Taksman blaas in Nida se nek

Jemima Beukes – Die land se belastingagentskap het sy greep op die agentskap vir nywerheidsontwikkeling in Namibië (Nida) oor uitstaande belasting verstewig.

Ons susterkoerant Namibian Sun het van ’n betroubare bron verneem dat die staatsonderneming noodgedwonge ’n betalingsplan moes kies sodat die Namibië Inkomste-agentskap (NamRA) die uitstaande belasting nie direk uit die maatskappy se bankrekening neem nie.

Hoewel Nida nie die presiese bedrag bevestig het nie, skuld die agentskap die taksman glo N$26 miljoen in uitstaande belasting.

Nida se senior korporatiewe kommunikasiebestuurder, Wessel !Nanuseb, het die agentskap se belastingprobleme bevestig en aangedui dat Nida sy belastingrekening in paaiemente afbetaal.

“Dit is ’n vertroulike reëling tussen NamRA en sy kliënt, maar ek kan bevestig dat ons vordering maak in die nakoming van ons verpligtinge.

“Nida het tans ’n reëling met NamRA om die huidige maand plus een maand van enige agterstallige skuld te betaal,” het !Nanuseb gesê.

INVORDERINGSTAKTIEK

Nida se belastingprobleme kom op ’n tydstip waarin hy sowat N$89 miljoen – hoofsaaklik in agterstallige huurgeld – deur altesaam 1 057 aktiewe en ontruimde huurders verskuldig is.

Dit volgens statistiek wat in Junie deur die ministerie van nywerheidsontwikkeling en handel bekend gemaak is.

NamRA maak nou toenemend staat op die Inkomstebelastingwet, wat voorsiening maak vir die aanstelling van ’n agent, soos die bank van ’n entiteit wat nie belastingverpligtinge nakom nie, om enige verskuldigde belasting uit enige gelde – insluitend pensioene, salaris, lone of enige ander vergoeding wat die betrokke agent moontlik namens die entiteit mag hou – te betaal.

Die belastingagentskap het verlede maand skokgolwe deur die sakegemeenskap gestuur toe hy N$33 miljoen direk afgetrek het van die bankrekening van ’n konstruksiemaatskappy in Chinese besit wat geen inkomste verklaar het nie – ondanks staatstenders ter waarde van byna N$1 miljard wat aan die betrokke maatskappy toegeken is.

NamRA se hoof, kommissaris Sam Shivute, het die afgelope maande genadelose belastinginvorderingstaktieke aangeneem, veral teenoor maatskappye wat nie verpligtinge nakom nie en diegene wat daarvan verdink word dat hulle belastingbedrog pleeg.

ONGELYK

In onlangse hofstukke het Shivute gesê baie maatskappye gaan voort met belastingontduiking en het onthul dat korporatiewe inkomstebelasting gedurende die 2022-’23-boekjaar slegs N$8,1 miljard beloop het, vergeleke met die N$16,1 miljoen wat individue aan inkomstebelasting opgedok het.

Hy het ook die indiening van vals verklarings aan NamRA oor onbehoorlike inkomstebelastingopgawes veroordeel.

“Die belastinglas leun geweldig na individuele belastingbetalers se kant toe. As voorbeeld noem ek gou dat ’n werknemer wat die pos van skoonmaker in die regering tussen 2013 en 2018 beklee het, tot op hede ’n bedrag van N$36 498 aan belasting betaal het, vergeleke met ’n korporatiewe entiteit wat betaalbare inkomste van N$926 577 037 gemaak en behou het vir die belastingtydperk van 2013 tot 2018 en geen belasting betaal het nie,” het hy gesê.

Shivute het groot kommer uitgespreek oor die wydverspreide versuim om belasting in Namibië te betaal en gesê die belastingnakomingskoers staan tans op net 48%.

Hy het benadruk die beginsels van ’n goeie of gesonde belastingstelsel dikteer billikheid, en dit beteken dat diegene in gelyke omstandighede ’n gelyke belastingbedrag moet betaal terwyl diegene met ’n hoër inkomste meer belasting moet betaal.

– [email protected]