Driekuns vir Nande in Namibiese Ope

Likius Nande het ná ’n paar maande se wegbreek van die sport teruggekeer en laas naweek vir die vyfde keer die FNB Namibiese Ope gholfkampioenskap by die Rössmund-baan by Swakopmund ingepalm.Die gebore Swakopmunder het sy vorige Namibiese Ope-titels in 2017, 2018, 2021 asook verlede jaar gewen.“Sedert verlede jaar se oorwinning by die Windhoek Buiteklub het ek eintlik geen toernooie tot in April vanjaar gespeel nie. Sedert my terugkeer het ek nou drie uit drie toernooie gewen met ’n gemiddeld van een hou onder die baansyfer,” sê Nande, wat positief is oor sy kanse om voor die einde van die jaar terug in die nasionale span te wees.Die 2023 Namibiese Ope is vir die eerste keer gesamentlik onder die vaandel van drie beheerliggame gehou, naamlik die Namibië Amateur-gholfunie (NAGU), die Namibië Amateur-vrouegholfunie (NALGU) en die Namibië Junior Gholfstigting. By die prysuitdeling het die toernooidirekteur en president van NAGU, Marco Swarts, ook die Namibië-manspan aangekondig wat dié week na Malawi reis om in die Streek 5-kampioenskap teen agt ander nasies mee te ding, naamlik Edwin Kutara (kaptein), Walter Heibeb, Stephanus Bonifatius en die nuweling Todd Parker. Ná sy onlangse terugkeer tot aksie het Nande hom nog nie weer tot in die topdrie op die nasionale merietelys opgewerk nie en vandaar sy afwesigheid. ’n Volledige veld van 82 spelers het in die medalje-formaat in alle kategorieë by Rössmund meegeding, wat verskeie vorige kampioene sowel as ontluikende jong gholftalent ingesluit het.Saterdagoggend se weer was perfek vir gholf. Nande en Neil Theron het beide hul eerste rondte op 71 houe (een onder baansyfer) voltooi. In sy tweede rondte het Nande dit reggekry om sy voet op die pedaal te hou met nog ’n 1-onder-syfer 71, ewe veel as sy ou mededinger Stephanus Bonifatius (71). Die dag het egter aan Likius behoort en hy het Sondag met ’n voorsprong van agt houe begin. Sondag se weerstoestande het die baan ’n heel nuwe voorkoms gegee – koud, bewolk en nat met ’n sterk noordwestewind. Nande het sy laaste rondte met 73 afgesluit terwyl Fritz Coetzee met ’n puik 72 bruto die klubhuis bereik het om homself tussen die pryswenners te plaas. In die B-afdeling was Mario Polster die voorloper ná dag 1 met 170 bruto, terwyl Heinrich Schmidt met 82 die beste Sondag-rondte gelewer het.In die vrouekompetisie was Wilmari Woest (78) die voorloper ná dag een en het ondanks Wilna Bredenhann se beter laaste rondte (83) vasgebyt om die titel in te palm.In ’n mededingende stryd tussen twee uitstekende junior vooruitsigte was Kyle Johnson (156) ná die eerste dag met een hou voor Todd Parker, maar laasgenoemde se 75 op die laaste dag het hom die junior afdeling besorg.Pryse vir die houe naaste aan die pen is ingepalm deur Kevin Wentzel (putjie 3), Claude Abrahams (putjie 7), Edwin Kutara (putjie 12) en Joseph Martin (putjie 16).Pryse was ook op die spel vir die langste dryfhou op die 18de putjie, wat deur Fritz Coetzee (lae voorgeë) en Steven Johns (hoë voorgeë) gewen is.Swarts het FNB geloof vir sy volgehoue steun aan dié gesogte geleentheid en dat hy Castle Lite toegelaat het om as medeborg aan boord te kom – met wonderlike pryse asook geskenke aan al die spelers. Die FNB-verteenwoordiger Eugene Cloete (takbestuurder op Swakopmund) het by die prysuitdeling waargeneem, saam met Chantelle Tap en Clarence Visagie van Castle Lite. Rössmund se klubkaptein, George Murusiki, het gesê sonder die borge sou die toernooi nie moontlik gewees het of vir almal so ’n wonderlike naweek van gholf kon verskaf nie.Die voorste uitslae:Algehele bruto wenner en 2023 Namibiese Ope-kampioen: 1 Likius Nande (215); 2 Fritz Coetzee (227, uittel).Algehele beste netto: 1 Hans Naobeb (216); 2 George Murasiki (217).A-afdeling: 1 Stephanus Bonifatius (227); 2 McPaul Ndeilenga (232, uittel). Beste netto: 1 Walter Heibeb (220); 2 Douw van Wyk 224. B-afdeling: Dennis Haimbondi (251); 2 Johan Swanepoel (261). Beste netto: 1 Helmut Ndjendja (223); 2 Charles Haoseb (230 uittel).C-afdeling: 1 Clive Lawrence (177); 2 Bertie Saunderson (182). Beste netto: Lester Hess (131); 2 Kevin Zhang (146).Vroue-afdeling 2023 Namibiese Ope kampioen: 1 Wilmari Woest (162); 2 Wilna Bredenhann (169). Algeheel beste netto: 1 Tiekie de Wet (149 uittel); 2 Mariena Ludwig (149).Vroue B-afdeling: 1 Ruanda de Beer (190). Beste netto: Dina Holtzhausen (163).Vroue C-afdeling: 1 Rina Knight (200). Beste netto: Suene Venter (165).Junior wenner: 1 Todd Parker (232); 2 Kyle Johnson (235). Beste netto: 1 Wensley Haseb (244); 2 Nelson Johannes (245).

Driekuns vir Nande in Namibiese Ope

Kommentaar

Republikein 2026-02-04

Meld asseblief aan om kommentaar te lewer

Driekuns vir Nande in Namibiese Ope

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.