Saartjie is op pad huis toe

Charlotte Beukes-Muundjua – Saartjie gaan huis toe! Lammerlaagte se ronnemeid se soetkys gereed, op pad Ousie-ma toe.Dis knap voor lang naweek en Ousie-ma se mobi-fooniekie lui. Sy val amper oor haar vet kat om by haar foon uit te kom en sit die stoel net-net mis uit honger vir daai geliefde stem – haar allerenigste blompot – Saartjie.“O, jy sê jy kom kuier die hele naweek? Ai my blom, God het my gebed gehoor. “Die verlange was nou al kloppend, soos ’n pitsweer. Ek kyk elke naweek uit vir ’n stofwolk op ons grondpad, maar geen Saartjie.“Bring vars groente saam en die sawwe sponslekkers. O, en kondensmelk want die kropsuur van vars melk keil my weer op. Dis al my kind. O, o en menys.”“Anys? vra Saartjie. Gaan ma beskuit bak?”“Nee Saartjie, luister reg, dis die bottelgoed vir aartappelslaai.”“O, Ma meen mayonnaise!! Ek kry sommer twee by Choppies.”Nou klink Ousie-ma vererg: “Los Windhoek se klein tjoppies vleis, ons slag ’n spekvet skaap.”Nog ’n verby-mekaar-praat.“Ek het ’n spesiale geskenkie wat saamkom: ’n Stanley-beker,” sê Saartjie.“Wie is ka’ Stanley Beukes? Het jy nou vir arme Blessings gelos, die klong moet dan kom slag en my pynbene kom uitsmeer én op sy kitaar kom speel.Los tog daarie Windhoek se loopsgeit my keent en bly by een man.”“Nee, Ma,” sê Saartjie, “dis ’n warmhoubeker vir drinkgoed. Ek wil vir ma sistematies nuwe dinge leer, want Blessings se mense is hoogsgeleerd.”“Huh? Is daar nou vroumens tamaties? Kom ons hou maar by onse gewone tamaties; die moffie-affêre klink ongesond.”Saartjie lag heerlik en geniet dit nou om verder haar ou girl se been te trek; behalwe die onkunde is sy half doof.“Ja Ma, laat weet as ek nog iets moet saambring anders as die basiese.”“Nee, my keent, hoe is daar ta’ nou ’n Basie ook in die trip. Jy weet dan hoe lyk die kooigoed en ons kan nie ’n ekstra slagding slag nie. Jy weet dan kuiermense moet ’n vleisietjie saamvat.”Saartjie kry lekker oor “Basie”.“Amper vergeet ek my deurmekaar medisyne. Kyk tog wat kan jy kry, beslis jamiekie-gemmer (Jamaica-gemmer) en kamferblokkies; dit help vir my maagklag.“En groot assemblief my slangsalf, jy ken mos daai Anna-rige naam. En onthou jou leë menys-bottels vir my vye-jam en room.” Saartjie sug, want nou ryg sy darem versoeke in, en sy durf nie iets vergeet nie. Nogal slangsalf; wanneer sal sy leer dis “Anaconda”.Sy sal die ou girl met meer dan haar lys bederf; soos haar Vinola magnolia-seep, Goya-poeier en groentesade. Sommer drie pakke sonneblomsaad, haar gunstelingblom. Sy het toevallig ’n sonneblomvoorskoot raakgeloop. O, en natuurlik ’n groot sak hoendervoer. Die geveerdes haar geselsmaters. “Ja Ma, ek bring alles en nog wat in ’n meme-sak. Ek moet nou aflui, netnou word ek gefire.”“Goed so Saartjie-meid, julle moet tog stadig ry. Die bojane en bosvarke is weer die pad vol.“Hoeee Saartjie, amper vergeet ek my snuif; kry dié assemblief. Smaak skoon alle bome se sade het kom kooimaak in my neus. “En as jy kan, kry ’n sakdoek by die mansafdeling; ek soek nie daai blommetjies-hier-jy stukkie-vroumens-sakdoeke nie. Jy weet mos ek blaas nie, ek trompet!”Ai tog, dink Saartjie. Sy gaan seer sekerlik met so ’n sakdoek by ons troutafel eindig. . . en haar verpleegsterskoene. Sy verseg om nuwe skoene te dra. Nou ja, dis al moeder wat ek het, stroomop maar oorlopensvol liefde en reg-deur.So eindig nóg ’n misverstand-gesprek soos twee treine wat kruis, dog kinderlike vreugde in elkeen se hart. Ousie-ma traak nou mooi niks oor ’n Basie, Sus tamaties of Stanley. Solank sy haar klimmeid op haar werf het, kan alles in hierdie woeste lewe tot stilstand kom. – Gasskrywer– machab1964@gmail.com* Beste lesers, keuring vir die publikasie van WhatsApp, briewe en alle ander lesersbydraes berus by Republikein. Klagtes oor die diens van private besighede word eers aan die onderneming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.

Saartjie is op pad huis toe

Kommentaar

Republikein 2026-01-07

Meld asseblief aan om kommentaar te lewer

Saartjie is op pad huis toe

Kommentaar

Republikein 2026-01-07

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.