De Sousa maak terugkeer in span na Mauritius

Met die land se drie vinnigste vrouenaellopers almal op die krukkelys en besig met rehabilitasie, is dit veel minder voorspelbaar wie die moontlike medaljekandidate kan wees by die senior Afrika-atletiekkampioenskap wat volgende week in Mauritius plaasvind.Jolene Jacobs asook die 2021 Olimpiese finaliste Christine Mboma en Beatrice Masilingi was almal buite rekening vir Atletiek Namibië se span en sal dus afwesig wees by die kontinentale spoggeleentheid van 8 tot 12 Junie.Van die finale spanlede is die 38-jarige veteraan driesprongatleet Roger Haitengi die enigste wat tevore ’n medalje by die Afrika-kampioenskap kon wen – toe hy in 2014 in Marrakesj die brons ingepalm het met sy beste van 16.72 meter wat destyds die nasionale rekord was. Hy het die rekord twee jaar later in Johannesburg tot 16.78 verder gedruk.Afgesien van die individuele items sal veral die Namibiese 4x400 manskombinasie ook die ambisie koester om die uitdunrondtes te oorleef en moontlik tot die eindwedloop deur te dring.DE SOUSA’n Opvallende naam op die vrouelys is Sadé de Sousa – wat tevore met haar prestasies as skoolmeisie as een van die land se volgende groot vooruitsigte geoormerk is.De Sousa het egter grootliks van die toneel verdwyn ná haar opspraakwekkende deurbraakseisoen in 2017. Sy het vanaf Windhoek Gimnasium na ’n sportskool in Pretoria aanbeweeg, voordat sy die afgelope jare in die VSA se “ander” Las Vegas (New Mexico) begin studeer het.De Sousa (nou 22) het in Aprilmaand in Albuquerque en in Canyon (Texas) beide kere met ’n wind van agter ( 2.3 en 2.1 meter per sekondes) met heel belowende tye van 12.03 en 12.02 vorendag gekom – nadat die vorige jaar se atletiekseisoen in Amerika vanweë Covid-inperkings redelik gekortwiek was.Voordat die Namibiese span komende Maandagoggend uit Windhoek vertrek, sal Atletiek Namibië vandag eers borgskappe vir die span na die Afrika-kampioenskap deur Namdia en FNB Namibia in ontvangs neem.Atletiek Namibië se span:MANS (nege)Mahmad Bock (400 en aflos) seisoensbeste 45.80.David Dam (800, aflosse) seisoensbeste 1:48.63.Ivan Danny Geldenhuys (400, 200, aflosse) seisoensbeste 46.55.Warren Goreseb (aflosse) seisoensbeste 47.06.Gilbert Hainuca (100, 200, aflosse) seisoensbeste 10.36.Roger Haitengi (driesprong) seisoensbeste 15.93.Ernst Narib (100, 200, aflosse) seisoensbeste 21.47.André Retief (400, 400 hekkies, aflosse) seisoensbeste 46.17.Ryan Williams (diskusgooi) seisoensbeste 55.30.VROUE (ses)Sadé de Sousa (100, aflosse) seisoensbeste 12.75.Mudi-Inosensia Haingura (400, aflosse) seisoensbeste 60.98.Ndawana Haitembu (aflosse) seisoensbeste 12.32 en 25.85.Ané Rautenbach (200, 400, aflosse) seisoensbeste 23.57 en 53.86.Tuané Silver (gewigstoot) seisoensbeste 15.24.Nandi Vass (400, aflosse) seisoensbeste 57.23.Die groep word vergesel deur mnre. Modestus Mwiila (missiehoof), Letu Hamhola (afrigter vir aflosse), Henk Botha (afrigter vir naellope en middelafstande) en me. Julia Halweendo (mediese beampte).

De Sousa maak terugkeer in span na Mauritius

Kommentaar

Republikein 2025-11-05

Meld asseblief aan om kommentaar te lewer

De Sousa maak terugkeer in span na Mauritius

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.