Wees braaf: Rits mekaar se rokke toe

Ek glo nogal sterk aan “fake it till you make it” – of, in my geval onlangs, “dra dit met selfvertroue en hoop niemand kyk na jou rug nie”.Ek was in Dublin vir ’n baie groot oudit-tender. Nie sommer enige tender nie – een van daardie voorleggings waar almal netjies aangetrek is, elke woord tel en jou hart effens vinniger as gewoonlik klop.Vir die groot dag het ek my mooiste korporatiewe rok ingepak: wit en blou, stylvol, professioneel en net genoeg “ek het my lewe onder beheer” om my moed te gee.Daar was net een klein probleem: die ritssluiter was agter.Ek kon dit halfpad optrek. Nie verder nie.Gewoonlik sou ek iemand by die hotel se ontvangs vra om te help, maar dié oggend was daar niemand wat ek gemaklik gevoel het om te vra nie. “Geen probleem nie,” besluit ek. “Ek sal by die kantoor een van die vroue vra.”Toe laat weet my baas vroeg hy is reeds op pad kantoor toe vir ’n laaste proeflopie van die voorlegging. Toe ek daar aankom, was daar natuurlik nog geen vrouekollega in sig nie. Net my baas (en dis ons “hoofbaas” bygesê). En kort daarna nóg ’n baas.Wat doen ’n mens? Jy trek jou skouers terug, lig jou ken op en stap asof ’n half-oop rok presies die nuwe korporatiewe mode is.My baas vra toe of ek saam koffie wil gaan haal. Onder in die straat – amper Dublin se eie Wall Street, vol pakke, koffiebekers en mense wat baie belangrik lyk – staan ek dus met my half-oop rok en probeer baie subtiel seker maak my brabandjies het nog nie besluit om deel van die tenderspan te word nie.Toe voel ek ’n arm sag om my skouers.’n Ouer dame leun nader en fluister: “Sal jy omgee as ek dit vir jou toemaak?”Sy kyk na my baas, knipoog, glimlag en sê: “Ek verstaan hoe dit voel.”En net so trek sy my ritssluiter op.Geen drama nie. Geen oordeel nie. Net een vrou wat ’n ander vrou se rug raaksien – letterlik.Ek het daarna met nóg meer selfvertroue kantoor toe teruggestap.Ons sê dikwels vroue moet mekaar se krone regskuif wanneer hulle skeef sit. Ek dink dit is tyd dat ons die spreekwoord uitbrei.Wees braaf genoeg om soms met ’n half-oop rok die wêreld in te stap. En wees wakker genoeg om raak te sien wanneer iemand anders dalk net ’n klein bietjie hulp nodig het.Want soms lyk ondersteuning nie soos groot woorde of groot gebare nie. Soms is dit net ’n hand op ’n skouer, ’n sagte “ek verstaan” en iemand wat jou ritssluiter vir jou optrek.Lig mekaar se krone op.En, dames, rits mekaar se rokke toe.– Gasskrywerastridocallaghan@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Wees braaf: Rits mekaar se rokke toe

Kommentaar

Republikein 2026-10-21

Meld asseblief aan om kommentaar te lewer

Wees braaf: Rits mekaar se rokke toe

Kommentaar

Republikein 2026-10-21

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.