Cheetahs se oog op weerstoestande in Wallis

Slegs indien die speeltoestande dit toelaat, sal die Cheetahs hou by die plan waarmee hulle in die vorige wedstryd teen die Scarlets mooi teruggeveg het.

Die spanne is Vrydagaand in Llanelli in ’n herontmoeting in die Europese Uitdaagbeker-reeks slaags.

Die Walliesers het verlede maand se wedstryd teen die Cheetahs met 45-26 in Parma gewen nadat hulle rustyd gerieflik met 38-7 voorgeloop het.

Hawies Fourie, die Vrystaters se afrigter, sê afhangende van die weer, sal hulle sake soos in die tweede helfte van die Parma-wedstryd benader.

Dit het die laaste paar dae behoorlik gereën in Wallis.

Fourie sê dit het Woensdagmiddag begin reën en dat dit na verwagting teen Vrydagoggend sou ophou.

“Hopelik is die voorspellings in die kol sodat ons ordentlike rugby kan speel. Maar ons vat dit soos dit kom. Ons het ander planne in plek as dit nat is.”

Fourie sê hulle het in die eerste wedstryd teen die Scarlets ’n swak 15 minute in die middel van eerste helfte gehad waarin hulle sagte drieë afgestaan het.

“Ons het toe met rustyd besluit om ’n bietjie meer aan te val en besit te behou eerder as om dit terug te skop. As die toestande ons toelaat, sal ons by daardie plan hou.”

Fourie sê hul verdediging sal baie skerp moet wees.

Hy sê hulle moet hard werk om in posisie te bly en verdedigers in plek te hê omdat die Scarlets op die aanval die bal ook baie goed in die hand kan hou.

Fourie sê die onoorwonne Scarlets, wat tans die groepvoorlopers is, sal uiteraard tuis gevaarliker wees.

Hy wys daarop dat hulle ’n paar wenne in die Verenigde Rugbykampioenskap agter die rug het sedert die wedstryd in Parma. Hy sê die Scarlets het net teen die Ospreys verloor toe hulle vroeg ’n rooi kaart gekry. Hulle het die Dragons en Cardiff daarna geklop.

Die Cheetahs het nie die luukse gehad nie.

Fourie sê hulle kan met vyf punte in hul volgende twee wedstryde vir die reeks se volgende fase kwalifiseer.

Die Cheetahs se span toon ses veranderinge van die een wat laas die wedstryd in Parma begin het. Twee daarvan is posisioneel.

Andell Loubser is die span se derde heelagter in soveel wedstryde in die reeks. Hy is verkies op grond van sy vermoë om lang lynskoppe te lanseer.

Fourie sê die wedstryd sal, veral as dit nat is, ’n groot toets wees vir die twee skrumskakels, Rewan Kruger en Branden de Kock. Hulle is die nr. 9’s in die 23-tal in die afwesigheid van die beseerde strydros Ruan Pienaar (knie).

Die Scarlets het op hul beurt nie minder nie as 13 veranderinge aan hul beginspan aangebring. Dit sluit ook ’n handvol posisionele skuiwe in.

Wyn Jones, stut van die Britse en Ierse Leeus, is ’n plaasvervanger nadat hy van ’n kniebesering herstel het.

• Die Cheetahs sal vir die eerste keer in ’n wedstryd speel waarin al die beamptes vroue is.

• SCARLETS: Leigh Halfpenny, Johnny McNicholl, Joe Roberts, Jonathan Davies (k), Steff Evans, Rhys Patchell, Dane Blacker, Carwyn Tuipulotu, Dan Davis, Vaea Fifita, Sam Lousi, Morgan Jones, Javan Sebastian, Ken Owens en Kemsley Mathias.

Reserwes: Shaun Evans, Wyn Jones, Sam Wainwright, Jac Price, Tomas Lezana, Gareth Davies, Sam Costelow en Ioan Nicholas.

CHEETAHS: Andell Loubser, Dan Kasende, David Brits, Reinhardt Fortuin, Munier Hartzenberg, Siya Masuku, Rewan Kruger, Friedle Olivier, Siba Qoma, Jeandré Rudolph, Victor Sekekete, Rynier Bernardo, Aranos Coetzee, Louis van der Westhuizen en Schalk Ferreira.

Reserwes: Marko Janse van Rensburg, Alulutho Tshakweni, Hencus van Wyk, Mzwanele Zito, Daniel Maartens, Branden de Kock, Robert Ebersohn en Tapiwa Mafura.

Skeidsregter: Hollie Davidson (Skotland).

Assistentskeidsregters: Sara Cox (Engeland) en Clara Munarini (Italië).

TV-skeidsregter: Claire Hodnett (Engeland).

Afskop: 22:00; regstreeks op SuperSport-kanale 201, 211 en 490.

– Netwerk24