Staan op vir jouself

Ek dink ons almal het dit al gevoel – daardie oomblik waar iemand probeer besluit hoe jy moet voel, wat jy moet doen, of watter pad jy moet stap. Dis uitputtend en frustrerend, en soms laat dit jou klein voel sonder dat jy dit eens besef. Jy dink dalk jy moet stilbly om die vrede te bewaar, of jy dink jou idees tel nie soveel soos ander s’n nie. Maar weet jy wat? Jy hoef dit nie te laat gebeur nie. Jy hoef nie jou lewe oor te gee aan iemand anders se idees van wat reg of verkeerd is nie.Om vir jouself op te staan beteken nie jy is arrogant of selfsugtig nie. Dis net jou manier om jou waardigheid te beskerm. Dis om vir jouself te sê: Ek ken myself, ek weet wat ek wil hê en ek gaan nie wag vir toestemming om te lewe nie. Dis jou reg om te kies, selfs al is dit moeilik, selfs al verstaan ander dit nie. Hoe dikwels laat ons nie mense se opinies ons lei nie, sonder dat ons eens dink wat ons eintlik self wil hê? Dis soos om jou eie stem stil te maak net omdat iemand anders harder praat of ’n harder stem het. Party mense gaan probeer om jou te beïnvloed, jou te manipuleer, jou aan jou eie keuses te laat twyfel. Hulle wil dalk hê jy moet dit “veilig” speel, soos hulle, of hulle dink hulle weet van beter. Hulle dink hulle het die reg om jou te sê wat goed is vir jou lewe, waaroor jy moet droom en watter risiko’s jy mag neem. Maar onthou – niemand anders se pad pas perfek by joune nie. Jou reis is uniek en jy is die enigste een wat jou koers kan bepaal.Om vir jouself op te staan beteken soms om “nee” te sê wanneer almal anders “ja” sê. Dit beteken om jou mening te lug, selfs wanneer dit ongemaklik is. Dit beteken om jou eie grense te stel en niemand toe te laat om dit te oorskry nie. En ja, dit is nie altyd maklik nie.Jy gaan mense hê wat teleurgesteld is, mense wat jou probeer oortuig dat jy verkeerd is, mense wat nie jou besluit verstaan nie. Maar hoe meer jy dit doen, hoe sterker voel jy. Jy begin besef dat jou mening, jou wense en jou hart tel. En dis iets wat niemand van jou kan wegneem nie.Om vir jouself op te staan beteken ook om jou eie foute te aanvaar. Jy gaan foute maak. Jy gaan mense teleurstel. Jy gaan jou eie gedagtes bevraagteken. Maar dit is hoe jy leer, hoe jy groei en hoe jy sterker word. Jy leer jou waarde hang nie af van wie jou goedkeur nie, dat jou vreugde nie afhang van wie jou sien nie. Jy begin verstaan dat jy jou eie goedkeuring moet gee, jou eie grense moet respekteer en jou eie stem moet eer.Jy hoef nie klein te wees nie. Jy hoef nie stil te wees nie. Jy hoef nie te wag dat ander jou toestemming gee om te wees wie jy is nie. Staan op vir jouself. Jy sal verbaas wees oor hoe sterk jy regtig is wanneer jy dit doen.– annemarie@nma.com.na* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Staan op vir jouself

Kommentaar

Republikein 2025-11-12

Meld asseblief aan om kommentaar te lewer

Staan op vir jouself

Kommentaar

Republikein 2025-11-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.