Tyd om tot siens te sê

Theresa van Zyl – In Julie het ek hulde gebring aan ’n sielsgenoot. Vandag is dit my voorreg om ’n kosbare vrou met jou te deel. Dalk ken jy haar, dalk gaan jy ook in hierdie week by haar begrafnis wees. Maar, al doen jy nie, ontmoet haar tussen die lyne en gedagte flarde van woorde wat ver te ontoereikend is om die weelde vas te vang wat in my hart lê en vanoggend in my trane weerkaats. En, as daar so ’n iemand in jou lewe is, koester haar, waardeer haar en bestee tyd saam met haar . . . terwyl jy nog kan.In hierdie week gaan ons die trappies opstap en in die gladde kerkbanke inskuif met die wete: Dis tyd om tot siens te sê. ’n Groep uiteenlopende mense saamgebring in ’n kerk vir ’n begrafnisdiens. Maar, daar is een gedagte, een band en een verlies wat ons sal saambind. . . En dít is Magda. Magda. ’n Vyfletter-naam vir ’n vrou wat alles-in-een was. . . ’n Lewensmaat, ’n ma, ’n ouma, ’n suster, ’n vriendin, ’n mentor, ’n veilige hawe teen die storms van die lewe – ’n tydlose juweel in ons tydelike bestaan. Sy het elkeen van ons se lewens op haar stil manier aangeraak, volgemaak en onherroeplik verbeter.Magda het ’n rol gespeel in die mens wat elkeen van ons wat hierdie verlies deel, geword het. Net jý sal weet watter inset sy in jou lewe, jou hantering van probleme, jou uitkyk op die lewe, selfs die vorming van jou persoonlikheid gehad het.En nou is sy nie meer hier nie. Ons kan haar nie bel, SMS of WhatsApp nie. Ons kan nie gou inhardloop vir ’n vinnige koffie nie. Niemand gaan ooit weer na jou kyk of luister soos sý het nie. Haar parfuum gaan nie weer om jou dwaal nie en jy gaan nie weer in haar oё van onbaatsugtige liefde kan kyk en voel jy word werklik ráákgesien nie. Nooit weer nie. . . En dis seer. Dis leeg. Die lewe is skielik ánders sonder haar, al was dit net die siel-salwende wete dat sy dáár is – net ’n oproep, ’n paar minute, of ’n paar uur ver. . . Maar weet jy wat? Sý lééf vóórt – in jou en in my wat haar geken het. Die grootste eer en geluk wat jy aan haar kan bring, is om aan te hou met lewe. Léwe so goed en so voluit as wat jy kan. . . terwýl jy kan. Neem dít wat jy by haar geleer het, in haar bewonder het, by haar gesien het en leef dit uit. Deel Magda se groot, goue omgee-hart met elkeen wat oor jou lewenspad kom. En – sy is nie wég nie, want sy word onthou. Jy kan oral flentertjies van Magda se vreugdes aanhou geniet, as jy net kyk en luister en voel . . . ’n String glinsterende pêrels, ’n keurige blommerangskikking met lelies tussen-in, die wind se ritseling deur die blaredos van ’n boom, roos-struike wat vol en veelkleurig in blom staan, die koel verfrissing van reёn, die vreugde van ’n goeie boek, die klik van breinaalde, die reuk van natgrond, pannekoek en Sondagmiddagete. Dis onbeperk. Dis tydloos en dis dáár. Soos sý. Kyk net met jou siel en luister met jou hart . En nou, die hoogtepunt is woorde deur Magda sélf geskryf en bewaar in ’n dagboek. Tot vandag. Tot nou. Vir elkeen van ons om saam te vat:“ Wanneer jy ’n besluit moet neem, dink aan jou kinders en aan jou gemoedstoestand. . . En sodra jy tot ’n besluit gekom het, hou op om te redeneer oor wat was en gaan wees. Berus en laat gaan. Onthou, God sal nie iets op jou pad bring wat jy nie kan hanteer nie.” – Gasspreker – scribecalling@yahoo.com* Rubrieke, meningstukke, briewe en SMS’e deur lesers en meningvormers weerspieël nie noodwendig die siening van Republikein of Namibia Media Holdings (NMH) nie. As mediahuis onderskryf NMH die etiese kode vir Namibiese media, soos toegepas deur die Media-ombudsman.

Tyd om tot siens te sê

Kommentaar

Republikein 2026-02-03

Meld asseblief aan om kommentaar te lewer

Tyd om tot siens te sê

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.