Gesoek: Vroue vir die renbaan

Ondanks wêreldwye pogings om meer vroue by motorsport te betrek en jong meisies in Namibië se klaarblyklike belangstelling om hieraan deel te neem, is daar iewers ’n kinkel in die kabel, meen Derek Jacobs, die sekretaris-generaal van die Namibiese Motorsportfederasie (NMSF). Hierdie is ’n sentiment wat die Internasionale Motorsportfederasie (FIA) klaarblyklik deel. Die FIA sê op sy webtuiste: “As ’n aktiwiteit wat grootliks brute liggaamlike krag opsy skuif ten gunste van denke en daad, is motorsport van nature ’n gelykmaker in die sportwêreld – ’n dissipline wat ideaal blind is teenoor ras, kleur, geloof of inderdaad geslag. “Die werklikheid is egter dat motorsport tradisioneel gesien is as ’n soort ‘seunsklub’ – ’n arena waar vroue dikwels uitgestoot is en soms aktief van deelname ontmoedig is.” Gevolglik is ’n kommissie onder die FIA gestig wat die belange van vroue in motorsport moet bevorder en ingespan sal word om meer vroue aan dié sport bloot te stel.Die kommissie bestaan uit Michèle Mouton (naaswenner van die Wêreldtydrenkampioenskap in 1982); Susie Wolff (uitvoerende direkteur van die Formule Akademie-vrouereeks); Tatiana Calderon (’n ontwikkelingsrenjaer vir die Alfa Romeo Sauber Formule Een-span); Jutta Kleinschmidt (die 2001-wenner van die Dakar-tydren); Leena Gade (die eerste vroulike reningenieur wat die Le Mans 24-uurtydren gewen het) en Silvia Bellot (’n Spaanse wedrenbeampte en ambassadeur van die FIA-kommissie vir vroue in motorsport). Oor die afgelope 14 jaar het die kommissie reeds verskeie programme van stapel gestuur wat die doelwit najaag wat die FIA vir hulle uitgestippel het, naamlik om aan vroue te demonstreer dat hulle deur die hoogste gesag in motorsport erken word. Die merkwaardigste van dié programme is die F1 Akademie, ’n vrouereeks wat beoog om ontluikende jong talentvolles die blootstelling en ervaring te gee om in motorsport uit te blink. Hierbenewens het die Girls On Track-program ten doel om hulle potensiaal te help ontwikkel en hulle ’n stewige grondslag te gee waarop hulle hul loopbane in motorsport kan bou. IN NAMIBIËAs deel van sy strewe om jong meisies wêreldwyd te betrek, het die FIA deur die NMSF onlangs die Girls on Track-program in Namibië bekend gestel. Die program, wat net een dag neem, bied meisies die kans om teoretiese kennis op te doen oor verskeie soorte rensport en loopbane in motorsport, asook opleiding op gebiede soos media. Tydens die middagsessie kan meisies self gas gee op die baan. Oor sy ervaring tydens die eerste Girls on Track-sessie vertel Jacobs: “Wat Namibië betref, is daar tans 20 plekke per sessie beskikbaar, wat ons sonder enige moeite vul. Die uitdaging is dat baie van die meisies wat sover opgedaag het, bloot daar was omdat hul ouers hulle gestuur het. Van hulle het geen benul gehad van wat daar aangaan nie. Nietemin het dit goed uitgewerk. Die FIA het vooraf aangedui dat dit kan gebeur.“Daar was wel ’n paar meisies wat duidelik reeds ernstig en lief is vir motorsport,” het hy gesê. “Van die meisies wat aan die Girls on Track-program deelgeneem het, se ouers was of is steeds by motorsport betrokke – hulle is die belangstellendes en die gretiges. Ons moet ’n manier kry om die res te bereik. “As deel hiervan en van die federasie se mandaat, hoop ons om motorsport te desentraliseer, so ons gaan oraloor die land meeding en Girls on Track na die res van Namibië neem.”Die volgende Girls on Track-sessie sal vanaf 25 tot 28 Oktober as deel van die Namibiese Sport-ekspo in Swakopmund aangebied word. Hier sal drie groepe (60 meisies) kan