Dam hoop om by elite-groep aan te sluit

Die 23-jarige middelafstandatleet David Dam is gister in Windhoek deur Namdia met N$50 000 geseën om vandeesweek na Suid-Afrika te vertrek waar hy aan drie byeenkomste sal deelneem.Dam, afkomstig van Omaruru, word deur Bethold Karumendu vir die 800 en 1 500 meter afgerig. Karumendu glo sy atleet beskik oor die vermoë om vir groot byeenkomste soos die Statebondspele in Birmingham en die senior Afrika-kampioenskap in Mauritius (8 tot 12 Junie) te kwalifiseer.Karumendu het aan Republikein gesê: “Ons sien uit om in Suid-Afrika deel te neem. Ons sal vir die volgende twee weke in Potchefstroom bly waar die eerste Kontinentale Toer Grand Prix-byeenkoms reeds Woensdag plaasvind. David sal daar net in die 800 hardloop. “Komende Saterdag is ons in Germiston vir die Sentraal-Gauteng senior kampioenskap waar hy aan die 1 500 gaan deelneem. Germiston is op 13 April weer aan die beurt vir die tweede Grand Prix en David sal die keer vir die 800 sal aantree.“Ons is verheug oor Namdia se borgskap, wat dié droom van my en David moontlik gemaak het. Namdia dek al ons uitgawes in Suid-Afrika en dis ’n teken van waardering van hul kant. Ek en David bedank Namdia uit ons harte vir hul ondersteuning.” Dam sal egter nog heelwat sekondes van sy beste tye vir beide dissiplines moet afkerf. In die 1 500 wat sy hoofitem is, sal hy in die drie-en-’n-driekwart baanrondtes met 18 sekondes moet verbeter op sy persoonlike beste van 3 minute 56.61 sekondes. Die vereiste merk vir die Afrika-kampioenskap is minder as 3:39.00.Sy vorige tye sover dié seisoen is 3:56.93 op Swakopmund, 4:01.13 in Windhoek en 3:58.20 op Oshakati. In die 800 het hy vanjaar 1:54.27 (Windhoek), 1:53.38 (Rietfontein), 1:52.13 (Oshakati) en 1:53.13 (Windhoek, 2 April) behaal. Hy moet onder 1:47.30 draai om vir Mauritius te kwalifiseer. &bull; Tot nou het nog net ’n klein groepie Namibiese atlete reeds vir die Afrika-kampioenskap gekwalifiseer, naamlik:Vroue: Christine Mboma en Beatrice Masilingi (100 en 200 m) en moontlik nog twee in die 4x100 aflos, Ané Rautenbach (100, 200 en 400), Tuané Silver (gewigstoot).Mans: Gilbert Hainuca (100 en 200), Ernst Narib (200), Ivan Danny Geldenhuys (400), Ryan Williams (diskusgooi), Roger Haitengi (driesprong).&bull; André Retief, wat in beide die 400 en 400-hekkies naby aan die kwalifiserende merke is, vertrek ook dié week saam met sy afrigter Leoni van Rensburg om aan dieselfde reeks byeenkomste in Gauteng te gaan deelneem. Die afsnydatum vir kwalifisering vir Mauritius is einde April.AFRIKA-KAMPIOENSKAP, KWALIFISERENDE STANDAARDE100 meter: Vroue 11.94 sekondes, mans 10.44 s. 200: Vroue 24.24 s, mans 21.24 s. 400: Vroue 54.74 s, mans 46.64 s. 800: Vroue 2 minute 6 sekondes, mans 1 m 47.30 s. 1 500: Vroue 4 m 21 s, mans 3 m 39 s. 5 000: Vroue 16 m 18 s, mans 13 m 30 s. 10 000: Vroue 35 m 20 s, mans 28 m 38 s. 100-hekkies vroue: 14.00 s. 110-hekkies mans: 14.00 s. 400-hekkies: Vroue 59.50 s, mans 50.80 s. 4x100 m-aflos: Vroue 45.50 s, mans 39.50 s. 4x400 m-aflos: Vroue 3 m 39 s, mans 3 m 04.50 s. Hoogspring: Vroue 1.75 meter, mans 2.12 m. Verspring: Vroue 6.15 m, mans 7.80 m. Driesprong: Vroue 13 m, mans 16 m. Gewigstoot: Vroue 14.90 m, mans 16.80 m. Spiesgooi: Vroue 49 m, mans 69 m. Diskusgooi: Vroue 49 m, mans 53.50 m. – tielman@republikein.com.na

Dam hoop om by elite-groep aan te sluit

Kommentaar

Republikein 2026-02-04

Meld asseblief aan om kommentaar te lewer

Dam hoop om by elite-groep aan te sluit

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.