Woord van die week

smoet b.nw. (veral t.o.v. die see; verouderd) (wsk. n.d. Eng. smooth) Kalm en sonder golwe of branders: Die water kon nie mooier wees vir kabeljou nie: hy het daardie gelerige kleur gehad: nie te rof nie en ook nie te dood smoet nie (H. du P. Steytler: Rotse-toe, 1940, 113).  Die duikers vlieg in v-formasie laag / oor die smoet water blink en glad en snel / tot daar waar skole vis is (M.M. Walters: Heimdall, 1974, 77).

Ook fig.: Dis 'n deurleefde hand (v.d. skrywer) wat ... die indibelpotlood vashou en versigtige drukletters maak ... Maar duidelik 'n hand wat weet dat onder die sterk verhaallyne en ingekleurde detail van die smoet getekende wêreld daar oneindig veel is wat woel, wat ongesê bly, wat terg, wat diep ontstel én bevredig (Beeld, 22 Mrt. 1993, 6). (Ook opgeteken in Lambertsbaai en Velddrif).