Botha weeg opsies teen die Valke

Die volgende toets in die Windhoek Draught Welwitschias se leerkurwe breek Saterdag 16:00 in die Hage Geingob-stadion aan teen die Valke, ’n toonaangewende span in die provinsiale Mzansi-uitdaagreeks.Afrigter Chrysander Botha se spanlys is nog nie gefinaliseer nie, maar hy het gister bevestig dat heelagter Denzo Bruwer en vleuel Nico Maartens, beide van die heersende kampioenklub FNB Wanderers, op grond van rotasie in die prentjie kan wees om teen die Valke te speel.Nadat die Welwitschias-flank en kaptein Prince !Gaoseb laas Saterdag vroeg in die verloorwedstryd (22-31) teen die SWD met ’n tussenribbesering af is, is hy weer reg en oefen voluit, sê Botha.Sy flankmaat Cameron Langenhoven volg egter die protokol vir harsingskudding wat normaalweg tien dae strek. Thomasau Forbes se dyspier het intussen herstel, maar hy is nog nie vir ’n hoë-intensiteit terugkeer vrygestel nie.Van die noordeklub FNB Grootfontein se twee Wêreldbekerstutte van 2019 is Nelius Theron terug op die oefenveld en kan oorweeg word. André Rademeyer is ook terug in sy eerste week van oefening en fokus om fiksheid in te haal.Die belowende 18-jarige vaskop Herman Coetzee het ook laas naweek ’n belowende kamee-debuut van die bank af gemaak.“’n Groot verlies is die senter Justin Newman, wat besluit het om sy finalejaarstudies by Nimt ’n prioriteit te maak en dus nie meer vanjaar rugby gaan speel nie,” sê Botha. PJ Walters en Hillian Beukes is in die binnebaan om Danco Burger se nuwe vennoot te word.Vanweë die verpligtinge van die beduidende groep van buite Windhoek oefen die Welwitschias tans net op Woensdae in eenhede en Donderdag voltallig met dié wat van die kus en noorde aansluit.“Op dié manier loop hulle darem net twee werkdae per week mis. Meer tyd saam sal baie help, maar ons doen die beste wat ons kan met ’n semi-professionele opset.“As ’n span is die verbetering reeds sigbaar. Hierdie kompetisie bly ’n geleentheid vir spelers soos dié wat in die afwesigheid van die oorsese toetsspelers die kans aangryp om te beïndruk, met die oog op die Nasiebeker in Julie en die Wêreldbeker in September.”“Individuele foute buite die stelsel het ons gekos teen SWD, maar ons is op die regte pad en behou die geloof in die leerkurwe. Almal kan sien wat ons doen, werk.”Die Valke is goed op dreef en Saterdag se stormloop verby die Grens Bulldogs met 64-17 in Kemptonpark was bloot die nuutste. Voor dit het hulle reeds die SWD Arende (44-38), Luiperds (43-27) en Bulldogs in Oos-Londen (36-20) geklop.Hul enigste glipsies was in wegwedstryde teen die Boland Kavaliers in Wellington (22-48) en met ’n verloorbonuspunt teen die Oostelike Provinsie (27-31).“Die Valke se skrums en lynstane is bitter goed en ons fokus daarop om hulle teen te werk,” sê Botha.

Botha weeg opsies teen die Valke

Kommentaar

Republikein 2025-05-12

Meld asseblief aan om kommentaar te lewer

Botha weeg opsies teen die Valke

Kommentaar

Republikein 2025-05-12

Meld asseblief aan om kommentaar te lewer

MELD AAN

Advertensie