Wie is jy regtig?

Baie mense het ’n blink idee gehad oor wat die vrou met haar duur olie in die Bybel moes doen. 

Slim raad oor die olie wat sy alleen oor die jare bymekaar gemaak het. Idees en raad oor dit wat aan haar behoort en niemand vra wat haar wil en begeerte is nie. Is dit nie vandag ook so in die lewe nie?

Die olie stel vir my ’n paar dinge voor, maar hoofsaaklik jou doel in die lewe. Dit waarna jou gedagtes draai en die rigting waarin die lewe jou dikwels wink. En sover mens se geheue en kennis strek, probeer ons mekaar se stories skryf en mekaar vertel hoe en waar om die olie te gebruik, sonder om eers te luister. Maar is elkeen se olie nie sy eie nie?

Wanneer die vraag: “Wie is jy?” aan jou gestel word, wat is jou antwoord?

Baie sal onmiddellik sê wat hulle doen. ’n Besturende direkteur, ’n verpleegster, prokureur, tuisteskepper en so voorts. Die samelewing het aan ons dikteer dat jy ’n titel moet hê, want dan het jy waarde. Maar is dit jou ware identiteit? Want van kindsbeen af, leer jy dat wat jy doen, vir ander mense belangrik is. Dit is ja, wanneer dit by die regte dinge kom, maar dis dan ook daardie erkenning waarna jy begin smag en ander se goedkeuring. Wanneer jy mooi gaan sit en dink, beskryf jou posbenaming en titel egter jou rang en verantwoordelikheid, dit “wat” jy doen, maar nie “wie” jy is nie.

Wie is jy sonder daardie rang of verantwoordelikheid? Wie is jy heel eerste?

Die mooiste tyd van die dag vir my is net voor en wanneer die dag breek. Dan hoor ek my Skepper se stem sonder enige inmenging, sonder enige geraas en selfs my eie gedagtes. En dis daar waar ek hoor wie ek is, wanneer ek stil by Hom gaan sit, dat Hy vir my sê wie ek eerste is. En sy beskrywing is die mooiste, mooier as enige kompliment.

Wanneer jy by Hom gaan sit en hoor wie jy heel eerste is, dan sal die stemme nie so duidelik hoorbaar wees nie.

Daar is beslis stemme en raad op wie jy kan ag slaan. Jy sal weet, want jou hart sal vir jou sê. Dit is die stemme wat nie net prys te midde van prestasies nie. Aan wie jy niks hoef te bewys nie. Wat lief het al het jy niks om terug te gee nie. Wat jou eerste sien en dan eers jou titel.

Ek dink sommer nou die vrou met die olie het nie eens die fluistering gehoor nie. Sy wou net haar olie bring na die Een wat dit vir haar moontlik gemaak het. Daardie heerlike reuk wat sy gedra het, wie sy is. Die stemme het nie saak gemaak want daar was net Een wie se stem die belangrikste was.

Hier is die vraag weer: Wie is jy? Wie is jy eerste, voor jou titel en wat jy doen? Laat Hy jou vertel hoe waardevol jy regtig is.

– Gasskrywer

[email protected]

* Beste lesers, keuring vir die ­publikasie van WhatsApp, briewe en alle ander lesers­bydraes berus by Republikein. Klagtes oor die diens van ­private besighede word eers aan die onder­neming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.