Wees dapper: Verstaan die waarom en omhels die hoe

Ek het onlangs ’n boek gelees, The Next Conversation, geskryf deur ’n Amerikaanse prokureur wat mense leer hoe om beter te kommunikeer. Een van die belangrikste insigte uit sy eerste hoofstuk was dat gesprekke daar is om verbinding te skep – jy kies: wil jy reg wees, of wil jy die verhouding versterk? ’n Ander les vir my was om nie net te hoor wat iemand sê nie, maar werklik aandag te gee aan hóé hulle dit sê.’n Onlangse misverstand met ’n goeie vriend het my gehelp om hierdie les in die praktyk te sien. Vir my was dit ’n klein saak, maar dit het hom diep geraak. Aanvanklik was ek nuuskierig oor waarom dit hom gepla het, maar wat my werklik getref het, was hóé hy sy gevoelens uitgespreek het. Dit het my ’n dieper begrip van hom as mens gegee – iets wat woorde alleen nie altyd wys nie.Die skrywer noem dat wanneer ons in ’n meningsverskil probeer “wen” en ander verkeerd bewys, gee ons ’n stukkie van die verhouding prys. Met tyd kan dit die band tussen mense verswak, veral as dit oor persoonlike opinies of emosies gaan. Hierdie perspektief het my laat besluit om, waar ek kan, eerder te kies om te verstaan en te verbind – selfs al verskil ons. En as ek die een is wat die verhouding skaad, is dit my plig om uit te reik en daaraan te werk (want soms kom emosies in die pad en niemand van ons is perfek nie).Dis nie altyd maklik nie. Maar wanneer ons begin oplet na die hóé – hoe iemand kommunikeer, hoe hulle konflik hanteer – leer ons soveel meer as net die redes agter hul gevoelens. Dit wys hoe belangrik die verhouding vir hulle is en hoe hulle kies om dit te benader. Ja, ons verskil almal. Ons ervaar dinge anders. Maar die manier waarop ons kies om daardie verskille te hanteer, is waar ons óf groei, óf skade kan bring.My uitnodiging aan jou: Wanneer jy weer in ’n moeilike gesprek is, wees nuuskierig oor die waarom, maar wees ook bewus van die hóé (ongeag aan watter kant van die gesprek jy staan). En dan vra jy jouself: Is dit ’n verhouding wat ek wil koester? As dit is, werk saam daaraan. As dit nie by jou waardes pas nie, stel sag grense – met respek.Wees dapper. Wees teenwoordig. En bou met liefde en begrip. * Astrid is ’n Namibiër wat saam met haar man en twee jong kinders in Waterford, Ierland, woon. Sy is passievol oor vrouebemagtiging en geestesgesondheid. Dié rubriek is deel van haar Be Brave Monthly Glimmer-inisiatief waar sy elke maand haar gedagtes, ervarings en raad per e-pos deel. – Gasskrywer – astrid@bebrave.events Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Network Media Hub (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Wees dapper: Verstaan die waarom en omhels die hoe

Kommentaar

Republikein 2025-11-05

Meld asseblief aan om kommentaar te lewer

Wees dapper: Verstaan die waarom en omhels die hoe

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.