Werk, doen iets!

Werk is ’n baie belangrike deel van die lewe. ’n Mens moet werk.

Wat is werk? Is dit om geld te verdien? Ja, as jy gelukkig genoeg is, kan dit jou altyd iets in die sak bring.

Tog is werk meer as ekonomiese slawerny en kan dit selfs iets heeltemal apart van geldelike vergoeding wees. Werk het ’n waarde van sy eie en daarom kan dit as arbeid verkoop word.

Die waarde van werk lê daarin dat dit behels om iets te doen. Hoe beter daardie “iets” is wat jy doen, hoe meer is dit werd. Soms lê die maatstaf van hoe goed die werk gedoen is bloot in die tydsberekening daarvan.

Om iets betyds te doen, wat op daardie spesifieke tydstip gedoen moet word, is betekenisvol en waardevol. Om iets doeltreffend te doen, met jouself daarin belê, soos ’n meesterlike kunstenaar, is die moeite werd. Dis hoe jy ’n superster word!

Wát jy doen is egter belangriker as wanneer jy dit doen, of hoe perfek jy dit doen. Jy moet die regte ding doen. Dit is nie altyd so eenvoudig om te weet wat die regte ding is om te doen nie, maar werk is amper altyd die regte ding.

Voel jy mislik, angstig, ontnugter of verward? Spring aan die werk. Werk in jou tuin, werk in jou kombuis, werk aan jou handskrif, beoefen jou kuns of doen oefening. Wanneer jy daar klaar is, voel jy weer beter. Werk doen ’n mens goed. Die lewe is net nie dieselfde daarsonder nie. Werk gee rigting, hou jou besig en lewer resultate.

Die resultate word bepaal deur die drie eienskappe van die werk wat jy doen, wat ons vroeër aangeraak het: Doen jy die werk wat nou gedoen moet word? Doen jy die werk goed? Die belangrikste van alles: Doen jy die regte werk?

Ek dink een manier om die beste tipe werk vir jouself te kies, is om jouself af te vra: Waarin is ek goed?, Waarvoor is ek lief?, en Met watter werk kan ek geld verdien?.

Waar daardie drie antwoorde oorvleuel, is dalk die beste loopbaan vir jou, want jy geniet dit, presteer daarin en kan goeie vergoeding daarvoor ontvang.

Daar is nie net een regte antwoord op die vraag wat die beste werk vir jou is nie. Daar is baie dinge wat ’n mens kan doen.

Boonop is dit ook moontlik om die meeste te maak van die werk wat jy reeds doen, eerder as om na ander werksgeleenthede te soek. Hoe beter jy in iets raak, hoe beter laat dit jou voel en hoe meer kan jy daaruit baat.

Dit verg oefening om goed in iets te word. Doen dit. Doen dit weer, maar verbeter nou op wat jy laas verkeerd gedoen het. Doen dit weer. Doen dit aanhoudend en sonder foute, 20 keer na mekaar.

Werk daaraan en werk aan jouself. Werk aan jou verhoudings en jou omstandighede. Werk vir jouself, jou familie, jou samelewing en jou medemens. Werk totdat jy die werk voltooi het.

Nadat jy ’n taak voltooi het ervaar jy vryheid, ’n sekuriteit en tevredenheid wat almal behoort te ken. Daar is trots in die wete dat jou werk goed gedoen en afgehandel is. Saam met dit kom selfvertroue en selfwaardering. Waardes word duidelik deur werk gemaak.

Enigeen wat werk, ken die waarde daarvan om goeie werk te lewer, die opofferings wat dit verg om hard te werk, die toewyding wat dit verg om die ekstra myl te loop. Selfs al sien niemand jou werk raak nie, kan jy steeds baat vind by die wete dat jy die werk gedoen het.

Moenie ’n fout maak nie, daar is altyd werk om te doen. In Namibië is die hoeveelheid werk wat gedoen moet word soms oorweldigend.

Die meerderheid van wat gedoen moet word, is nie die soort werk wat jou ryk of selfs beroemd sal maak nie. Tog moet ons werk, en die werk moet gedoen word.

– [email protected]



* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.