede wêreldwyd vir die sterkste fietsryers wat nie as professioneel gekontrakteer is nie, om by ’n wêreldkampioenskap teen hul eie ouderdomsgroep te jaag. Om hiervoor deur te dring, moes Hinz in Brisbane die podium haal.
Hinz het uit Brisbane aan die koerant vertel: “Al die vroueryers van 44 en jonger het in een groep begin. Die afstand was 110 km en in die laaste 20 km word Mount Coot-tha aangedurf – ’n klim van 2.2 kilometer lank met ’n 7.2% gradiënt. Dis gewoonlik waar die groep opbreek en die sterker ryers wegkom.
“Ek het geklou aan ’n baie vinnige eerste 30 km, en seker gemaak ek bly in die voorste groep.
“Die resies was van die begin af hard en aggressief. Van die vroue het spanmaats gehad wat kon help met aanvalswerk. En teen daai vinnige spoed moet mens honderde fietsryers verbysteek wat in die wegspringgroepe voor die vroue was. In totaal het 7 500 mense aan die Tour de Brisbane deelgeneem.
“Aan die bopunt van Mount Coot-tha het ek aangeval en gehoop en bid dit werk, want toe was daar nog so 10 tot 15 vroue oor. Ek het goed genoeg geklim en kom toe oor Mount Coot-tha tweede van alle vroue.
“Ek het my vinnigste afdraandresies ooit teen die berg af gedoen (76 km/h) en die laaste 10 km deur die ondergrondse tonnel tot die einde. Dit was nie nodig vir ’n ‘sprint finish’ nie, aangesien die eerste vrou (ouderdomsklas 30-34) toe reeds vier minute voor my was en my teenstanders 2 minute ná my klaargemaak het.”
Haar tyd was 3 ure ses minute 41 sekondes.
“Ek het vooraf gereken ek kon die top-10 in my ouderdomsgroep haal, maar het nie verwag om te wen nie. Geleenthede vir fietsry hier is eindeloos en die sportfasiliteite is uit die boeke!
“Maar een ding is ek seker van: ons Namibiërs word onderskat! Ons behoort baie goed te vaar teen die res van die wêreld in ons ouderdomsgroepe. Ek is amper 38 jaar oud en ry ‘elite’ in Namibië en Suid-Afrika.
“Die feit dat die UCI ’n geleentheid gee vir ouderdomsatlete om ook in ’n wêreldkampioenskap deel te neem, laat my besef ons is eintlik veel sterker as wat ons dink. Ons behoort onsself vir ’n slag net teen ons eie ouderdomsgroep te meet en ons as Namibiërs moet weet, ons staan ’n kans oor die waters!
“Dit was in Desember 2020 juis hier in Australië dat ek besluit het ek gaan triathlon laat vaar en kyk waar kom ek in fietsry. Dis vir my ’n spesiale oomblik om die wen hier in Brisbane te vat. Dit voel dat dis hier waar my fietsrydrome begin het.
“Die Aussies is baie vriendelik, behulpsaam en só aanmoedigend. Almal maak jou deel van alles.”
Kommentaar
Republikein
Geen kommentaar is op hierdie artikel gelaat nie