Zaayman se o.20-groep vind beginpunt teen Vipers

Die plaaslik gebaseerde lede van die Namibiese onder 20-oefengroep het Vrydagaand hul eerste vriendskaplike kragmeting teen ‘n uitnodigingspan van Windhoek Vipers Rugbyklub met 37-13 in die Hage Geingob-stadion gewen, nadat hulle rustyd met 17-3 voorgeloop het.

Driedrukkers vir die o.20-span was die gewese Windhoek Gimnasium en Namibië o.18-slot Buhlem Oelofsen (twee), die vlugvoetige heelagter Noëlle “Carter” Loubser (twee; tevore van Windhoek Affies), flank JP Campbell (Wanderers), haker Marchall Klein (Unam en WHS) en Carlo Hawanga (tevore Windhoek Gimnasium) wat later as linkervleuel opgestuur is.

Die nasionale junior span se stelskoppers het redelik beperkte sukses uit die skuins posisies behaal en ná Hawanga se vyfpunter vroeg in die tweede helfte is die boodskap op die veld gestuur dat hulle ná al hul volgende drieë die kans vir ‘n doelskop prysgee.

Vipers, wat volgens woordvoerders van die klub net vier eerstespanspelers in hul wedstrydgroep ingesluit het, se enigste drie is deur die vyfslot Hento Henning gedruk. Heelagter Duncan Subeb het ‘n doelskop en twee strafdoele bygedra.

Vipers, wat in die Namibië Rugbyunie se eersteliga meeding, het opdraand gekry teen die o.20-span se skrumwerk en lynstaandrywe. Die wenspan het ook goed op die voorvoet gekom met stormlope deur losvoorspelers McHenry Kambatuku en Pieter-Jan Strydom, wat soms in agterlynposisies stelling ingeneem het.

Agterna is toekennings aan die onderskeie spelers van die wedstryd oorhandig met prysgeld van N$500 elk, naamlik Noëlle Laubscher (Namibië o.20 heelagter) en Nicolaas Mostert (Vipers-flank).

Die nasionale o.20-groep onder Johan Zaayman en Jood Opperman – dieselfde afrigterspan wat verlede jaar die Rugby Afrika Barthés Onder 20-toernooi in Zimbabwe gewen het – is reeds in Desember aangekondig.

Hul vername doelwit is in Augustus, wanneer die kontinentale toernooi in Uganda aangebied word. Anders as verlede jaar, sal die Afrika-wenspan wel soos gebruiklik met deelname aan die Wêreldrugby Onder 20 Trofee-toernooi (September in Chili) beloon word.

Namibië was sedert 2018 afwesig by die wêreldtoernooi, óf omdat hy nie die Afrika-toernooi gewen het nie, óf omdat die wêreldtoernooi soos verlede jaar nie aangebied is nie.

Zaayman het agterna gesê die o.20-groep, wat nog met verskeie studente en gekontrakteerde groeplede uit Suid-Afrika aangevul moet word, sal in Junie ‘n voorbereidende toer na Pretoria onderneem en sal teen die Limpopo Blou Bulle asook die Blou Bulle se o.20-spanne uitdraf.

Oor Vrydagaand se vertoning het hy gesê daar was baie foute, maar met net die afgelope drie weke se beperkte tyd vir voorbereiding is hy optimisties oor hul vooruitsigte.

“Dit was nie ‘n vloeiende vertoning nie en ‘n mens verwag eintlik beter, maar ons kon aspekte raaksien waaraan ons sal werk. Ons het omtrent 12 groeplede met verpligtinge in Suid-Afrika wat op die kort toer in Junie by ons sal aansluit.”