Gulde geleenthede nou voor Stormers, sê verheugde Kitshoff

Selfs al is dit nie die pot goud aan die einde van die reënboog nie, sê Steven Kitshoff, dit voel vir die Stormers “absoluut ongelooflik” om die Verenigde Rugbykampioenskap se Suid-Afrikaanse skild te kon wen.“Jy kon in die kleedkamer ná die wedstryd aanvoel hoe bly dit die ouens gemaak het. Daar is geweldig hard gewerk en opofferinge gemaak om tot hier te kom,” het die Stormers se kaptein ná hul oorwinning van 26-21 oor die Scarlets in Llanelli gesê.Die Stormers het met dié oorwinning seker gemaak dat hulle boaan die Suid-Afrikaanse groep en tweede op die algehele puntelys eindig. Indien die Stormers hul kwarteindstryd teen Edinburg wen, is hulle ook seker dat hul halfeindstryd in Kaapstad gespeel gaan word.Ons kan nou hierop voortbou en die foute regstel. Maar ek dink daar lê gulde geleenthede voor ons.Die skild is ook die eerste noemenswaardige silwerware wat Kaap toe kom sedert die Westelike Provinsie in 2017 die Curriebeker in Durban teen die Haaie verower het.Saterdag se kragmeting het as gevolg van alles wat op die spel was as’t ware soos ’n uitspeelstryd gevoel. Terwyl die Stormers daarna gestrewe het om die SA skild te wen en seker te maak dat hulle minstens in die kwarteindronde tuisveldvoordeel sal hê, kon die Scarlets met ’n wen seker maak dat hulle volgende seisoen in die Europese Kampioeneliga speel.“Dis die eerste stap. Met die uitspeelrondes voor ons het ons nou ’n voorsmakie daarvan gehad. Ons kan nou hierop voortbou en die foute regstel. Maar ek dink daar lê gulde geleenthede voor ons,” sê Kitshoff.John Dobson, die Stormers se afrigter, meen ook die wen van die skild is betekenisvol.“Om ná 18 wedstryde op hierdie vlak Suid-Afrika se beste span te wees, beteken baie vir die groep. Daar was die afgelope paar jaar soveel slegte nuus oor die WP in die media,” sê Dobson.“Dis ook goeie beloning vir merkwaardige mense soos Steven Kitshoff, Scarra Ntubeni, Frans Malherbe, Damian Willemse en Salmaan Moerat, wat in moeilike tye lojaal aan die unie gebly het.“Wat goed is, is dat die ouens selfs met die skild in die kleedkamer die ingesteldheid gehad het dat daar baie belangrike weke voorlê. Daar’s geensins ’n gevoel dat dinge afgehandel is nie.”Kitshoff was ook baie bly dat die Stormers in vyandige toestande in Wallis kon wen.“Daar was geweldig baie druk. Die Scarlets het baie gehad om voor te speel en dit gewys. Die skare was bankvas agter hulle en die druk het oor die 80 minute net al hoe erger geraak,” sê hy.“Ek is ongelooflik trots op hoe die ouens daardie druk verwelkom en tot ons guns aangewend het. Ons het daarin geslaag om ons plan op hulle af te dwing.”Terwyl die Stormers die noemenswaardige voordeel sal hê dat hul kwarteindstryd teen Edinburg in Kaapstad gespeel sal word, wys Kitshoff daarop dat “enigiets” in uitspeelrugby kan gebeur.“Dis die bekoring daarvan. Om tuisveldvoordeel in ’n kwarteindstryd te hê maak die eerste stap seker ’n bietjie makliker. Maar die aard van uitspeelrugby is uniek. Dit kan neerkom op een beslissing teen jou, dalk ’n strafskop dat jy nie wegrol nie, en dan verloor jy met ’n punt. Jy moet vir 80 minute op jou beste wees.” – Netwerk24

Gulde geleenthede nou voor Stormers, sê verheugde Kitshoff

Kommentaar

Republikein 2025-11-05

Meld asseblief aan om kommentaar te lewer

Gulde geleenthede nou voor Stormers, sê verheugde Kitshoff

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.