‘Nasan onregverdig geteiken’

Nasan Energies sê al die vulstasies wat hy oraloor Namibië voorsien, het brandstof – behalwe dié wat deur kleinhandelaars bedryf word wat kredietfasiliteite aangevra het of geweier het om by die maatskappy te koop.

Die reaksie volg op aantygings deur die Brandstof- en Franchisevereniging (Fafa) dat Nasan versuim het om sy verpligtinge van voorsiening van brandstof teenoor sommige kleinhandelaars na te kom wat vooruit betaal het.

Nasan het op 27 Mei amptelik beheer van die persele oorgeneem ná transaksies wat goedgekeur is onder voorwaardes wat deur die Namibiese Mededingingskommissie (NaCC) opgelê is.

Die maatskappy het kleinhandelaars onmiddellik verskuif van die tradisionele kredietmodel wat voorheen deur Vivo Energy en Engen gebruik is, na ’n vooruitbetalingstelsel.

Op 2 Junie het Nasan die “Bring the Cash Incentive” ingestel, wat kleinhandelaars ’n terugbetaling van 50 sent per liter bied op volle vragmotorvragte van 40 000 liter wat 24 uur vooruit betaal word.

’n Formele aanmaningsbrief wat Fafa egter op 4 Junie uitgereik het – en aan die minister van myne, energie en nywerheidsontwikkleing, Modestus Amutse, en senior amptenare by die NaCC gerig is – het beweer dat verskeie kleinhandelaars geld by kommersiële banke geleen het om vooruit vir brandstof te betaal, net, maar dat ’n “wesenlike aantal” kleinhandelaars wat voorafbetalings gemaak het, nie brandstofaflewerings ontvang het nie, terwyl ander na bewering brandstof “ver buite” die beloofde 24-uur- en afleweringsvenster van die volgende werksdag ontvang het.

Nasan se besturende direkteur, Jean-Blaise Ollomo, het Maandag aan Network Media Hub (NMH) gesê Fafa versprei leuens oor die maatskappy.

Ollomo het die brandstofvereniging uitgedaag om “na vore te kom en spesifiek te wees oor die kleinhandelaars wat kla dat hulle nie brandstof ontvang nie”.

Hy het bygevoeg dat sowat 20 kleinhandelaars versoek het dat die program vir twee maande verleng word.

“Ek het nee gesê, en miskien sal ek daaroor dink,” het hy gesê.

Hy het voorgestel dat van die kritiek teen Nasan aangeblaas word deur ontevrede mededingers.

“Ander is mededingers in die bedryf wat nie gelukkig is dat Nasan Energies die tender gewen het om 52 Engen- en Shell-vulstasies oraloor Namibië van Vivo Energy te verkry nie,” het hy gesê.

“Tot dusver is vyf uit 42 (sic) diensstasies se handelsmerke herontwerp en ons is nog besig,” het Ollomo bygevoeg.

HEFTIGE WOORDEWISSELING

Ollomo het ook in ’n heftige woordewisseling via WhatsApp met die brandstofvereniging se voorsitter, Michael Ludeke, oor Fafa se beskuldigings betrokke geraak.

In een boodskap wat aan Ludeke gestuur is en deur NMH gesien is, het Ollomo die brandstofvereniging daarvan beskuldig dat hulle Nasan onregverdig teiken terwyl hulle stilbly wanneer ander brandstofmaatskappye onderbrekings in lewering ervaar.

“Was Fafa ooit teenwoordig toe daardie verbintenis gemaak is? Hoekom hardloop Fafa net oor Nasan na die media? Jy sien nie openbare oproer wanneer vulstsies van Puma, Total of Vivo droog loop nie,” het hy geskryf.

“Daar was geen mediaberiggewing oor Engen Ocean View se vertraagde herontwerp van die Shell-handelsmerk nie, asook nie oor die ongemerkte persele wat tans in regsdispute met Vivo vasgevang is nie. 

“Fafa se optrede is blatant bevooroordeeld en doelbewus teen Nasan gerig,” het Ollomo geskryf.

FAFA

Ludeke het die beskuldigings verwerp en Nasan daarvan beskuldig dat hulle die kernkwessie vermy – naamlik brandstofaflewerings wat kleinhandelaars beweer betaal is, maar nooit ontvang is nie.

“Fafa hoef nie by die vergadering van 2 Junie 2026 teenwoordig te gewees het om Nasan by sy woord te hou nie. Sinspeel jy dat die weergawes van die handelaars wat die vergadering bygewoon het, vals is?

“Deur onverwante sake te noem in plaas daarvan om die kernkwessie aan te spreek – naamlik Nasan se versuim om die ondernemings wat op 2 Junie gegee is, na te kom en die voortgesette nie-aflewering van brandstof waarvoor handelaars reeds betaal het – ontwyk jy bloot die kwessie ter sprake,” het Ludeke geantwoord.

Hy het volgehou dat Fafa se optrede nie spesifiek teen Nasan gerig is nie, maar daarop gemik is om die geraakte kleinhandelaars te beskerm.

“Ek kan onomwonde verklaar dat Fafa se optrede nie teen Nasan bevooroordeeld is nie. Fafa verteenwoordig sy lede en tans is dit die Nasan-handelaars wat die swaarste aan die las van hierdie situasie dra,” het hy gesê.

Ludeke het verder aangedui dat Fafa Nasan sou ondersteun om brandstof by enige wettige verskaffer te verkry, insluitend Vivo Energy, mits die maatskappy hom formeel skriftelik tot die ondernemings verbind wat tydens die vergadering op 2 Junie bespreek is.

“Die bal is in jou baan,” het Ludeke vir Ollomo gesê.

Fafa het ook beweer dat Nasan moontlik kunsmatige voorsieningstekorte skep om druk op Amutse te plaas om die maatskappy toe te laat om brandstof direk van Vivo Energy te verkry.

Nasan het dié bewering egter nie direk beantwoord nie.

Ollomo het meer as drie dekades in die stroomaf-petroleumbedryf deurgebring en het voorheen as besturende direkteur van Engen Petroleum Zambia gedien voordat hy die uitvoerende hoof van Engen Namibia geword het.

– [email protected]