Reuse-uraanmyn brei uit

Die reusebelegging van US$5 miljard om die wêreld se derde grootste uraanmyn, en grootste oopgroef-uraanmyn, te koop en te bou, vorder goed vir China General Nuclear Power Group (CGN) met 90%-eienaarskap en die Namibiese regering se Epangelo (10%).Dit is ten spyte van die feit dat geen dividende tot dusver aan die eienaars betaal is nie.Só het die uitvoerende visepresident van Swakop Uranium, Irvinne Simataa, wat in beheer is van die Husab-uraanmyn, Woensdag by die jaarlikse Mynbou-ekspo by die Windhoek-skougronde gesê.Nietemin is Husab vandag ’n wêreldklas-hulpbron, het hy verder aangevoer.Simataa verwys onder meer na Suid-Afrika se Nasionale Vereniging vir Beroepsveiligheid (NOSA) se vyfster-gradering wat die myn verlede jaar behaal het.Sedert die lewensverlies in 2018 het die mynbestuur daarop aangedring dat so iets nooit weer by die myn sal gebeur nie, sê hy.Daarom word streng maatreëls gehandhaaf om die 4 300 mynwerkers by die myn, ofte wel 22% van die totale aantal mynwerkers in die land, te alle tye veilig te hou.Swakop Uranium het sowat 1 700 werknemers direk in diens (waarvan 96% Namibiërs is), terwyl sowat 2 600 vir kontrakteurs by die myn werk (97% Namibiërs), het Simataa gesê.Slegs 56 van die kenners wat by die myn werksaam is, is Chinese burgers wat deur CGN gesekondeer word, het hy beklemtoon.Verder is ongeveer 85,9% van Swakop Uranium se werknemers permanent aangestel, met die meeste van die topbestuur wat verbind is tot vastetermynkontrakte, met die klem op die bereiking van teikens om kontrakverlengings te bepaal, brei hy uit.Oor die afgelope twee jaar het Husab ook ’n A-ster-gradering in terme van regstellende aksie-aanstellings behaal, voeg Simataa by. Verder word groot klem gelê op die oordrag van vaardighede deur Swakop Uranium. Nietemin sê Simataa: “Namibië is ryk aan vaardighede.”Volgens hom is mynbedrywighede nou op volle kapasiteit met 120 miljoen ton grond en rots, “geboor, geskiet en vervoer,” per jaar, sê hy.Husab spog tans met jaarlikse produksiesyfers van ongeveer 5 300 ton uraankonsentraat. Die verwerkingsaanleg is nou ook opgegradeer om tot 12 miljoen ton per jaar te verwerk. Die volgende kapasiteitsverhoging tot 6 000 ton konsentraat, soos in die mynontwerp voor beplan is, word in 2028 verwag, volgens Simataa.“Dan sal ons die tweede grootste uraanmyn ter wêreld word, indien nie die grootste nie,” sê hy.Verlede jaar kon Husab ’n omset van N$8,8 miljard bereik en Simataa sê: “Ek reken dat Husab in 2028 die eerste maatskappy met ’n omset van een miljard Amerikaanse dollar in Namibië sal word.”Van die myn se totale verkrygingsbesteding van N$10 miljard verlede jaar, kon 70% plaaslik bestee word, met sowat N$2 miljard wat aan regeringsinstansies oorbetaal is, sê hy.Die nasionale oliemaatskappy, Namcor, baat byvoorbeeld uit brandstofaankope van N$100 miljoen per maand, en sowat N$1,3 miljard per jaar, uit Husab se besteding, sê Simataa.Verder spog Swakop Uranium met sakeverhoudings met meer as 400 plaaslike verskaffers van dienste en goedere, en ongeveer 57 kontrakteurs.Die myn moet egter steeds meer as US$400 miljoen in opgehoopte verliese bestuur. Dit is ten spyte daarvan dat Husab sy gelykbreekpunt in Amerikaanse dollars in 2023 bereik het en verlede jaar met positiewe inkomste in Namibiese en Amerikaanse dollars kon spog. Simataa verwag dat die myn binne vyf jaar positiewe kontantvloei sal bereik.Intussen word bykomende groot beleggings verwag, insluitend US$170 miljoen vir ’n nuwe ontsoutingsaanleg in vennootskap met NamWater, US$300 miljoen vir ’n nuwe logingsaanleg (leaching plant) om betekenisvolle laegraadse uraanertsvoorrade te verwerk, en ’n eksplorasieboorveldtog van N$1,4 miljard om tot 6 800 meter oor die volgende sewe jaar te boor.Die span van 250 werknemers boorwerkers behartig 21 boormasjiene, waarmee 54 meter in 2024 geboor is en 100 meter wat vir vanjaar beoog word om nog ’n mineraalafsetting soortgelyk aan Husab binne die myn se grondgebied te vind, volgens Simataa.Teen die tweede kwartaal van volgende jaar sal die kommersiële ontwerp van ’n uitgebreide industriële aanleg ook voltooi wees, voeg hy by. – augetto@nmh-hub.com.na

Reuse-uraanmyn brei uit

Kommentaar

Republikein 2025-12-01

Meld asseblief aan om kommentaar te lewer

Reuse-uraanmyn brei uit

Kommentaar

Republikein 2025-12-01

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.