Vir die kinders se onthalwe

Aldo Horn – Ek dink meer mense moet skei. Meer egpare moet hulle eie, aparte lewens gaan leef.

Dalk moet ek bietjie uitbrei: Ek wil nie hê meer egpare moet redes kry om te skei nie, ek wil net hê minder mense moet die rooi vlae ignoreer. En heeltemal te veel kere word die rede voorgegee as: “Ons kyk maar of ons dit kan laat werk – vir die kinders se onthalwe.”

Ek was al te veel kere in die gang net buite die sitkamer wanneer die tannie daar sit en vertel hoe daar nou al vir die hoeveelste keer op haar verneuk is, en hoe sy verneder voel elke keer as iemand haar vertel van haar man in die winkel saam met ’n ander vrou. Maar dan sê sy met daai as-ek-nie-lag-nie-gaan-ek-huil-glimlag en ’n sug: “Ek moet net so bietjie langer uithou – vir die kinders.”

Vir een of ander rede dink almal die kinders is nie bewus van die situasie nie, dat jy hulle kan beskerm deur stil te bly. Die kinders weet – as die rondloopstories by jou uitkom, is hulle al by die kinders. Die eggenoot is in elk geval gereeld die laaste een wat uitvind.

Dis in so ’n huis wat ek grootgeword het. Die stories het rondgevlieg. Amper elke dag is daar ’n stryery aan die gang. Wanneer daar aandete as ’n gesin geëet word, is dit 20 minute se versmorende stilte. Vandat ek tien was, is elke dag onsmaaklik en niemand is gelukkig nie. Só het dit aangehou tot in my matriekjaar toe my ma besluit het genoeg is genoeg en die prokureur gebel het.

Ek is nie getroud nie, so ek sal nie maak asof ek weet hoe huwelike werk nie, maar ek weet hoe rof dit is wanneer die hele gesin op hul breekpunt is. Dis moeilik om werklik te lewe wanneer ’n enkele woord alles kan laat ontrafel. Om stil te bly en “net bietjie langer uit te hou” vreet energie.

Die ergste is dat die kinders weet daar is iets fout, maar die magteloosheid wat ’n mens voel wanneer jy nie weet hoe om jou ouers beter te laat voel nie, is te veel vir enige laerskool- of selfs hoërskoolkind om te hanteer.

Daar is ’n uitweg. Dis nie gemaklik nie, maar soms is dit noodsaaklik. As die plan in elk geval was om net te wag totdat die kinders klaar is met skool, doen dit eerder nou as later, want ek kan jou belowe dat meer kinders ’n “gebroke” huis bo ’n ongelukkige huis sal verkies.

Daar is baie redes om te bly, maar “vir die kinders” moet asseblief nie een van hulle wees nie.

* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.