deelneem. Later sal die NMSF ook die program in Gobabis en Tsumeb aanbied en daarna Girls on Track na die suidelike dele van die land neem. STREWE OM UIT TE BREIJacobs sê: “Die vraag is of daar meer meisies is wat in motorsport belangstel. Indien wel, hoe bereik ons hulle? Ek weet finansies speel ’n baie groot rol en mense weet nie waar om te begin nie. Baie mense is onbewus en verras om te hoor dat die NMSF ’n kantoor en ’n voltydse administrateur het.”Jacobs hoop vroue wat ná ’n toetslopie besluit motorsport is nie vir hulle nie, hoef nie die finansiële opoffering te maak nie. “Motorsport is duur, maar ons wil ook nie hê dit moet mense afskrik wanneer hulle al daardie geld bestee en nie die resultate kry waarop hulle gereken het nie,” het hy gesê. Hy deel ’n staaltjie oor ’n jong spoedvraat wat met groot entoesiasme opgedaag het. “Sy het gesê sy wil dit op ’n veilige manier doen en ek het haar na ’n resies genooi en haar vir ’n rit geneem in die veiligheidsmotor toe ek die baan-inspeksie gedoen het. Ek dink haar wil om aan wedrenne deel te neem, het daar vervaag; ek kon sien sy was onseker,” het hy gesê. Jacobs beklemtoon die geleenthede is volop vir vroue wat nie noodwendig spoedvrate is nie, om betrokke te bly. “Daar is talle posisies beskikbaar vir mense wat nie self aan wedrenne deelneem nie. Die meeste vroue in motorsport in Namibië beklee amptelike posisies,” het hy gesê.Hy meen die gebrek aan vroue wat meeding, is ’n algemene verskynsel in motorsport. “Ons het onlangs ’n Dirt 2.0-tydrenkampioenskap begin. Ons het reeds twee van die twaalf byeenkomste afgehandel. Onder die twintig mededingers is daar nie ’n enkele vrou nie,” het hy gesê. MOTORSPORT EN PADVEILIGHEIDSelfs in e-sport sien Jacobs steeds ’n gaping tussen die twee geslagte se deelname.“Ons het onlangs ’n wedren-simulasie-uitdaging gehad en nie een van die twintig mededingers in ’n kampioenskap van tien rondtes was ’n vrou nie,” het hy gesê. Jacobs hou vol daar is ’n plek vir vroue in motorsport in Namibië en sê die NMSF het ’n aangewese verteenwoordiger vir vroue in motorsport, Geraldine Naude. “Ons glo motorsport en padveiligheid gaan hand aan hand en dis sigbaar in die feit dat die AA (motorvereniging) van Namibië ’n lid van die FIA is. Ons glo ’n vrou bestuur beter wanneer sy blootgestel is aan motorsport en ons glo dit het ’n oorloop-effek op ander vroue,” het Jacobs gesê.“Ek wil graag weet of daar vroue in Namibië is wat in motorsport belangstel en, indien daar is, wat hou hulle terug?”– irene@republikein.com.naKITSFEITE&bull; Michéle Mouton van Frankryk is die eerste vrou wat ’n resies in die Wêreldtydrenkampioenskap-reeks gewen het. Sy het die kampioenskap daardie jaar (1982) met twee punte misgeloop. &bull; Susie Wolff van Skotland is die laaste vrouerenjaer wat in ’n F1-naweek betrokke was toe sy in 2014 aan oefensessies vir die Britse en Duitse Grand Prix deelgeneem het. &bull; Susie Wolff is in 2011 met die spanhoof van die Mercedes AMG Petronas F1-span getroud. &bull; Desiré Wilson het in 1982 aan die Suid-Afrikaanse Grand Prix deelgeneem, maar weens omstredenheid tussen die Fédération Internationale du Sport Automobile (FISA) en die Formule Een Vervaardigersvereniging (FOCA) het die byeenkoms nie deel van die kampioenskap gevorm nie. &bull; Die dokumentêre film oor Michèle Mouton se loopbaan, Queen of Speed, het ’n Emmy-toekenning vir die beste sportdokumentêr verower.

Gesoek: Vroue vir die renbaan

Kommentaar

Republikein 2025-11-04

Meld asseblief aan om kommentaar te lewer

Gesoek: Vroue vir die renbaan

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.