Selfs al sal Hy nie. . .

Daar is ’n soort geloof wat maklik is om uit te leef wanneer alles volgens plan verloop. Dit is dan net so maklik om te sê “God is goed”, want alles loop klopdisselboom. Maar ons weet almal, dis nie hoe die lewe verloop nie. Jy kry die bitter met die soet, die slegte met die goeie. Dan hoop ek jy kan nogsteeds sê: “God is goed, selfs al sal Hy nie. . .”Selfs al verstaan jy nie, selfs al lyk die voorsiening nie soos dit waarvoor jy gehoop het nie. Selfs al is daar nie antwoorde op jou gebede nie en selfs al breek jou hart oor die uitkoms. So is die lewe.Ek het nog nooit iemand ontmoet met wie dit nog net goed gegaan het nie. Wie nog nooit teëspoed iewers êrens opgetel het nie en wie se geluk nooit opgeraak het nie. Ek moet ook nog die persoon ontmoet wat nie hartseer, pyn en alleenheid ken nie. Ons almal het die lewe se bitter met die soet al geproe.Sal jy steeds bid wanneer jou omstandighede geen rede gee om iets te vier nie? Sal jy bly glo wanneer jou wonderwerk nie opdaag nie en jy jou nou in die middel van ’n realiteit bevind wat jy nie sien kom het nie? Waarop hoop en vertrou jy dan wanneer jy voel jy het die einde van jouself bereik? Dalk is dit hoe Naomi van ouds gevoel het, toe sy gesê het, noem my liewer “Mara”, want die lewe se bitter smaak wou nie uit haar mond padgee nie. Maar toe is daar die koppige geloof van Rut. Aai dierbare Rut. Jy het dalk nie ’n Rut om jou geloof in jou God aan te wakker en om jou te probeer aanspoor na die belofte nie. Maar nou kan jy oorgee, oorgee aan Hom om te besluit wat die uitkoms moet wees.Jy het mos klaar gebid, gehoop, beplan en geglo. Nou kan jy niks meer doen nie. Al wat oorbly is om net oor te gee. Die antwoord wat jy in elk geval aan gedink het, en besluit het hoe dit moet wees, is ver van wat Hy wil doen en gee. Die uitkoms wat jy vir jou lewe geskep het, is nie Syne nie. Verslap jou greep, jy is nie in beheer nie. So, selfs as die antwoord nie soos joune lyk nie, gee jou verwagtinge prys. Selfs al moet jy treur oor die hoop wat jy gehad het, laat vaar jou idee. Want oorgawe is nie net om meer geloof te hê nie, maar om die illusie te laat vaar dat jy die uitkoms nog beheer. Oorgawe is soms om ons hande te verslap en drome prys te gee waaraan ons te styf vashou. Dan kom die vrede wanneer ons besef ek gee die uitkoms oor aan die Een wat in beheer is. Selfs al moet ek weer begin, selfs al verstaan ek nie, selfs al breek my hart weer en weer padlangs. Want selfs al sal Hy nie, sal ek steeds bly glo. Teleurstelling sal steeds seermaak, maar my geloof was nog nooit ’n kontrak tussen my en God wat ’n lewe sonder pyn gewaarborg het nie.– Gasskrywermarliseizaaks@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Selfs al sal Hy nie. . .

Kommentaar

Republikein 2026-10-22

Meld asseblief aan om kommentaar te lewer

Selfs al sal Hy nie. . .

Kommentaar

Republikein 2026-10-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.