Eagles in gedugte eenheid gesmee

Die Richelieu Eagles speel vanoggend teen Nederland in hul tweede kwalifiserende groep A-wedstryd vir die T20 Wêreldbeker-kriekettoernooi in Australië gespeel. Donderdag kom hulle vanaf 10:00 (Namibiese tyd) teen die Verenigde Arabiese Emirate in hul laaste groep A-kragmeting te staan, wat die samestelling van die Super-12 fase van die toernooi behoort te bepaal.Die Namibiërs is sterk geplaas om soos in hul debuut verlede jaar hul deelname aan die hoofkompetisie te verseker, wat (minstens) nog vyf wedstryde teen die sport se bestes sal verseker.Hul roemryke sege teen Sri Lanka en die daaropvolgende uitslae in ander wedstryde het behoorlik die kat in die duiwehok losgelaat en die tafel gedek vir ’n hoogs opwindende en onvoorspelbare toernooi.Pierre de Bruyn, hoofafrigter van Namibië, is gister op ’n nuuskonferensie deur die internasionale media oor die Eagles se suksesverhaal sover en hul pad vorentoe uitgevra.“Om ’n span se kultuur te transformeer, is ’n reis en dit neem tyd om te vestig. Toe ek in 2019 die afrigting oorgeneem het, het ek onmiddellik die areas geïdentifiseer wat aandag moes kry.“Ons moes ’n sterk fondasie en ’n sterk kultuur hê om te kan presteer. Ek as afrigter het saam met die spelers besluit om die waardes van die span te bepaal en waarvolgens ons gaan leef. Dis nou amper vier jaar later en kyk waar is die Eagles vandag.”“Die waardes waarin ons glo en uitleef soos trots, onselfsugtigheid, inspirasie, respek en durf is die grootste wat ons teen Sri Lanka op die veld gesien het. Dit is ons leuse.“Ek het van die begin af geweet dit sou tyd vat om die kultuur aan te neem en daarin te glo. Maar dit was ’n genotvolle reis om dit bymekaar te sit. “As ek die spelers se vaardighede nou met dié van 2019 moet vergelyk, is dit eenvoudige fantasties hoe hulle as ’n groep gegroei en ontwikkel het. Dit het veel harder werk gekos, maar ek weet dat ons nog kan verbeter.“Daar is verskeie afrigters wie ’n rol in die Eagles se ontwikkeling gespeel het. Die spelers is altyd bereid om baie op te offer en hard te werk en hulle het van die begin af geweet dit gaan baie sweet kos om te verbeter.”OMMEKEERTwaalf maande gelede het Sri Lanka die Namibiese span ’n warm verlkoming gegee deur hulle vir net 95 lopies uit te boul en met sewe paaltjies te wen. De Bruyn sê dit was Sondag ’n plesier om te sien waar die Eagles se vlak van selfvertroue en veggees nou staan. “Ek en Albie Morkel was vir baie jare spanmaats en ek het geweet hy is die regte kolfafrigter om my by die Eagles by te staan. Albie glo in dieselfde standaarde as ek en al is hy nie voltyds by ons betrokke nie, was hy nog altyd deel van die reis en het ’n massiewe rol gespeel.“In Mei vanjaar het ek Morné Morkel as boulafrigter betrek. Die feit dat hy in Australië bly en sy ondervinding as naatbouler op die topvlak maak hom ’n uitstekende boulafrigter.“Sy eerste invloed was reeds te bespeur toe ons die T20-reeks in Zimbabwe gewen het. Sy insette is van kardinale belang en sy impak op die boulers kan nie gemeet word nie.“Dan is daar ook Justin Kemp (nog ’n uitgetrede Protea) wat nie nou hier is nie, maar wat my as hulpafrigter in Namibië bygestaan het. Ek het ’n fantastiese span rondom my gehad wie ek geglo het is die regte mense om my te help. “Sonder die ondersteuningspersoneel soos die spandokter (Rudie van Vuuren), fisioterapeut (Kara Scheepers), tegniese video-ontleder (Riaan Minnie) en spanbestuurder (Hestelle Haccou) sou dit nie moontlik gewees het nie. Hierdie mense was eenvoudig manjifiek in hul onderskeie rolle en ek waardeer hulle ongelooflik.“Ons moet nederig bly, daar is nog baie krieket wat by die Wêreldbeker gespeel moet word. Sukses is nie gewaarborg nie; dit werk nie so in krieket nie. “Elke dag is ’n nuwe dag en ’n nuwe wedstryd en ons as ’n groep sal geen selfvoldaanheid of gemaksig duld nie. Groep A is steeds wyd oop vir drie spanne om moontlik op 4 punte ná drie wedstryde te eindig. “Ons is ten volle bewus dat die sege teen Sri Lanka ’n historiese oomblik was, maar die uitslag is reeds iets van die verlede. Die span moet vinnig aanbeweeg om op die volgende uitdaging te konsentreer. “Die Eagles is vegters met groot harte. Hulle sal nooit moed opgee of gaan lê nie. Die vertoning teen Sri Lanka is ’n opsomming wie en wat die Eagles is. “Ons respekteer altyd die span teen wie Namibië speel, maar dit gaan oor geestelike taaiheid, deursettingsvermoë, dissipline, selfvertroue en die geloof in mekaar. Hierdie spelers sal vir mekaar deur die vuur loop. Hulle is eenvoudig ongelooflike mense,” het De Bruyn verduidelik.&bull; Gister se uitslae: Skotland (160/5) klop Wes-Indië (118 almal uit) met 42 lopies; Zimbabwe (174/7) klop Ierland (143/9) met 31 lopies.

Eagles in gedugte eenheid gesmee

Kommentaar

Republikein 2026-01-28

Meld asseblief aan om kommentaar te lewer

Eagles in gedugte eenheid gesmee

Kommentaar

Republikein 2026-01-28

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.