NBC staar aantygings van kopieregskending in die gesig

Die Suid-Afrikaanse uitsaaier e.tv het die Namibiese Uitsaaikorporasie (NBC) van onder meer kopieregskending beskuldig.Dit na aanleiding van die beweerde ongemagtigde uitsending van inhoud wat deur dié mediamaatskappy en sy lisensiehouers besit word. In ’n staak-en-weerhou-brief gedateer 21 Januarie 2026 beweer e.tv dat NBC inhoud van kanale wat deur die e.tv-groep besit word, sonder enige kontraktuele reg uitgesaai het.Die brief beweer dat die inhoud oor verskeie NBC-platforms uitgesaai is, insluitend materiaal wat oorspronklik op e.tv, eExtra, eMovies, eMovies Extra, ePlesier, eSeries, eReality en eToonz uitgesaai is.Volgens die brief word die betrokke inhoud deur kopiereg beskerm en is dit óf in besit van e.tv óf aan die maatskappy deur derdeparty-regtehouers gelisensieer.e.tv beskryf homself as Suid-Afrika se grootste gratis uitsaaier in private besit, met meer as 25 jaar se bedryf- en internasionale lisensieooreenkomste met groot inhoudvervaardigers.Die brief verklaar dat geen kontraktuele of regsverhouding tussen e.tv en NBC bestaan wat die plaaslike uitsaaier sou toelaat om die inhoud te gebruik of om dit weer uit te saai nie. NBC word verder van onder meer “blatante kopieregskending” beskuldig.e.tv het geëis dat NBC onmiddellik ophou om alle inhoud wat met die e.tv-handelsmerk geassosieer word te gebruik, van al sy platforms – beide lineêr en digitaal – te verwyder, insluitend programskedules en elektroniese programgidse, en enige assosiasie met die maatskappy se handelsmerke beëindig.NBC is tot sluitingstyd op 22 Januarie 2026 gegee om sy voldoening te bevestig. e.tv het verder gewaarsku dat hy Namibiese prokureurs sal opdrag gee om dringende regstappe in te stel indien NBC nie aan die eise voldoen nie.Die Suid-Afrikaanse uitsaaier het ook die reg voorbehou om siviele eise vir skadevergoeding aanhangig te maak en strafregtelike of regulatoriese klagtes by relevante owerhede, insluitend die Regulerende Owerheid vir Kommunikasie van Namibië (Cran), in te dien.In reaksie op vrae Vrydag het die uitgaande direkteur-generaal van die NBC, Stanley Similo, bevestig dat die uitsaaier ’n klagte van e.tv ontvang het, maar bewerings van onwettige gedrag verwerp.Similo het gesê die betwiste inhoud is deur ’n derdeparty-regtehouer aan NBC versprei, en beklemtoon dat NBC binne gevestigde wetlike en bestuursraamwerke funksioneer.“NBC is ’n statutêre entiteit wat deur die wet ingestel is en funksioneer in volle ooreenstemming met alle toepaslike bestuurs-, sake- en regulatoriese raamwerke,” het Similo gesê.Hy het verduidelik dat NBC, in die normale verloop van sake, diensvlakooreenkomste met diensverskaffers oraloor die uitsaaiwaardeketting aangaan, hetsy direk of indirek, met uitsaairegte wat dikwels deur derde partye onderhandel en bestuur word.“Nadat die klagte van e.tv ontvang is, is die saak onmiddellik na die NBC-raad [van direkteure] en uitvoerende bestuur verwys,” het Similo gesê.Hy het bygevoeg die betrokke kanaal is as ’n voorsorgmaatreël hergebruik en dat NBC amptelik met die betrokke partye gekommunikeer het. NBC het ook opgehou om die betrokke inhoud te gebruik hangende die finalisering van die regsproses tussen die betrokke derde partye.“NBC bly verbind tot wettige, deursigtige uitsaaibedrywighede en sal verdere opdaterings verskaf indien nodig,” het Similo gesê.– phillipus@nmh-hub.com.na

NBC staar aantygings van kopieregskending in die gesig

Kommentaar

Republikein 2026-01-27

Meld asseblief aan om kommentaar te lewer

NBC staar aantygings van kopieregskending in die gesig

Kommentaar

Republikein 2026-01-27

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.