TransNamib-werkers betoog weer

Ontstoke werknemers van TransNamib het Dinsdag weer die hoofstad se strate ingevaar op pad na die minister van finansies en staatsondernemings, Iipumbu Shiimi, se kantoor.Dié protesaksie het te make met dié staatsonderneming en nasionale spooroperateur se uitvoerende hoof vir menslike kapitaal, Webster Gonzo. Hy is onlangs vir nog vyf jaar aangestel ná ’n loopbaan van tien jaar by TransNamib.Die waarnemende algemene sekretaris van die Namibiese Unie vir Vervoer- en Verwante Werkers (Natau), Narina Pollmann, het die ontevrede werknemers na die minister se kantoor begelei.Sy sê egter dat Shiimi die ministerie se uitvoerende direkteur, Titus Ndove, afgevaardig het om die klagskrif in ontvangs te neem, wat op sy beurt ingestem het om terugvoer binne sewe werksdae te gee.In die klagskrif wat deur Pollmann onderteken is, word Gonzo se heraanstelling as ’n probleem uitgelig.“Werknemers is sterk gekant teen mnr. Gonzo se heraanstelling weens vorige klagtes [teen hom] tydens sy termyn.Onder die klagtes teen Gonzo sluit die vakbond die verontagsaming van arbeidsbeleide en -wetgewing in, asook die voorkeur van buitelanders, manipulasie van aanstellings, nalatigheid met betrekking tot aanstellings, verminderde werknemersvoordele en ’n foutiewe behuisingsbeleid.“Hierdie klagtes word nie aangespreek nie en sy heraanstelling vererger kommer oor die bestuur se minagting van werknemers se welstand en terugvoer,” lui die dokument.Volgens Pollmann beïnvloed Gonzo se teenwoordigheid die moraal en werksomstandighede by TransNamib, wat ’n impak op produktiwiteit en werkstevredenheid het.Die vakbond eis dat Gonzo afgedank en ondersoek moet word, sy pos geadverteer word, die direksie se besluit hersien word en dat toekomstige aanstellings met werknemers bespreek word.REAKSIETransNamib se hoofbeampte, Desmond van Jaarsveld, het by navraag aan Network Media Hub gesê dat die klagtes teen Gonzo reeds bekend is.“Die vakbond se bekommernisse is deur verskeie platforms uitgelig en aangespreek,” voer hy aan.“Die feit van die saak is dat hierdie bekommernisse niks nuuts is nie, en reeds deur onafhanklike partye as ongegrond bewys is.“Die ministerie van staatsondernemings en die Teenkorrupsiekommissie het in die openbaar stellings oor hierdie ongegronde bewerings gemaak,” skryf hy.Volgens Van Jaarsveld het Gonzo ’n onskatbare bydrae tot TransNamib gelewer, onder meer as waarnemende hoofbeampte oor ’n moeilike jaarlange tydperk.“Die besluit om die uitvoerende beampte te behou is strategies gesond, en verseker dat TransNamib se bedrywighede stabiel bly, terwyl ons voorberei vir die aankoop van nuwe lokomotiewe om ’n nuwe TransNamib aan te spoor,” sê hy.Kwessies van verskeie hofsake en hofbeslissings wat onbillike arbeidspraktyke veroordeel, is ook deur die vakbond geopper. Van Jaarsveld wou egter nie daaroor uitbrei nie, behalwe dat hy daarop aangedring het dat TransNamib arbeidskwessies regverdig en met integriteit hanteer.Met inagneming van werknemers wat al jare in poste waarneem, sê hy dat dinge sal verbeter noudat die staatsonderneming nou finansiering vir sy herlewing verseker het.TransNamib het in Julie aangekondig dat ’n lening van N$2,6 miljard van die Ontwikkelingsbank en sy Suider-Afrikaanse eweknie aan die spooroperateur toegestaan ??is.“Baie van ons interne kwessies sal begin verbeter,” sê Van Jaarsveld.Hy het ook bevestig dat werknemers wat ná 2019 aangestel is nie meer ’n dertiende tjek kry nie, maar slegs ’n bonus gekoppel aan prestasies.Mediese voordele vir afgetrede TransNamib-werkers is ook nie gestaak nie, maar die bekostigbaarheid en volhoubaarheid van die voordele word hersien, sê hy.Die minister word ook gevra om aan te dring op die aanspreeklikheid van TransNamib se bestuur. – augetto@nmh-hub.com.na

TransNamib-werkers betoog weer

Kommentaar

Republikein 2025-04-30

Meld asseblief aan om kommentaar te lewer

TransNamib-werkers betoog weer

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie