Bokke slyp deur week al aan skepskoppe

Instink het ingeskop toe Damian Willemse met twee komkommerkoel skepdoele in die Springbokke se toetsoorwinning van 27-13 oor Engeland op Twickenham geslaag het.“Ons het deur die week ons skepdoele geoefen,” sê Willemse met ’n breë glimlag.“In daardie twee oomblikke was dit instink. Ek het gevoel Engeland het goed verdedig en ons kon nie momentum kry nie.“Ek het besluit om toe eerder terug te val en die telbord aan die rol te kry.“Toe ek die bal tref, kon ek voel ek het hom in die middel getref. Ek is verheug dat ek tot die span kon bydra.”Dit was Saterdag in Londen die eerste keer sedert Morné Steyn twee skepdoele op 1 Oktober 2016 dat ’n Bok met twee of meer skepdoele in ’n toets slaag.Jannie de Beer het op 24 Oktober 1999 met vyf skepdoele op Twickenham teen Engeland geslaag, wat tot vandag toe nog die Suid-Afrikaanse rekord is.Op 24 November 2006 het André Pretorius byna De Beer se rekord laat spat toe hy op die einste Twickenham, waar Willemse Saterdagaand aan die brand was, met vier skepdoele teen Engeland geslaag het.Willemse het dus Saterdag volgens statistiek van die webtuiste www.genslin.us/bokke/ ook slegs die derde Bok geword wat met twee of meer skepdoele teen Engeland op Twickenham sukses behaal.Die 24-jarige Willemse het sy beste vertoning van die jaar op losskakel in die eerste 40 minute van die toets op Twickenham gelewer. Dit was terloops die sesde agtereenvolgende toets wat hy op losskakel vir sy land begin het.“Ek is baie tevrede,” sê Willemse oor sy eie spel.“Die voorspelers het my ’n uitstekende platform gegee. Als het net vanaand gekliek.”Willemse het saam met Faf de Klerk en Willie le Roux teen Engeland as die Bokke se speldrywers die afwisseling reggekry wanneer om te skop of wanneer om aan te val.’n Tikkie spel deur Willemse nadat hy ’n lugskop van die Engelse losskakel, Marcus Smith, in sy eie kwartgebied gevang het, het juis tot een van die hoogtepunte van die toets gelei toe Kurt-Lee Arendse daardie beweging met ’n aanskoulike vyfpunter afgerond het.“Krediet moet aan Kurt-Lee gaan, wat baie goed met my gekommunikeer het,” sê Willemse.“Hy het vir my geskree om hom op die aanval te soek.“Hy het daardie drie verdien vir die wyse hoe hy teruggeval het vir die hoë skop en toe weer by Willie aan te sluit om af te rond. Ek dink dit was ’n goeie spandrie.”Willemse sê al het die Bokke teen Ierland en Frankryk verloor, het hulle die Engelse tog met groot selfvertroue gepak.“Ons het in Dublin nie ons geleenthede gebruik soos ons moes nie.“Ons was trots op ons vertoning in Marseille oor die wyse hoe ons aanhou veg het, selfs toe ons net 13 spelers was.“Italië het ons baie selfvertroue gegee in wat ons op die toer probeer het wat ons speelstyl betref.“Ons het teen Engeland besluit om al ons kaarte op die tafel te gooi, aangesien dit ons laaste toets was.“Ek is egter regtig trots op die span. Ons wou graag hier op Twickenham wen, aangesien dit onder meer ’n spesiale geleentheid vir Evan Roos en Manie Libbok was, wat in hul eerste toetse hier gespeel het.” – Netwerk24

Bokke slyp deur week al aan skepskoppe

Kommentaar

Republikein 2026-08-21

Meld asseblief aan om kommentaar te lewer

Bokke slyp deur week al aan skepskoppe

Kommentaar

Republikein 2026-08-21

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.