Radio: Die krag van outentieke menslike verbintenis

My oupa was vir lank blind (gesiggestremd) voordat hy die tydelike met die ewige verwissel het. 

So, wanneer jy gefluister het, het hy sy ore gespits, “Hoe sê jy nou?” Of die gesprek hom nou ingesluit het, al dan nie. Wanneer geselskap skaars was, was die draadloos sy tydverdryf. Vir nuus, goeiewense, stories, koerantopskrifte, Saterdagaand Tuis en so meer. Vir ure kon hy sit en luister. Ja, die radio was sy wekker en saans het hy die dag met radio-pitkos afgesluit.

Op ’n oumenspensioen is daar min wat jy kan bekostig. En vir diégene wat nie elke dag die dagblad kan koop nie, is die radio gerieflik vir elke dag se nuus, brokkies inligting en vermaak. Veral as juffrou Joey haar verjaarsdagboodskappe op “Goeiewense” instuur. 

Al wat jy nodig het, is jou radio en ’n goeie sein, geen intekenfooi en geen debietorder nie. Vir die meer tegnologies-gevorderdes van die samelewing – ’n internetverbinding, dan loop die stroom soos stroop heeldag.

Ja, vandag lyk radio se platform dalk anders, maar dit bly die betroubare bron en metgesel vir eensame dae. Vandag, in ’n tyd waar digitale konneksies ons aandag voortdurend verg, het die radio redelik goed by nuwe tegnologie aangepas. Daar is nou nie meer vrees oor die toekoms van radio nie. Die krag van radio bly die menslike element en verbintenis, want tegnologie is slegs die gereedskap en sal nooit die outentieke stem word nie. Vra gerus vir ChatGPT of Google. Hulle stem saam, die menslike verbintenis bly die sleutel tot radio.

Dis daardie verbinding wat radio jou bied wanneer die omroeper met sy of haar gehoor ’n konneksie maak. Wanneer daar empatie tussen luisteraars bestaan en mense met mekaar se stories kan vereenselwig. Wanneer ’n gemeenskap deur ’n enkele stem oor radiosenders opgeroep kan word om ’n verskil te maak. Daardie verbinding wat deurdring na ’n eensame en depressiewe siel.

Met nuwe tegnologie verskuif radio se verantwoordelikheid geensins nie. Dit is die gehoor se wense dat elke omroeper hulle vertroue met goeie etiese waardes bly bou. Dat hulle steeds die nuus en belangrike inligting uitsaai wat betroubaar en akkuraat is. Die luisteraars inlig oor ’n onderwerp wat deeglik met nuwe tegnologie nagevors is. Tegnologie gebruik om relevant te bly en tred te hou met die veranderende mediawêreld, om sodoende meer luisteraars te bereik. En ook die diverse samelewing met unieke stories te verenig en gaste se ervarings te deel. 

Ná ure voor die rekenaar elke dag en tyd op my slimfoon, is dit die unieke stemme van my geliefdes waarna ek soek. Hoe smag ek nou na ’n gesprek met Oupa en Ouma op die stoep met ’n koppie tee terwyl “Saterdagaand Tuis” se mense ons vermaak. 

Met al die nuwe toestelle en toepassings tot ons beskikking, mag die outentieke verbintenis wat radio steeds deur die jare vir ons bied, nooit uitsterf nie. En mag die egtheid van radiostemme steeds die trekpleister bly. 

– Gasskrywer

– [email protected]

* Beste lesers, keuring vir die ­publikasie van WhatsApp, briewe en alle ander lesers­bydraes berus by Republikein. Klagtes oor die diens van ­private besighede word eers aan die onder­neming vir reaksie voorgelê. Die menings van ons lesers en rubriekskrywers verteenwoordig nie noodwendig die standpunt van Republikein nie. Republikein is ’n lid van die Redakteursforum van Namibië (EFN) en onderskryf die etiese kode vir die Namibiese media soos toegepas deur die media-ombudsman.