Wie wil dan nou normaal wees?

Dis tyd dat jy vrede met jouself maak. Ja, jy! Jy met die oorvol “to-do”-lys, die “ek moet nog net gou” en die “miskien volgende keer”.Ek praat nie van daardie tipe vrede wat jy met koue oorskietpizza op ’n Sondag maak nie. Ek praat van daardie “ek is eintlik nie so sleg nie”-vrede. Die soort waar jy vir jouself in die spieël kan kyk en sê: “Hierdie mens? Sy’s oraait. Ek hou van haar.”Want hier is nou die ding: jy kan óf jou hele lewe lank probeer om almal gelukkig te hou (spoiler alert: dis onmoontlik), of jy kan ophou omgee en van jouself begin hou.Jy sien, jy het twee keuses. Jy kan regtig jouself wees, en party mense gaan dalk dink jy’s ’n bietjie “te veel”, of jy kan vals wees, en almal hou van jou, maar niemand ken jou regtig nie. Dis soos daardie mense wat jou komplimenteer op ’n rok met sakke, hulle sê “wow!” , maar hulle weet nie eers daar is plek vir jou selfoon en ’n skelm sjokolade nie.Ek sê nie jy moet nou heeldag in jou slaapklere rondloop en jou mening by elke braai uitbasuin nie. Ek sê net: wees gemaklik in jou eie vel. Lag hard. Huil as jy moet. Dink wat jy dink. Sê wat jy voel, met respek, natuurlik, ons is nie in die Wilde Weste nie.Want weet jy wat is uitputtend? Om die hele tyd te wonder of jy nou “reg” is. Of jy nou genoeg is. Of jy nie dalk iemand kwaad gemaak het met jou opinie oor pynappel op pizza nie.Party mense gaan nie van jou hou nie al is jy so soet soos karamel en vriendelik soos ’n labrador. Dis nie jou probleem nie. Dis hoekom daar soveel mense is, sodat jy jou eie “klomp” kan kry.En as jy nog wonder: ja, jy mág grense hê. Jy mág kies wie jy inlaat. Jy mág nee sê sonder om ’n opstel van verskonings saam te stuur.Dis nie arrogant nie. Dis gesond.So volgende keer as jy jouself vang waar jy probeer agteroor buig om in iemand anders se idee van “aanvaarbaar” in te pas, onthou net: jy is nie ’n pretzel nie. Jy’s ’n mens. En jy is meer as genoeg soos jy is.Dis nie nodig om voor te gee om aanvaar te word nie. Jy is nie op “Idols” nie. Jy’t nie elke dag ’n “like” van die wêreld nodig om geldig te wees nie.So trek die skoene aan waarvan jy hou. Plaas die selfie al is jou hare nie reg nie. Lag vir jou eie grappe. En as iemand sê jy’s “anders”, sê dankie. Wie wil dan nou normaal wees? – annemarie@nma.com.na* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Wie wil dan nou normaal wees?

Kommentaar

Republikein 2025-09-18

Meld asseblief aan om kommentaar te lewer

Wie wil dan nou normaal wees?

Kommentaar

Republikein 2025-09-18

Meld asseblief aan om kommentaar te lewer

MELD AAN

Advertensie