Oorstootdrie in laaste minuut laat Wanderers derby wen

‘n Kompeterende derby-vertoning by Gemsbokpark sal vir beide afrigterspanne positiewe aanduiders bied vir die 2026 premierliga van die Namibië Rugby-unie wat Saterdag afgeskop het.

FNB Wanderers het met ‘n swaarverdiende oorwinning van 27-24 teen die tuisspan United weggekom, te danke aan die wendrie met die laaste beweging van die wedstryd.

Met ‘n klompie nuwe spelers in beide spelersgroepe sal die hoofafrigters Darryl de la Harpe van Wanderers en Herman Lintvelt van United beide ‘n oorwegend positiewe opsomming van hul vooruitsigte kon maak.

Losskakel Wiks Tromp het vir Wanderers eerste punte met ‘n strafdoel aangeteken, voordat United ná ses minute ‘n lynstaandryf in ‘n drie vir die flank Thehard Lintvelt omskep het. Heelagter Enrique Husselmann, wat kort daarna na skrumskakel verskuif is toe Elzandro van Wyk met ‘n besering af is, kon nie met die doelskop slaag nie.

Konstruktiewe opbouwerk tot by die doellyn het vir Wanderers die kans geskep vir die bonkige slot Kistings Minyoi (tevore van FNB Unam) om oor die doellyn te bars. Saam met Tromp se doelskop was Wanderers met 10-5 voor.

Agtien minute het verloop toe United met ‘n teenaanval van vleuel Jurgen Meyer (tevore van Wanderers) en Lintvelt uit hul eie helfte weggebreek het. Die senter Suramie Kambombo het die laaste aangee vir die stut Otja Auala gegee wat agter die pale gaan druk het, vir Husselmann om te verdoel.

Wanderers sou sy baasskap in die eerste helfte egter met Tromp se tweede strafdoel hervestig, voor ‘n goeie aanval van die Wit Hingste waarin regtervleuel Ryan Coetzee met ‘n binne-aangee terug na die driedrukker, heelagter Tolley Tjipute, aangegee het (rustyd 20-12).

Die voorsprong sou egter ná 52 minute bedreig word toe Kamaa Kajau, opgestuur as vaskopstut toe Auala met ‘n besering af is, van naby af vir ‘n United-drie oorgedryf het, nadat Jurgen Meyer se lopie bygedra het om die Filistyne in trefafstand te bring. Husselmann se skop was mis.

Die gasheerspan het ná 62 minute ‘n trefferhou geslaan toe agtsteman Ben Burger vir Thehard Lintvelt op volle vaart teen die linkerkantlyn afgestuur het, met genoeg vaart om agter die pale te gaan druk. Met Husselmann se doelskop was United met 24-20 voor.

In die laaste minute het Wanderers twee keer met strafskoppe lynstaandrywe op die doellyn afgedwing. Die eerste keer het skeidsregter Danie Koen beslis dat die haker en kaptein Edward Drotsky tussen die hoop lywe nie die bal geplant kon kry nie. Die tweede keer het Koen met die assistentskeidsregters gekonfereer en wel Drotsky se wendrie toegeken, wat suksesvol deur Tromp verdoel is.

Agterna het Drotsky die mening uitgespreek dat beide die laaste twee beslissings inderdaad in die kol was.

Grootfontein oorleef teen Unam

FNB Grootfontein het op hul tuisveld ‘n seldsame oorwinning teen FNB Unam behaal (35-30), boonop met ‘n bonuspunt vir vier drieë.

Grootfontein se kaptein Wikus Jacobs, wat as loskopstut eerder as haker begin het, het met twee drieë sy stempel afgedruk, terwyl die losvoorspelers Johan Luttig en Pieter Daan Kok ook met drie hul waarde onderstreep het.

Binnesenter Franklin Busch het die kol getref met drie doelskoppe en drie strafdoele.

Skeidsregter Romario de Koker het een keer sy geel kaart vir Grootfontein se slot Pieter Luttig uitgehaal, en een keer vir Unam se senter en kaptein Alcino Izaaks.

Unam se oes vir die naweek was ‘n verloorbonuspunt vir die verskil van minder as sewe punte. Met net drie drieë (deur linkervleuel Derrick Bezuidenhout, salot Viery Haufiku en haker Zadian Campbell) was hulle een kort om minstens nog ‘n bonuspunt te kon byvoeg.

Heelagter Aljarreau Zaahl was vir Unam in die kol met drie doelskoppe en drie strafdoele.

• Puntestand, tellings en komende bepalings by www.fnbrugby.my.na/

• Wedstrydverslae van Kudus teen Rehoboth, en Dolphin teen Western Suburbs is op bladsy 3.

• Uitslae in die NRU reserweliga tussen die tweede spanne: Suburbs klop Dolphin 12-8; Unam klop Grootfontein 40-10; Kudus klop Rehoboth 70-0; Wanderers klop United 50-16.