China bestel 25 ton maroela-olie

’n Plaaslike klein- en mediumgrootte onderneming wat in Khomas gebaseer is, het ’n Memorandum van Verstandhouding (MoU) met ’n vervaardigingsmaatskappy in China onderteken om organiese olies en krematartpoeier vir die gebruik in kosmetiese produkte te verskaf.

Die minister van internasionale betrekkinge en handel, Selma Ashipala-Musavyi, het tydens haar begrotingsrede in die parlement gesê die ooreenkoms is tydens die agtste China International Import Expo (CIIE) verlede jaar in Shanghai onderteken. 

Volgens haar het die plaaslike onderneming, Tuli-line, ’n versoek van Shanghai Bayue Daily Chemical Technology Co. Ltd ontvang om ’n vraghouer van 25 ton organiese maroela-olie in China af te lewer.

Afhangende van die sukses van hierdie aanvanklike besending, kan die ooreenkoms uitbrei in ’n reëling vir deurlopende voorsiening wat ’n volgehoue ​​vraag na Namibiese produkte in die Chinese mark skep, het die minister hoopvol gesê.

Tuli-line is in 2001 deur Tulimeyo Kaapanda, die besturende direkteur, gestig met die visie dat die natuur die sleutel tot ware welstand is.

Om ’n bestelling te kry is een ding, het Tuliyemo by navraag aan Republikein gesê, maar om dit uit te voer sal die modernisering van hulpbronne en materiaal vereis. 

In die twee Kavangostreke tot by Tsumeb en ook die vier O-streke (Oshana, Omusati, Ohangwena en Oshikoto) is die versameling en ontpitting van maroelas ’n eeue oue en arbeidsintensiewe kulturele gebruik wat veral deur vroue en meisies vervolmaak is.

“Vir die olie om suiwer te wees, moet jy die tradisionele manier volg,” verduidelik Tulimeyo. 

Die pitte word aan besighede gestuur wat dit pars om die olie te onttrek. Van die ongeveer sewe parsers wat aan Tuli-line die olie verskaf, kry slegs een sy pitte van sowat 2 500 meestal landelike vroueverskaffers.

“Ons het jare lank aan Europa, veral Duitsland, Amerika en ook die Body Shop voorsien, maar sommige van hierdie markte is heeltemal versadig. Ons moes ’n nie-tradisionele mark verseker en nou het ons China verseker wat ’n goeie ding is,” het sy gesê. 

Volgens Tulimeyo moet nuwe produkte eers geregistreer word en aan die doeane- en gesondheidsvereistes van bestemmingslande voldoen. 

Dit het China drie jaar geneem om die invoer van Namibiese maroela-olie goed te keur. Die goedkeuring het gevolg nadat die land monsters van die olie gekry het toe Tuli-line aan ekspo-geleenthede in China deelgeneem het.

Die produkte is in die laboratorium getoets en ontleed, alvorens die Chinese regering uiteindelik goedkeuring vir invoer verleen het. 

Tulimeyo erken die geleentheid vir die uitvoer na die Chinese mark kan tot verhoogde mededinging en ’n geskarrel om hulpbronne lei.

Volgens haar geniet maroelabome ook beskerming in baie tradisionele kulture en mense neem die bewaring van die plante ernstig op. 

Die reusebestelling van 25 ton uit China kan jou bangmaak, sê Tulimeyo.

“Maar ons moet onderhandel afhangend van die oes en ons werk saam met mense wat buigsaam is en verstaan,” vertel sy.

Oor die jare het Tuli-line ook voordeel getrek uit geleenthede met Duitsland se GIZ en die Boabab Africa Alliance om ander natuurlike Namibiese produkte te ondersoek en te ontwikkel. Dit sluit in boabab-poeier, koffie en olies om in kosmetiese produkte te gebruik. Tuli-line se reeks produkte is plaaslik by winkels soos Model in Auas ​​Valley, SuperSpar by die Maerua Lifestyle Centre, Klein Windhoek Supermark, Fountain of Health en die Craft Centre in die hoofstad beskikbaar.

Dit is ook by Paragon Duty Free-winkels, Natural Namibia, Bonus Markplatz in Swakopmund, sommige Puma-vulstasies, East End Express en die Semalekav Restaurant by die Bokamoso Incubator Complex in Katutura beskikbaar. – [email protected]